Read Библи: Сыгъдӕг Ӕмбисӕндтӕ 30 Bible Online

Ӕмбисӕндтӕ 30 - Библи: Сыгъдӕг bible

Ӕмбисӕндтӕ 30

¹Йакейы фырт Агуры, Массайы байзӕддаджы, ныхӕстӕ. Мӕнӕ цы радзырдта уыцы адӕймаг Итиел, уымӕн йе ’мном Итиел ӕмӕ Ухалӕн.

²Адӕмы ’хсӕн нӕй мӕнӕй ӕнӕфенддӕр, адӕймаджы зонд мӕм нӕй.

³Ӕз нӕ сахуыр дӕн уӕлзондыл, уаз зонынадӕй хайджын нӕ дӕн.

⁴Чи ссыди уӕларвмӕ ӕмӕ фӕстӕмӕ чи ’рцыди? Чи баурӕдта дымгӕ йӕ армы? Уӕлӕфтауы мидӕг дон чи батыхта? Зӕххӕн арӕнтӕ чи скодта? Куыд у йӕ ном? Куыд у йӕ фырты ном? Зоныс ӕй ды?

⁵Хуыцауӕн Йӕ алы ныхас дӕр сыгъдӕг у; йӕ зӕрдӕ Йыл чи дары, уыдонӕн Уый сӕ уарт у.

⁶Йӕ ныхӕстӕм ын мацы бафтау, науӕд дӕ фӕзылынджын кӕндзӕн, ӕмӕ сайӕгой разындзынӕ.

⁷О Хуыцау, дыууӕ хъуыддаджы дӕ курын, цалынмӕ цӕрон, уӕдмӕ мын уыдонӕй «нӕ» ма зӕгъ:

⁸тутт ӕмӕ мӕнг ныхӕстӕ мӕм хӕстӕг ма ’рбауадз; хъӕздыгдзинад мын ма ратт, мӕгуырӕй дӕр мӕ бахиз; цӕрыны фаг мын дӕтт къӕбӕр,

⁹цӕмӕй, куы фелгъӕд уон, уӕд Дӕ ма ферох кӕнон ӕмӕ афтӕ ма зӕгъон: «Дунедарӕг та чи у?»; цӕмӕй фыр мӕгуырӕй давын ма райдайон ӕмӕ Дын Дӕ ном ма сӕгад кӕнон.

¹⁰Хицауы раз йӕ цагъары фыдгой ма ракӕн, науӕд дӕ ралгъитдзӕн, ӕмӕ азымджын фӕуыдзынӕ.

¹¹Иуӕй-иутӕ ’лгъитынц сӕ фыдӕлты ӕмӕ сӕ мадӕлтӕн арфӕ нӕ кӕнынц.

¹²Ис ахӕмтӕ, ӕмӕ сӕхи цӕсты сыгъдӕг сты, афтӕмӕй та сӕ чъизитӕ нӕ цӕхсадтой.

¹³Ис, ӕнӕввӕрсон чи у, ахӕмтӕ, иннӕтӕм уӕлейӕ дӕлӕмӕ кӕсынц.

¹⁴Иуӕй-иутӕн сӕ дӕндӕгтӕ сты хъаматӕ, се ’фсӕртӕ — кӕрдтӕ, цӕмӕй мӕгуырты ӕмӕ, алцӕмӕй дӕр ӕнӕхай чи у, уыдоны ныхъуырой.

¹⁵Цъулберӕн дыууӕ чызджы ис: ӕри! ӕри! Ис ӕртӕ ӕнӕфсисы, цыппӕрӕм та «ӕгъгъӕд» никуы зӕгъдзӕн:

¹⁶мӕрдтыбӕстӕ, ӕнӕзӕнӕг гуыбын, донӕй бафсис кӕмӕн нӕй, уыцы зӕхх ӕмӕ арт, уый никуы зӕгъдзӕн: «Ӕгъгъӕд!»

¹⁷Йӕ фыдыл худгӕ, йӕ ныййарӕг мадмӕ хъусыныл ӕлгъ цы цӕст кӕны, уый дӕлвӕзы халӕттӕ скъахдзысты.

¹⁸Ӕртӕ хъуыддаджы мӕ дисы ӕфтауынц, цыппӕрӕм та не ’мбарын:

¹⁹цӕргӕсы фӕндӕгтӕ уӕлдӕфы, калмы фӕндӕгтӕ къӕдзӕхтыл, науы цӕуӕнтӕ денджызы, нӕлгоймаджы фӕндаг чызгмӕ.

²⁰Хъахбайы фӕндаг ахӕм у: бахӕры, йӕ былтӕ ныссӕрфы ӕмӕ фӕзӕгъы: «Ӕз ӕвзӕрӕй ницы ракодтон».

²¹Зӕхх ӕртӕ хъуыддагӕй сӕнкъуысы, цыппӕрӕм та уромгӕ дӕр нӕ кӕны:

²²цагъар паддзах куы свӕййы; зондцух хӕринагӕй куы бафсӕды;

²³хъахбай сылгоймаг мой куы скӕны; унӕут ӕхсины бынат куы бацахсы.

²⁴Зӕххыл ис цыппар къаннӕджы, фӕлӕ сӕхицӕй куырыхондӕр нӕй:

²⁵мӕлдзгуытӕ лӕмӕгъ сты, фӕлӕ сӕрды сӕхицӕн хӕринаг ӕрӕфтауц кӕнынц;

²⁶дамантӕ тыхджын не сты, фӕлӕ къӕдзӕхты ’хсӕн сӕхицӕн хӕдзӕрттӕ саразынц;

²⁷мӕтыхтӕн паддзах нӕй, фӕлӕ размӕ рӕнхъгай цӕуынц;

²⁸гӕккуырийы къухӕй ӕрцахсӕн ис, фӕлӕ паддзахы галуаны цӕры.

²⁹Ис ӕртӕ, сӕ уӕнгты ахаст хӕрзконд кӕмӕн у, ахӕмтӕ, цыппӕрӕмӕн та — фидар къахӕвӕрд:

³⁰сырдтӕн сӕ тыхджындӕр — домбай, йӕ разӕй фӕндаг никӕмӕн ратдзӕн;

³¹уасӕг, бодз ӕмӕ, йе фсады разӕй чи цӕуы, уыцы паддзах.

³²Де ’дылы зонды тыххӕй схъӕлдзырд куы суай ӕмӕ фыдвӕндтӕ куы кӕнай, уӕд дӕ дзыхыл дӕ армытъӕпӕнӕй ныххӕц,

³³уымӕн ӕмӕ, ӕхсыр куы цӕгъдай, уӕд дзы нӕлхӕ ’взӕры, фындз куы ныццӕвай, уӕд йӕ туг ракӕлы, маст куы сзынг кӕнай, уӕд та ссудзы хӕрамдзинад.