Read Библи: Сыгъдӕг Псаломтӕ 58 Bible Online

Псаломтӕ 58 - Библи: Сыгъдӕг bible

Псаломтӕ 58

¹Зарӕггӕнджыты къорды разамонӕгӕн. «Ма мӕ фесаф»-ы зӕлтӕм гӕсгӕ. Давиды куывд, Саул ын йӕ хӕдзармӕ марджытӕ куы барвыста, уӕд.

²О мӕ Хуыцау! Мӕ фыдгултӕй мӕ бахиз! Мӕ ныхмӕ чи сыстад, уыдонӕй мӕ бахъахъхъӕн!

³Бахиз мӕ фыдгӕнджытӕй, тугцъиртӕй мӕ фервӕзын кӕн!

⁴Амарынвӕнд мӕ скодтой, бабадтысты мӕ размӕ. О Дунедарӕг, нӕдӕр фыдракӕнд сарӕзтон, нӕдӕр — тӕригъӕд, афтӕмӕй мыл ӕртыхстысты тыхгӕнджытӕ!

⁵Аххосджын нӕ дӕн, афтӕмӕй хӕстифтонгӕй ӕмбырдтӕ кӕнынц. Фӕзын мӕм ӕххуысмӕ, ӕркӕс мӕ уавӕрмӕ!

⁶О Дунедарӕг, Уӕларвӕфсады Бардарӕг, Израилы Хуыцау! Ӕппӕт адӕмты бафхӕрынмӕ раст! Гадзрахатӕй Дыл чи рацыд — иунӕгыл дӕр ма бацауӕрд!

⁷Ӕрвылизӕр фӕзынынц, сахары алыварс зилынц куыйтау.

⁸Сӕ дзыхӕй фауӕн ныхас рацӕуы, кардӕй уӕлдай не сты се ’взӕгтӕ. «Чи нӕ фехъусдзӕн?» — хъуыды кӕнынц уыдон.

⁹Фӕлӕ сыл Ды фӕхуддзынӕ, Дунедарӕг, ӕппӕт адӕмты сӕгад кӕндзынӕ.

¹⁰Ды — мӕ хъару, ӕз мӕ зӕрдӕ дарын Дӕуыл; Ды — мӕ ныфсы мӕсыг.

¹¹Хуыцау мыл ауды, Уый цӕудзӕни мӕ разӕй; Хуыцауы фӕрцы ме знӕгтӕм уӕлахизӕй кӕсдзынӕн.

¹²Маргӕ сӕ ма акӕн, уадз, мӕ адӕмӕй мацы ферох уа. Ныффӕйлау сӕ Дӕ хъаруйӕ, сӕ зонгуытыл сӕ ’рлӕууын кӕн. О Дунедарӕг, Ды — нӕ уарт!

¹³Сӕ тӕригъӕд — сӕ дзыхӕй рацӕугӕ ныхӕстӕ, куыд схъал сты, афтӕ сӕхи хызы бахауӕнт; сӕ былалгъыл — мӕнг ард ӕмӕ мӕнгдзинад.

¹⁴Дӕ азары хай сӕ бакӕн! Фесаф сӕ, сӕ кой дӕр куыннӕуал баззайа! Уадз, зӕххы цъарыл алчидӕр базона, Йаковы фӕдонтӕн Хуыцау сӕ хицау кӕй у, уый.

¹⁵Уыдон ӕрвылизӕр ӕрбаздӕхынц, сахары алыварс зилынц куыйтау.

¹⁶Къӕбӕр агурӕг зилынц ӕмӕ, сыдӕй мӕлгӕйӕ, ниуынц.

¹⁷Ӕз та зардзынӕн Дӕ тыхыл, сӕумӕйӕ расиддзынӕн Дӕ хорзӕх, уымӕн ӕмӕ фыдбылызы заман Ды уыдтӕ мӕ хъахъхъӕнӕг, мӕ мӕсыг.

¹⁸Ды — мӕ хъару, зарӕджы Дӕ стаудзынӕн. Хуыцау — мӕ мӕсыг, Хуыцау ауды мӕныл!