Read Библи: Сыгъдӕг Псаломтӕ 63 Bible Online

Псаломтӕ 63 - Библи: Сыгъдӕг bible

Псаломтӕ 63

¹Зарӕггӕнджыты къорды разамонӕгӕн. Давиды псалом.

²О Хуыцау, фехъус мын мӕ куывд, знаджы тасӕй мӕ бахиз;

³мӕнгард лӕгты фыдвӕндтӕй, фыдгӕнджыты фыдракӕндтӕй мӕ бахъахъхъӕн.

⁴Се ’взӕгтӕ карды комау сцыргъ кодтой, суагътой сӕ фаттӕ — маргӕйдзаг ныхӕстӕ,

⁵цӕмӕй сусӕгӕй ӕнаххосы фехсой. Ӕваст ӕй фехсдзысты — нӕ тӕрсынц.

⁶Фыдвӕндтӕ аразынц, тӕрхӕттӕ кӕнынц, сӕ ахсӕн хыз хуыздӕр кӕм сӕвӕрой, ууыл. Дзурынц: «Цӕй, чи нӕ фендзӕн?»

⁷Фыдвӕндтӕ аразынц, фӕзӕгъынц: «Хорз фӕнд ӕрымысыдыстӕм! Нӕ зӕрды цы ис, уый ничи зоны!»

⁸Хуыцау сӕ фехсдзӕни Йӕ фатӕй, ӕвиппайды фӕмард уыдзысты.

⁹Се ’взаг сӕ фесафдзӕн, чи сӕ уына, уыдон сӕ дӕрдты лидздзысты.

¹⁰Ӕмӕ тас бацӕудзӕн адӕмы, дзурдзысты Хуыцауы хъуыддагыл, бамбардзысты — Уый Хуыцау сарӕзта.

¹¹Рӕстгӕнӕг та Дунедарӕгыл цин кӕндзӕн ӕмӕ Йыл йӕ зӕрдӕ дардзӕн. Рӕстзӕрдӕтӕ Йӕ се ’ппӕт дӕр стаудзысты.