Read Библи: Сыгъдӕг Псаломтӕ 47 Bible Online

Псаломтӕ 47 - Библи: Сыгъдӕг bible

Псаломтӕ 47

¹Зарӕг. Корахы фыртты псалом.

²Дунедарӕг стыр у, ӕмӕ Йӕ стауынц нӕ Хуыцауы сахары. Уым — Йӕ уаз хох,

³зӕххы цъары цин, хӕхты фидыц Сион. Йӕ цӕгатварс — Паддзахы стыр сахар.

⁴Йӕ цӕрӕнты — Хуыцау, сӕ армдарӕг.

⁵Паддзӕхтӕ ӕрӕмбырд сты, сӕ ных ӕм сарӕзтой,

⁶фӕлӕ йӕм куы бакастысты, уӕд дисы бафтыдысты; хорзау нал фесты ӕмӕ фӕстӕмӕ ныццавтой.

⁷Ризӕг сыл бахӕцыди, скатай сты арӕг сылгоймагау,

⁸раст цыма скӕсӕйнаг дымгӕ таршишаг наутӕ ныппырх кодта, уыйау.

⁹Хъусӕй цы фехъуыстам, уый ныр нӕхи цӕстӕй уынӕм — Уӕларвӕфсады Бардарӕджы, нӕ Хуыцауы сахары — ӕнустӕм ӕй ӕрфидар кодта Хуыцау.

¹⁰Дӕ Кувӕндоны, о Хуыцау, нӕ хъуыдытӕ Дӕ хорзӕхыл уыдысты.

¹¹Хуыцау, Дӕ ном ӕмӕ Дӕ кад зӕххы иу кӕронӕй иннӕ кӕронмӕ ’ххӕссынц. Дӕ тӕрхон кӕддӕриддӕр у раст.

¹²Райӕд Сионы хох, цин кӕнӕнт Иудейы чызджытӕ — Дӕ раст тӕрхоныл.

¹³Сионы алыварс ӕрлӕуут, ӕрзилут ыл, йӕ мӕсгуытӕ йын банымайут.

¹⁴Уӕ зӕрдыл ын бадарут йӕ систӕ, йӕ фидӕрттӕ йын бахъуыды кӕнут, цӕмӕй фӕстагӕттӕн сӕ кой ракӕнат.

¹⁵Ацы Хуыцау мыггагмӕ у нӕ Хуыцау, ӕнустӕм — нӕ фӕтӕг.