Read Библи: Сыгъдӕг Ӕмбисӕндтӕ 20 Bible Online

Ӕмбисӕндтӕ 20 - Библи: Сыгъдӕг bible

Ӕмбисӕндтӕ 20

¹Сӕн — хынджылӕггӕнаг, арахъхъ — нӕрӕмон, чи сыл фӕцалх ис, уый ӕдылы у.

²Паддзахы маст — домбайы рыхын, дӕхиуыл ӕй куы бафтауай, уӕд дӕ тӕригъӕд дӕхи ныхмӕ рацӕудзӕн.

³Хъаугъатӕй йӕхи дард чи ласы, уымӕн уый — кады хос, алы зондцух та загъд къахынмӕ гӕппӕй лӕууы.

⁴Зивӕггӕнаг йӕ афоныл хуым нӕ кӕны ӕмӕ хуымгӕрдӕн афон ницы ссары.

⁵Адӕймаджы фӕндтӕ йӕ зӕрдӕйы денджызау арф сты, фӕлӕ сӕ зондджын раргом кӕны.

⁶Иузӕрдион хӕлӕрттыл сӕхи бирӕтӕ нымайынц, фӕлӕ ӕууӕнкджын адӕймаджы кӕм ссардӕуа?

⁷Рӕстуд сыгъдӕгзӕрдӕйӕ цӕры, йӕ байзӕддӕгтӕн тӕхудиаг у сӕ фидӕн.

⁸Паддзах тӕрхон кӕнынмӕ куы ’рбады, уӕд йӕ цӕстӕнгасӕй алы ’взӕрдзинад дӕр дымгӕмӕ ныддары.

⁹Кӕй бон у зӕгъын: «Мӕ зӕрдӕ сыгъдӕг у, мӕ тӕригъӕдтӕй ссыгъдӕг дӕн?»

¹⁰Сайаг барӕнтӕ, сайаг уӕзбарӕнтӕ — сӕ иу дӕр ӕмӕ сӕ иннӕ дӕр ӕлгъаг у Дунедарӕджы раз.

¹¹Адӕймаг ӕрыгонӕй дӕр йӕ митӕй бӕрӕг вӕййы — йӕ хъуыддӕгтӕ сыгъдӕг ӕмӕ цӕсгомджын сты ӕви нӕ.

¹²Хъусгӕ цы хъус кӕны ӕмӕ уынгӕ цы цӕст кӕны — иу дӕр ӕмӕ иннӕ дӕр Дунедарӕг сфӕлдыста.

¹³Кӕд фынӕй кӕнын уарзыс, уӕд мӕгуырмӕ ’рцӕудзынӕ, дӕ цӕстытӕ ма бацъынд кӕн ӕмӕ ӕфсӕст уыдзынӕ.

¹⁴«Ницӕйаг дзаума у!» — фӕзӕгъы ӕлхӕнӕг уӕйгӕнӕджы раз, куы адард вӕййы, уӕд та йе ’лхӕдӕй феппӕлы.

¹⁵Дунейы ис сыгъзӕрин, ис налхъуыт-налмастӕ, фӕлӕ уыдонӕй зынаргъдӕр — бирӕзонаг ӕвзаг.

¹⁶Ӕнӕзонгӕ адӕймаджы тыххӕй йӕ сӕр лыгмӕ чи ратта, уымӕн фӕстагмӕ йӕ дарӕс дӕр ласт ӕрцӕудзӕн, искӕй усы ’вджид чи ныллӕуа, уымӕн дӕр — афтӕ.

¹⁷Сайӕн миты фӕрцы цы хойрагыл фӕхӕст уай, уый хӕрзад вӕййы, фӕлӕ фӕстӕдӕр дӕ дзых змисӕй байдзаг уыдзӕн.

¹⁸Фӕндтӕ кӕнгӕйӕ, искӕимӕ уынаффӕ кӕн; тӕрхӕтты фӕстӕ тохы бацу.

¹⁹Фыдӕвзаг искӕй сусӕгтӕ рахъӕр кӕны — дзӕгъӕлдзыхӕй дӕхи хиз.

²⁰Йӕ фыд ӕмӕ йӕ мады чи ’лгъиты, уымӕн саудалынджы йӕ царды рухс ахуысдзӕн.

²¹Кӕрӕфӕй цы бынтыл ныххӕлоф кӕнай, уыдон арфӕгонд нӕ уыдзысты.

²²Ма дзур: «Ӕз мӕ маст райсдзынӕн!» Дӕхи Дунедарӕджы бар бакӕн, ӕмӕ дӕ Уый фыдбылызӕй бахиздзӕн.

²³Сайаг уӕзбарӕнтӕ Дунедарӕджы раз ӕлгъаг сты, ӕхцон Ын не сты, сайгӕ цы барӕнтӕ кӕнынц, уыдон.

²⁴Адӕймагӕн йӕ къахдзӕфтӕ Дунедарӕг аразы, адӕймаг та йӕ фӕндаг куыд бамбара?

²⁵Адӕймаг ард бахӕрыныл куы фӕтагъд кӕна кӕнӕ, хъуыды нӕ акӕнгӕйӕ, искӕмӕн зӕрдӕ куы бавӕра, уӕд къӕппӕджы бахаудзӕн.

²⁶Зондджын паддзах ӕнӕхуыцӕутты дымгӕмӕ ныддары, найгӕнӕнӕй сӕ бассӕнды.

²⁷Адӕймаджы мон — Дунедарӕджы цырагъ, цӕрдхуынкъӕй йӕ рухсдзыд скӕны.

²⁸Паддзахы хъахъхъӕнынц хӕрзаудӕн ӕмӕ ӕцӕгдзинад, йӕ паддзахы бадӕны ’рфидар вӕййы иузӕрдиондзинады фӕрцы.

²⁹Лӕппуйы кад — йӕ хъару, зӕронд лӕг та йӕ урс сӕрӕй фидауы.

³⁰Адӕймаджы йӕ цӕфтӕ фыддзинадӕй ссыгъдӕг кӕнынц, над йӕ зӕрдӕмӕ арф бахъары.