Read Библи: Сыгъдӕг Ӕмбисӕндтӕ 14 Bible Online

Ӕмбисӕндтӕ 14 - Библи: Сыгъдӕг bible

Ӕмбисӕндтӕ 14

¹Куырыхон сылгоймаг — хӕдзаргӕнӕг, ӕдылы ус та йӕ хӕдзар йӕхи къухӕй халы.

²Дунедарӕгӕй чи тӕрсы, уый раст фӕндагыл цӕуы; Дунедарӕгыл ӕлгъ чи кӕны, уый цӕуы галиу фӕндӕгтыл.

³Ӕдылыйӕн йе ’взаг — йӕ ехс, куырыхоны та йе ’взаг хъахъхъӕны.

⁴Галтӕ кӕм нӕй, уым хордон — афтид; хъаруджын галтӕ кӕм уа, уым тыллӕг бирӕ уыдзӕн.

⁵Рӕстӕвдисӕн сайгӕ нӕ кӕны, мӕнгӕвдисӕн мӕнгдзинадӕй улӕфы.

⁶Ӕдзӕсгом агуры уӕлзонд, фӕлӕ йыл нӕ хӕст кӕны; зондджын йӕ зондыл ӕнцонӕй ӕфтауы.

⁷Ӕдылыйӕ дӕхи дард лас — зондджын ныхас дзы нӕ фехъусдзынӕ.

⁸Зондджынӕн йӕ куырыхон зонд, йӕ фӕндаг кӕй ӕмбары, уый мидӕг ис, зондцухӕн та йе ’дылыдзинад — йӕ мӕнг хъуыдыты.

⁹Ӕдылытӕ худынц тӕригъӕдтӕ сыгъдӕггӕнӕг нывондыл, фӕлӕ цӕсгомджын адӕм Дунедарӕджы хорзӕх райсдзысты.

¹⁰Лӕгӕн йӕ рыст йӕхи йеддӕмӕ ничи зоны, йӕ циныл дӕр ын йӕхицӕй фылдӕр ничи фӕцин кӕндзӕн.

¹¹Ӕнӕхуыцауы хӕдзар ныззыгуым уыдзӕн, рӕстуды хӕдзар — дидинӕфтыд.

¹²Адӕймагмӕ иуӕй-иу фӕндаг раст фӕкӕсы, фӕлӕ йӕ ’ппынфӕстаг мӕлӕтмӕ ’ркӕны.

¹³Циндзинады дӕр зӕрдӕ фӕриссы, ӕмӕ цин раивы мастӕй.

¹⁴Ӕнӕуагӕн йӕ хъуыддӕгтӕм гӕсгӕ бафыстӕуыдзӕн, хорз адӕймагӕн дӕр афтӕ.

¹⁵Ӕнӕхин алы ныхасыл дӕр ӕууӕнды, фӕлӕ зондджын йӕ къахдзӕфтӕм лӕмбынӕг кӕсы.

¹⁶Зондджын фыдбылызӕй тӕрсы, ӕмӕ дзы йӕхи хъахъхъӕны, ӕдылы та — нӕрӕмон ӕмӕ ӕгӕр ныфсхаст.

¹⁷Мӕстыгӕр ӕдылы митӕ бирӕ кӕны; мӕнгард лӕг адӕмӕн — ӕнӕуынон.

¹⁸Ӕнӕфендӕн йӕ хай — ӕдылыдзинад, зондджыны кады худ — зонынад.

¹⁹Фыдгӕнджытӕ ӕркъул уыдзысты хӕларзӕрдӕ адӕмы раз, ӕнӕхуыцӕуттӕ — рӕстуды кулдуары цур.

²⁰Мӕгуыр лӕгыл йӕ хион дӕр былысчъилтӕ кӕны, хъӕздыгӕн бирӕ ’рдхӕрдтӕ ис.

²¹Йӕ хионмӕ ’лгъаджы цӕстӕй чи кӕсы, уый тӕригъӕд ми кӕны, мӕгуыр лӕгӕн ӕххуыс чи кӕны, уый — тӕхудиаг.

²²Фыдвӕндтӕ чи аразы, уымӕн йӕ фӕндаг ныссуйтӕ уыдзӕн, хорз хъуыддӕгтӕ чи кӕны, уыимӕ сты рӕстдзинад ӕмӕ ӕцӕгдзинад.

²³Алы уӕззау куыстӕй дӕр исты ’фтиаг разыны, дзӕнгӕдайӕ та — ӕрмӕст мӕгуырдзинад.

²⁴Куырыхонӕн йӕ кады худ — йӕ хъӕздыгдзинад, зондцух йӕхи йе ’дылы зондӕй сфӕлынды.

²⁵Рӕстӕвдисӕн адӕмы фервӕзын кӕны, мӕнгӕвдисӕн улӕфы мӕнгдзинадӕй.

²⁶Хуыцауы тас — фидар мӕсыг, Йӕ сабитӕн Уый у ӕмбӕхсӕн.

²⁷Дунедарӕгӕй тас — царды гуырӕн, уый фӕрцы мӕлӕты ахсӕн хызӕй фервӕздзынӕ.

²⁸Паддзахӕн йӕ дӕлбар бирӕ адӕм куы уа, уӕд скадджын уыдзӕн, йӕ дӕлбар куы ничи уа, уӕд йе сӕфт ӕрцыд.

²⁹Фӕразон адӕймаг — стыр зонды хицау, мӕстыгӕр та йе ’дылыдзинад равдисы.

³⁰Зӕрдӕ сабыр куы уа, уӕд буар дӕр ӕнӕниз уыдзӕн, хӕлӕгдзинадӕй стджытӕ ӕмбигӕ кӕнынц.

³¹Мӕгуыр лӕджы чи хъыгдары, уый йын йе Сфӕлдисӕджы ’фхӕры, кад Ын чи кӕны, уый мӕгуыртыл ауды.

³²Ӕнӕхуыцӕутты сӕ фыдбылызтӕ фесафынц, рӕстудӕн та йӕ мӕлӕты дӕр ис зӕрдӕдарӕн.

³³Уӕлзонд цӕры зондджыны зӕрдӕйы, ӕдылыты ’хсӕн бӕрӕг дары.

³⁴Раст фӕндагыл цы адӕм цӕуынц, уыдонӕн сӕ номы кой айхъуысы, тӕригъӕд та сын — худинаджы хос.

³⁵Паддзах йӕ зондджын цагъарӕн хӕрзаудӕн кӕны, чи йӕ сӕгад кӕны, уый та бафхӕры.