Read Библи: Сыгъдӕг Псаломтӕ 49 Bible Online

Псаломтӕ 49 - Библи: Сыгъдӕг bible

Псаломтӕ 49

¹Асафы псалом. Хуыцӕутты Хуыцау, Дунедарӕг, райдыдта Йӕ ныхас, дун-дунемӕ сиды скӕсӕнӕй ныгуылӕнмӕ.

²Ӕмбисонды рӕсугъд Сионӕй Йӕхи раргом кодта Хуыцау.

³Ӕрцӕуы нӕ Хуыцау, фӕлӕ нӕ уыдзӕни ӕдзӕм! Йӕ разӕй арт пихуылӕйттӕ калы, Йӕ алфамбылай — тыхджын уад.

⁴Уый сиды арвмӕ ӕмӕ зӕхмӕ — Йӕ адӕмӕн тӕрхон кӕнынмӕ:

⁵«Ӕрӕмбырд мӕм кӕнут Мӕ сыгъдӕджыты, нывонды уӕлхъус Мемӕ фидыд чи сарӕзта, уыдоны!»

⁶Уӕлӕрвтӕ расидтысты Йӕ рӕстад — Хуыцау Йӕхӕдӕг у тӕрхонгӕнӕг.

⁷«Байхъусут, Мӕ адӕм, Ӕз уын Мӕ ныхас фехъусын кӕнон! Израил, Ӕз дӕ ныхмӕ ӕвдисӕн лӕудзынӕн — Ӕз Хуыцау дӕн, дӕ Хуыцау.

⁸Дӕ нывӕндты тыххӕй дын нӕ уайдзӕф кӕнын; дӕ иууылсудзинӕгтӕ ӕдзухдӕр сты Мӕ разы.

⁹Нӕ бакомдзынӕн нӕдӕр род дӕ хӕдзарӕй, нӕдӕр сӕгътӕ дӕ фосдарӕнтӕй —

¹⁰хъӕды алы сырд дӕр Мӕн у, мингай хӕхтыл фос иууылдӕр Мӕн сты.

¹¹Ӕз хӕхтыл алы маргъы дӕр зонын, быдырты цардудӕй цыдӕриддӕр ис, уыдон иууылдӕр Мӕн сты.

¹²Куы сыстонг уаин, уӕд ӕй дӕуӕн нӕ зӕгъин: дун-дуне дӕр ӕмӕ дзы цыдӕриддӕр ис, уыдон иууылдӕр Мӕн сты.

¹³Ӕз, мыййаг, галы фыд хӕрын кӕнӕ сӕгъы туг нуазын?

¹⁴Бузныджы нывонд ӕрхӕсс Хуыцауӕн, Бӕрзӕндтыл Бадӕгӕн цы сомы ракодтай, уый сӕххӕст кӕн.

¹⁵Дӕ зыны сахат Мӕ ӕрцагур: Ӕз дӕ фервӕзын кӕндзынӕн, ӕмӕ Мӕ ды скадджын кӕндзынӕ».

¹⁶Тӕригъӕдджынӕн та Хуыцауы дзуапп уыдзӕн: «Мӕ уагӕвӕрдты кой цы кӕныс ӕмӕ Мӕ фидыдыл цы дзурыс,

¹⁷Ме ’Гъдауыл дӕ къух куы ауыгътай, Мӕ ныхӕстӕ Мын куы ницӕмӕ дарыс, уӕд?

¹⁸Давӕджы куы феныс, уӕд йемӕ ’мдзӕхдон свӕййыс, хӕтаг адӕмӕн — се ’мбал.

¹⁹Дӕ дзыхӕй цӕуы фыдгой, де ’взаг мӕнгард ныхас нывӕнды.

²⁰Иудадзыг де ’фсымӕрыл дамтӕ мысыс, хахуыр кӕныс дӕ мадызӕнӕгыл.

²¹Ды уыдӕттӕ кодтай, ӕмӕ дӕм Ӕз ницы дзырдтон; ды афтӕ банхъӕлдтай, цыма Ӕз дӕр дӕ хуызӕн дӕн. Нӕ! Ӕз дӕ базылын кӕндзынӕн, дӕ азымтӕ дын дӕ разы ӕрӕвӕрдзынӕн!»

²²Хуыцауы чи ферох кодта, уыдон! Бамбарут уый, науӕд уӕ Ӕз скуынӕг кӕндзынӕн, ӕмӕ уӕ ничи фервӕзын кӕндзӕн.

²³Бузныджы нывонд Мын чи хӕссы, уый Мӕ нымайы; раст фӕндагыл чи лӕууы, уымӕн Ӕз раргом кӕндзынӕн, Хуыцау ирвӕзынгӕнӕг кӕй у, уый.