Read Библи: Сыгъдӕг Ӕмбисӕндтӕ 18 Bible Online

Ӕмбисӕндтӕ 18 - Библи: Сыгъдӕг bible

Ӕмбисӕндтӕ 18

¹Хивӕнд, йӕхи цы фӕнды, уый кӕны, раст уынаффӕ куы фехъусы, уӕд та загъд ракъахы.

²Ӕдылы хъуыды кӕнын нӕ уарзы, фӕлӕ йын йӕхи зондджынхуызӕй равдисын йеддӕмӕ мацы ратт.

³Фыдгӕнӕджы фӕдыл цӕуы ӕлгъ, ӕнаккаджы фӕдыл — худинаг.

⁴Адӕймаджы ныхӕстӕ — арф доны ’нгӕс; уӕлзонды донгуырӕн цӕугӕдонау кӕлы.

⁵Фыдгӕнӕгӕн ӕххуыс кӕнын ӕмӕ рӕстуды раст тӕрхонӕй ӕнӕхай кӕнын хорз нӕу.

⁶Ӕдылыйы ’взаг загъд къахы, йӕ дзыхы тыххӕй над баййафы.

⁷Ӕдылыйӕн йе ’взаг — йӕ сафӕг, йӕ бырынкъ — йӕ ахсӕн хыз.

⁸[Зивӕггӕнаг тӕрсгӕ-ризгӕйӕ цӕры, буц ахуыр сыдӕй мӕлдзӕни.]

⁹Фыдӕвзаджы ныхӕстӕ адджинаджы хуызӕн адӕймагӕн йӕ хуылфмӕ бахизынц.

¹⁰Зивӕггӕнаг кусӕг дӕрӕнгӕнӕгӕй уӕлдай нӕу.

¹¹Дунедарӕджы ном — фидар мӕсыг, рӕстуд дзы бамбӕхсдзӕн ӕмӕ уыдзӕн ӕдас.

¹²Хъӕздыгӕн йӕ исбон — йӕ фидар мӕсыг, бӕрзонд сисау ӕм кӕсы.

¹³Ӕрхауыны размӕ фӕзыны ӕнӕввӕрсондзинад, кадӕн йӕ разӕй — сӕрныллӕгдзинад.

¹⁴Ныхасмӕ кӕронмӕ ма байхъус, афтӕмӕй дзуапп ратт — уый ӕдылыдзинад ӕмӕ худинаг у.

¹⁵Лӕг удвидар куы уа, уӕд йӕ буар дӕр низы ныхмӕ фидар уыдзӕн, фӕлӕ зӕрдӕсаст куы уа, уӕд ын хъару чи ратдзӕн?

¹⁶Зондджыны зӕрдӕ йӕ зондыл ӕфтауы, куырыхонты хъустӕ агурынц зонынад.

¹⁷Лӕвӕрттӕ адӕймагӕн уӕрӕх фадӕттӕ байгом кӕнынц, стыр хицӕуттӕм ын фӕндаг раттынц.

¹⁸Тӕрхондоны ныхасы бар фыццаг кӕмӕ ’рхауы, уый растдӕр фӕзыны, цалынмӕ йӕ ныхмӕлӕууӕг не ’рбацӕуы ӕмӕ йӕ не ’рфӕрсы, уӕдмӕ.

¹⁹Хӕлттӕ куы сӕппарай, уӕд хъаугъа банцайдзӕн, дыууӕ тыхджын ныхмӕлӕууӕджы фӕйнӕрдӕм ацӕудзысты.

²⁰Тӕргай ӕфсымӕр — ӕнӕбаххӕсгӕ мӕсыг, хыл — кулдуары ӕвдузӕн.

²¹Адӕймаг йӕ ныхӕсты фарнӕй ӕфсӕды, йе ’взагӕй цы спайда кӕна, уымӕй бафсӕддзӕн.

²²Цард дӕр ӕмӕ мӕлӕт дӕр — ӕвзаджы дӕлбар, йемӕ хӕларӕй чи цӕры, уый йын йӕ дыргъты ад базондзӕн.

²³Йӕхицӕн бинойнаг чи ссардта, уый — фӕрнджын, Дунедарӕджы хорзӕхӕй схайджын ис.

²⁴Мӕгуыр адӕймаг ныхас кӕны лӕгъстӕхуызӕй, хъӕздыг та гуырымыхъ дзуапп ратты.

²⁵Иуӕй-иу ӕрдхӕрдтӕ ӕрмӕст фыдбылызы хос сты, фӕлӕ вӕййы ӕфсымӕрӕй ӕнувыддӕр хӕлар.