Read Библи: Сыгъдӕг Псаломтӕ 72 Bible Online

Псаломтӕ 72 - Библи: Сыгъдӕг bible

Псаломтӕ 72

¹Асафы псалом. Куыд ауды Хуыцау Израилыл, куыд ауды сыгъдӕгзӕрдӕтыл!

²Ӕз та, чысыл ма бахъӕуа, фӕцудон, фӕкӕлынмӕ мӕ бирӕ нал хъуыди:

³ӕдзӕсгӕмттӕм бахӕлӕг кодтон, ӕнаккӕгтӕ цардӕй къӕртт куыд ӕппарынц, уымӕ кӕсгӕйӕ,

⁴сӕ цард-цӕрӕнбонты хъизӕмар кӕй не ’взарынц, сӕ амӕлӕты онг сӕ хъару кӕй нӕ сӕтты, уый уынгӕйӕ.

⁵Уыдон царды зындзинӕдтӕй хызт сты, иннӕтау царды уӕз нӕ базонынц.

⁶Сӕрыстырдзинад фӕрдгуыты халау сӕ хъуырыл ӕртыхсти, сӕ дарӕс — ӕгъатырдзинад.

⁷Фырнӕрдӕй сӕ цӕстытӕ аныгъуылдысты фиуы, сӕ зӕрдӕтӕ — чъизи монцтӕй йедзаг.

⁸Хынджылӕггӕнгӕ, саузӕрдӕйӕ ныхас кӕнынц, ӕртхъирӕн кӕнынц ӕнӕввӕрсонӕй.

⁹Арвы ныхмӕ ныххӕлиу кодтой сӕ дзыхтӕ, ӕгас зӕххыл уырзӕй сгары се ’взаг.

¹⁰Ӕмӕ Мӕ адӕм цӕуынц сӕ фӕдыл, дзаггарзӕй сын сӕ дон нуазынц!

¹¹Уыдон фӕзӕгъынц: «Хуыцау ӕй цӕмӕй базондзӕн? Бӕрзӕндтыл Бадӕг афтӕ уынаг у?»

¹²Фыдгӕнджытӕ сӕ цард ӕрвитынц ӕдыхстӕй, сӕ мулкыл ӕфты, афтӕмӕй.

¹³Уӕдӕ ӕз дзӕгъӕлы архайдтон сыгъдӕгзӕрдӕйӕ цӕрыныл, мӕ къухтӕ ӕназымӕй дарыныл?

¹⁴Мӕхи цы хордтон алы бон дӕр, ӕрвылрайсом цы катай кодтон?

¹⁵Фӕлӕ ӕз афтӕ куы загътаин, уӕд Дӕ хъӕбултыл гадзрахатӕй рацыдаин.

¹⁶Мӕн уыдӕттӕ бамбарын фӕндыд, фӕлӕ уый тынг зын уыди,

¹⁷цалынмӕ Хуыцауы Кувӕндонмӕ бацыдтӕн ӕмӕ сын сӕ кӕрон базыдтон, уӕдмӕ.

¹⁸Ды сын сӕ фӕндаг скӕныс бырынцъаг ӕмӕ сӕ быныскъуыд фӕкӕндзынӕ.

¹⁹Ӕрбайсӕфдзысты ӕваст, ӕбуалгъ уыдзӕни сӕ кӕрон.

²⁰Куы райхъал уай, уӕд фын куыд ӕрбайсӕфы, афтӕ сын Ды, Бардарӕг, фесафдзынӕ сӕ бӕллицтӕ.

²¹Мӕ зӕрдӕ куы байдзаг ис мастӕй, куы тыхсти мӕ уд,

²²уӕд ӕз ӕнӕзонд уыдтӕн, ницы ’мбӕрстон, фосӕй уӕлдай нӕ уыдтӕн Дӕ разы.

²³Ӕз Демӕ дӕн кӕддӕриддӕр, мӕ рахиз къухыл мын хӕцыс,

²⁴раст фӕндагыл мӕ аразыс ӕмӕ мӕ уый фӕстӕ бакӕндзынӕ Дӕ кадмӕ.

²⁵Уӕларв ма мын Дӕу йеддӕмӕ чи ис? Ды мемӕ куы уай, уӕд ницӕмӕ бабӕлдзынӕн зӕххыл дӕр.

²⁶Слӕмӕгъ сты мӕ буар ӕмӕ мӕ уд, фӕлӕ Хуыцау — мӕ фидар ныфс, мӕ амонды хай мыггагмӕ.

²⁷Дӕуӕй чи адард ис, уый фесӕфдзӕн. Йӕ зӕрдӕ Дыл чи сивта, уыдоны Ды се ’ппӕты дӕр фесафдзынӕ.

²⁸Мӕнӕн та Хуыцауы раз ӕхцон у: Дунедарӕг Хуыцау — мӕ мӕсыг. Ӕз Де ’ппӕт хъуыддӕгты тыххӕй дзурдзынӕн.