Read Библи: Сыгъдӕг Ӕмбисӕндтӕ 31 Bible Online

Ӕмбисӕндтӕ 31 - Библи: Сыгъдӕг bible

Ӕмбисӕндтӕ 31

¹Массӕйы паддзах Лемуелы ныхӕстӕ, йӕ ныййарӕг мадӕй цы зондамындтыл сахуыр ис, уыдон.

²Цы, мӕ лӕппу, мӕ зӕрдӕйы бын кӕй фӕхастон? Цы, мӕ лӕппу, мӕ зӕрдӕвӕрдмӕ гӕсгӕ мын чи райгуырд?

³Дӕ хъарутӕ ма ратт сылгоймӕгтӕн, дӕ хъомыс — паддзӕхты чи бабын кӕны, уыдонӕн.

⁴Лемуел, паддзӕхтыл нӕ фидауы сӕн нуазын, уӕздӕттыл — махсымӕйы фӕдыл зилын,

⁵цӕмӕй, куы барасыг уой, уӕд ма ферох кӕной Хуыцауы ’гъдау ӕмӕ мӕгуыр адӕмы раст тӕрхонӕй ӕнӕхай ма фӕкӕной.

⁶Сӕфты къахыл чи лӕууы, уымӕн бадарут махсымӕ, хъизӕмарӕй чи мӕлы, уымӕн сӕн бануазын кӕнут:

⁷куы бануазой, уӕд сӕ ферох уыдзӕн сӕ мӕгуырдзинад, сӕ хъизӕмӕрттӕ сӕ зӕрдыл нал ӕрлӕудзысты.

⁸Сӕ бон дзурын кӕмӕн нӕу, уыдоны сӕрыл рахӕц, ӕнӕбон чи у, уыдоны бартыл тох кӕн.

⁹Рӕстдзинады сӕрыл дзур, тох кӕн, мӕгуыр ӕмӕ гӕвзыкк чи у, уыдоны сӕраппонд.

¹⁰Хорз усы куыд ссардӕуа? Уый налхъуыт-налмастӕй зынаргъдӕр у,

¹¹йӕ мойы зӕрдӕ йыл фидарӕй ӕууӕнды, ӕнӕ ’фтиагӕй нӕ баззайдзӕн йемӕ,

¹²цӕрӕнбонты йын ӕвзӕрӕй нӕ, фӕлӕ хорзӕй фиды.

¹³Къуымбилмӕ кӕнӕ гӕн ӕндахмӕ бавнала — йӕ къухтӕ ӕнӕзивӕгӕй кусынц.

¹⁴Сӕудӕджергӕнӕг науы хуызӕн дардӕй самал кӕны хойраг.

¹⁵Нырма талынг вӕййы, афтӕ сысты, йӕ бинонтӕн хӕринаг скӕны, йӕ унӕутты исты куыстыл бафтауы.

¹⁶Зӕххы хай ӕрцагуры ӕмӕ йӕ балхӕны, йӕ куыстӕй цы мызд бакусы, уымӕй сӕндон саразы.

¹⁷Йӕ синтӕ ’рбатухы хъаруйӕ, йӕ къухты ис тых.

¹⁸Йӕ базайрӕгтӕ хорз уӕй цӕуынц, уый фӕуыны, ӕмӕ ’хсӕвыгон дӕр йӕ цырагъ нӕ ахуыссы.

¹⁹Йӕ къухтӕм райсы ӕлвисӕн, йе ’нгуылдзтӕ ӕлхуи уӕгъд нӕ кӕнынц.

²⁰Мӕгуыр лӕгӕн йӕ арм байгом кӕны, ӕххуысхъуагмӕ йӕ къух бадары.

²¹Йӕ бинонтӕн митӕй тас нӕу, се ’ппӕтыл дӕр — дывӕлдах хъуымацӕй дарӕстӕ;

²²йӕхицӕн дӕр бахуыйы ӕмбӕрзӕнтӕ, гӕн ӕндахӕй уафт ӕмӕ сӕнт сырх къуымбилӕй — йӕ дарӕс.

²³Йӕ сӕрыхицауы йын сахары кулдуары цур зонынц, йӕ бӕстӕйы хистӕрты ’хсӕн фӕбады.

²⁴Гӕн хъуымацӕй дарӕстӕ хуыйы уӕйӕн, Ханааны сӕудӕджертӕн — астӕубостӕ.

²⁵Хъару ӕмӕ хорз миниуджытӕй йӕхи сфӕлынды, фидӕнмӕ кӕсы хъӕлдзӕгӕй.

²⁶Йӕ ныхас у куырыхон, хорз зондамынд дзы хъуысы.

²⁷Йӕ хӕдзары хъуыддӕгтӕм йӕ цӕст дары, ӕвдӕлонӕй къӕбӕр нӕ хӕры.

²⁸Йӕ цот сыстынц ӕмӕ йӕ сыстауынц, йӕ сӕрыхицау дзы ’ппӕлынӕй не ’фсӕды:

²⁹«Кады аккаг сылгоймӕгтӕ бирӕ уыди, фӕлӕ ды се ’ппӕты дӕр амбылдтай!»

³⁰Зӕрдӕскъӕфӕн хуыз сайаг у, рӕсугъддзинад тагъд ивгъуыйы, фӕлӕ Дунедарӕджы раз тас кӕмӕ ис, уыцы сылгоймаг стауыны аккаг у.

³¹Ӕмбӕлгӕ хӕрзиуӕг ын раттут, сахары кулдуары раз ӕй сыстаут!