Read Библи: Сыгъдӕг Псаломтӕ 76 Bible Online

Псаломтӕ 76 - Библи: Сыгъдӕг bible

Псаломтӕ 76

¹Зарӕггӕнджыты къорды разамонӕгӕн. Йедутуны зӕлтӕм гӕсгӕ. Асафы псалом.

²Хуыцаумӕ сидын, Хуыцаумӕ дзыназын, ӕмӕ мӕ фехъусдзӕни Уый.

³Бӕллӕхы бон Бардарӕджы агурын, ӕхсӕв-бонмӕ Йӕм мӕ къухтӕ дарын; ӕнцой нӕ ары мӕ уд.

⁴Хуыцауы мысгӕйӕ, ныхъхъӕрзын; хъуыдыты аныгъуылын, бастади мӕ уд.

⁵Нӕ мӕ уадзыс ӕрцъынд кӕнын дӕр, адӕргӕй мӕ дзыхы ныхас дӕр нал бады.

⁶Раздӕры бонтыл, ивгъуыд азтыл сагъӕс кӕнын.

⁷Мӕ зӕрдыл ӕрлӕууы, куыд-иу зарыдтӕн, ӕхсӕвыгон мӕ зӕрдӕмӕ ныккӕсын, уӕдӕ цы ракодтон, зӕгъгӕ.

⁸Ау, Дунедарӕг мыл мыггагмӕ атигъ кодта Йӕхи, Йӕ хорзӕхы аккаг мӕ никуыуал скӕндзӕн?

⁹Ау, байсысти Йӕ хорзӕх, никуыуал фехъуысдзӕни Йӕ ныхас?

¹⁰Ау, Дунедарӕгӕй, хатыр цы у, уый ферох ис, ӕмӕ Йӕ маст никуыуал ссӕудзӕн?

¹¹Ӕз загътон: «Мӕ бӕллӕх уый у, ӕмӕ Бӕрзӕндтыл Бадӕджы къух раздӕры хуызӕн нал у».

¹²Ӕрымысдзынӕн Дунедарӕджы хъуыддӕгтӕ, Дӕ кӕддӕры диссӕгтӕ ӕрлӕудзысты мӕ зӕрдыл.

¹³Цытӕ сарӕзтай, уыдӕттӕ ӕрымысдзынӕн, Дӕ диссӕгтыл хъуыды кӕндзынӕн.

¹⁴О Дунедарӕг, уаз сты Дӕ фӕндӕгтӕ! Кӕцы хуыцау у нӕ Хуыцауӕй стырдӕр?

¹⁵Ды — диссӕгтӕ ӕвдисӕг Хуыцау, адӕмтӕн фенын кодтай Дӕ хъомыс.

¹⁶Дӕ тыхджын къухӕй фервӕзын кодтай Дӕ адӕмы, Йаков ӕмӕ Йосефы фӕдонты.

¹⁷Хуыцау, дӕттӕ Дӕ федтой ӕмӕ сӕ тас бацыди Дӕ уындӕй, ныззыр-зыр кодтой хуыдымтӕ.

¹⁸Мигътӕй фемӕхсти дон, ӕврӕгътӕй арвы нӕрын хъуысы, алырдыгӕй тӕхынц Дӕ фӕттӕ.

¹⁹Гыбар-гыбур фестадысты уӕлӕрвтӕ, арвӕрттывдтӕй ныррухс ис дуне, ӕнкъуысы ӕмӕ ризы зӕхх.

²⁰Дӕ фӕндаг — денджызыл, Ды афӕд кӕныс арф дӕтты риуыл, ничи Дын зоны Дӕ фӕндаг.

²¹Дӕ адӕмы Ды бабар кодтай Моисей ӕмӕ Ааронӕн, фысты дзугау сӕ размӕ кодтай.