Read Библи: Сыгъдӕг Псаломтӕ 50 Bible Online

Псаломтӕ 50 - Библи: Сыгъдӕг bible

Псаломтӕ 50

¹Зарӕггӕнджыты къорды разамонӕгӕн. Давиды псалом.

²Давид ӕмӕ Вирсавийы ӕрӕмуаты фӕстӕ Давидмӕ пехуымпар Натан куы бацыди, уӕд.

³Батӕригъӕд мын кӕн, Хуыцау, Де стыр хорзӕхмӕ гӕсгӕ, ссыгъдӕг мӕ кӕн тӕригъӕдтӕй Де стыр уарзты хатырӕй.

⁴Ӕрӕхс мын мӕ азым, ссыгъдӕг мӕ кӕн мӕ тӕригъӕдӕй!

⁵Сӕттын мӕ рӕдыдыл, мӕ тӕригъӕд ӕдзух — мӕ разы.

⁶Дӕ ныхмӕ, ӕрмӕст Дӕ ныхмӕ ракодтон тӕригъӕд, фыдракӕнд сарӕзтон Дӕ разы: раст у Дӕ уынаффӕ, ӕнӕхӕрам у Дӕ тӕрхон.

⁷Тӕригъӕдджынӕй райгуырдтӕн, тӕригъӕдджынӕй сӕвзӕрдтӕн мӕ мады гуыбыны.

⁸Ӕнувыд зӕрдӕ ӕхцон у Дӕуӕн, Дӕ уӕлзондӕй мын срухс кодтай мӕ миддуне.

⁹Иссопӕй мӕ бапырх кӕн, ӕмӕ ссыгъдӕг уыдзынӕн, цӕхс мӕ, ӕмӕ митӕй урсдӕр суыдзынӕн.

¹⁰Цин ӕмӕ мын хъӕлдзӕгдзинад ратт, ӕмӕ уӕд райдзысты ме стджытӕ — Ды кӕй ныссастай, уыдон.

¹¹Мӕ тӕригъӕдтӕй аздах Дӕ цӕсгом, ссыгъдӕг мӕ кӕн ме ’ппӕт азымтӕй.

¹²О Хуыцау, ссыгъдӕг мын кӕн мӕ зӕрдӕ, раст уд мын сног кӕн мӕ мидӕг.

¹³Ма мӕ фӕсур Дӕхицӕй, Дӕ Сыгъдӕг Удӕй мӕ ӕнӕхай ма фӕкӕн.

¹⁴Раздах мын Дӕ ирвӕзындзинады цин, Дӕ хъомысджын Удӕй мӕ сфидар кӕн.

¹⁵Ӕнӕхуыцӕуттӕн бацамондзынӕн Дӕ фӕндӕгтӕ, ӕмӕ Дӕм тӕригъӕдджынтӕ раздӕхдзысты.

¹⁶Туджы азымӕй мӕ бахиз, Хуыцау, мӕ ирвӕзынгӕнӕг Хуыцау, ӕмӕ ме ’взаг стаудзӕни Дӕ рӕстад.

¹⁷О Дунедарӕг, байгом мын кӕн мӕ дзых, ӕмӕ Дӕ стаудзынӕн!

¹⁸Уымӕн ӕмӕ Ды нывонд нӕ агурыс мӕнӕй, иууылсудзинӕгтӕ Дын ӕхцон не сты.

¹⁹Саст зӕрдӕ — ӕцӕг нывонд Хуыцауӕн; ныфссаст ӕмӕ сӕрныллӕг зӕрдӕйыл Ды Дӕхи нӕ атигъ кӕндзынӕ, Хуыцау.

²⁰Дӕ хорзӕхтӕй схайджын кӕн Сионы, Йерусалимы систӕ самай!

²¹Уӕд Дын ӕхцон уыдзысты рӕстады нывӕндтӕ, хуынтӕ ӕмӕ иууылсудзинӕгтӕ; уӕд уӕнгуытӕ ӕрӕвӕрдзысты Дӕ нывондхӕссӕныл.