Read Библи: Сыгъдӕг Ӕмбисӕндтӕ 17 Bible Online

Ӕмбисӕндтӕ 17 - Библи: Сыгъдӕг bible

Ӕмбисӕндтӕ 17

¹Хус къӕбӕримӕ фидыдӕй цӕрын — хуыздӕр, цӕйнӕфӕлтау дӕ хӕдзар ӕргӕвст фосӕй йедзаг уа, фӕлӕ дзы хъаугъа ма ’нцайа.

²Зондджын цагъар йӕ хицауы ӕнӕуаг фыртӕн хицау суыдзӕн, ӕфсымӕртимӕ исбон байуардзӕн.

³Згъӕртайынгӕнӕн — ӕвзистӕн, куынцгом — сыгъзӕринӕн, зӕрдӕтӕ та Дунедарӕг фӕлвары.

⁴Фыдлӕг фыдгӕнӕджы ныхӕстӕм лӕмбынӕг хъусы, фӕлитой йӕ хъус дары зианхӕссӕг ӕвзагмӕ.

⁵Мӕгуыр лӕгыл чи худы, уый йын йе Сфӕлдисӕджы ’фхӕры; искӕй хъыгыл цин чи кӕны, уый ӕнӕ ’фхӕрдӕй нӕ баззайдзӕн.

⁶Зӕронд лӕгӕн йӕ кады худ — йӕ цоты цот, фырттӕ та кадджын сты сӕ фыдӕлтӕй.

⁷Ӕдылыйыл хиппӕлой ныхӕстӕ нӕ фидауынц, уӕзданыл та — мӕнг ныхӕстӕ.

⁸Гӕртам, чи йӕ дӕтты, уый цӕсты у алӕмӕты дур: кӕдӕмфӕнды ма фӕзилӕд, алы ран дӕр — пайда.

⁹Уарзтмӕ чи бӕллы, уый йе ’фхӕрд ферох кӕны; йӕ зӕрдӕйы маст чи хӕссы, уый йе ’мбалӕй ӕнӕхай фӕуыдзӕн.

¹⁰Зондджыны уайдзӕф куыд фӕрӕхойдзӕн, афтӕ зондцухмӕ сӕдӕ цӕфы нӕ бахъардзысты.

¹¹Фыдгӕнӕг ӕрмӕст змӕстмӕ тырны, ӕгъатыр зӕды йӕм рарвыстӕуыдзӕн.

¹²Зондцухыл, йе ’дылы зонд куы рафыцы, уыцы рӕстӕг сӕмбӕлыны бӕсты фӕлтау, йӕ лӕппынты кӕмӕн амардтой, ахӕм арсыл сӕмбӕл.

¹³Хорз ӕвзӕрӕй чи фиды, уымӕн йӕ хӕдзарӕй фыдбылыз иуварс никуы ацӕудзӕн.

¹⁴Загъд райдыдта — донмарӕн ратыдта; цалынмӕ нӕ сабухта, уӕдмӕ дӕхи ’рсабыр кӕн.

¹⁵Ӕнӕхуыцауы раст чи кӕны, рӕстуды — азымджын, иу дӕр ӕмӕ иннӕ дӕр Дунедарӕджы раз — ӕлгъаг.

¹⁶Ӕдылыйы та ’хцайы хызын цӕмӕн хъӕуы? Зонд дӕм куынӕ уа, уӕд уӕлзонд нӕ балхӕндзынӕ.

¹⁷Ӕрдхорд кӕддӕриддӕр демӕ ис; ӕфсымӕр та уымӕн райгуыры, цӕмӕй фыд заманы дӕ разы уа.

¹⁸Ӕнӕзонд ивазы йӕ къух, искӕй ӕвджид ныллӕууынмӕ тагъд кӕны.

¹⁹Хъаугъатӕ уарзӕг тӕригъӕд уарзы, йӕхи чи стауы, уый та ’рхауынмӕ бӕллы.

²⁰Сайӕгой зӕрдӕ хорзӕй ницы фендзӕн, мӕнгард ӕвзаг фыдбылызы бахаудзӕн.

²¹Ӕдылыйы ныййарӕг — додойаг, зондцухы фыд цин нӕ кӕны.

²²Зӕрдӕйы цин — ӕвдадзы хос, ӕрхӕндӕг зӕрдӕ стджытӕ бахус кӕны.

²³Ӕнӕхуыцау фӕччийы бынӕй гӕртӕмттӕ исы, цӕмӕй раст тӕрхон сзыгъуыммӕ кӕна.

²⁴Зондджынӕн йӕ цӕстӕнгас — уӕлзонды ’рдӕм арӕзт, ӕдылыйы цӕстытӕ зӕххы кӕрӕттыл зилынц.

²⁵Ӕдылы фыртыл йӕ фыд хъынцъым кӕны, йӕ ныййарӕг мадӕн — масты хос.

²⁶Хорз нӕу ӕнаххосы ’фхӕрын кӕнӕ номджын лӕджы рӕстдзинады тыххӕй нӕмын.

²⁷Бирӕзонаг ныхас кӕны хъавгӕйӕ, зондджын фидарзӕрдӕ у.

²⁸Ӕдылыйы дӕр, куы ницы сдзура, уӕд куырыхоныл банымайдзысты, йӕ дзыхыл куы хӕца, уӕд искӕмӕ зондджын фӕкӕсдзӕн.