Read Библи: Сыгъдӕг Псаломтӕ 45 Bible Online

Псаломтӕ 45 - Библи: Сыгъдӕг bible

Псаломтӕ 45

¹Зарӕггӕнджыты къорды разамонӕгӕн. Корахы фыртты зарӕг. Мелоди «Ӕвзонг чызджытӕ»-йы зӕлтӕм гӕсгӕ.

²Хуыцау — нӕ ныфсы мӕсыг, нӕ хъару, тагъд ӕххуысгӕнӕг — алы фыдбылызы.

³Уымӕ гӕсгӕ нӕ фӕтӕрсдзыстӕм, зӕхх куы сӕнкъуыса ӕмӕ хӕхтӕ фурды арфмӕ куы ныккӕлой,

⁴дӕтты уылӕнтӕ куы сабухой, хӕрдмӕ куы фӕцӕуой, ӕмӕ хӕхтӕ сӕ уынӕрӕй куы нынкъуысой, уӕд дӕр.

⁵Мӕнӕ ис уыцы цӕугӕдон, йӕ къабузтӕй Хуыцауы сахар кӕмӕн райы — Бӕрзӕндтыл Бадӕджы уаз цӕрӕн.

⁶Хуыцау уым ис, ӕмӕ сахар нӕ фӕцуддзӕн: Хуыцау ын баххуыс кӕндзӕни сӕумӕйӕ.

⁷Скатай сты адӕмтӕ, базмӕлыдысты паддзахӕдтӕ: Хуыцауы хъӕлӕс райхъуысти, ӕмӕ зӕхх атади.

⁸Уӕларвӕфсады Бардарӕг немӕ ис, Йаковы Хуыцау — нӕ сӕрылхӕцӕг.

⁹Ӕрцӕут ӕмӕ уӕхи цӕстӕй фенут Дунедарӕджы хъуыддӕгтӕ, зӕхх гӕныстон куыд фестын кодта, уый:

¹⁰зӕххы иу кӕронӕй иннӕмӕ баурӕдта хӕстытӕ, ныссаста ӕрдынтӕ, ӕрцытӕ ныцъцъӕл кодта, тохуӕрдӕттыл арт бафтыдта.

¹¹Ӕрсабыр ут ӕмӕ зонут: Ӕз дӕн Хуыцау, скадджын уыдзынӕн ӕппӕт адӕмты ’хсӕн, ӕгас зӕххы цъарыл.

¹²Дунедарӕг Хуыцау немӕ ис, Йаковы Хуыцау — нӕ сӕрылхӕцӕг.