Read Библи: Сыгъдӕг Ӕмбисӕндтӕ 8 Bible Online

Ӕмбисӕндтӕ 8 - Библи: Сыгъдӕг bible

Ӕмбисӕндтӕ 8

¹Уый Уӕлзонды сидт нӕу, цымӕ? Зонды хъӕлӕс нӕ азӕлы?

²Фӕндаджы сӕрмӕ уӕлхохыл, стӕй, фӕндаг кӕм акъабуз ис, уыцы ран слӕууы,

³сахары кулдуары цур йе ’рдиаг хъуысы, сахармӕ бацӕуӕны раз хъӕр кӕны:

⁴«О, адӕм, ӕз сымахмӕ сидын, адӕммӕ кӕнын хъӕрахст!

⁵Ӕнӕхинтӕ, арфуынӕг зондыл сахуыр ут, ӕнӕзӕндтӕ, уӕ зондыл бафтаут!

⁶Байхъусут мӕм, уымӕн ӕмӕ мӕ ныхас асхджиаг у, рӕстдзинад хъуысы мӕ дзыхӕй,

⁷ме ’взаг хъусын кӕны ӕцӕгдзинад — ӕнаккагдзинад ме ’взагӕн ӕлгъаг у.

⁸Мӕ ныхӕстӕ иууылдӕр раст сты, сайд ӕмӕ мӕнгдзинад дзы нӕй.

⁹Зондджын мын мӕ ныхӕстӕ ’мбары, зонынадӕй чи схайджын ис, уый сӕ растыл нымайы.

¹⁰Мӕ зондамынд уын ӕвзистӕй зынаргъдӕр суӕд, зонынадӕн сыгъзӕринӕй фылдӕр аргъ кӕнут, уымӕн ӕмӕ уӕлзонд налхъуыт-налмастӕй хуыздӕр у, цӕмӕ фӕбӕллынц, уыдонӕй йемӕ абарӕн дӕр ницы ис.

¹²Ӕз Уӕлзонд дӕн, раст зондахаст мемӕ ис, зонынад ӕмӕ дардуынӕг зонд мӕнмӕ сты.

¹³Дунедарӕджы раз тас кӕмӕ ис, уымӕн фыддзинад ӕнӕуынон у. Сӕрыстыр ӕмӕ схъӕлдзырд, галиу фӕндаг ӕмӕ мӕнгӕвзаг ӕнӕуынон сты мӕнӕн.

¹⁴Уынаффӕ ӕмӕ ӕнтыст мӕнмӕ сты; ӕз зонд дӕн, ӕмӕ хъару мемӕ ис.

¹⁵Мӕ фӕрцы паддзӕхтӕ хицауиуӕг кӕнынц, барджын хицӕуттӕ раст тӕрхон рахӕссынц;

¹⁶бӕстӕты хицӕуттӕ ӕмӕ ’лдӕрттӕ, дунейы ӕппӕт тӕрхоны лӕгтӕ хицауиуӕг кӕнынц мӕ фӕрцы.

¹⁷Чи мӕ уарзы, уыдоны уарзын, чи мӕ агуры, уыдон мӕ ссардзысты.

¹⁸Мӕнмӕ сты хъӕздыгдзинад ӕмӕ кад, ӕвидигӕ фарн ӕмӕ рӕстдзинад.

¹⁹Мӕ дыргътӕ — сыгъдӕг сыгъзӕринӕй хуыздӕр, сыгъдӕг ӕвзистӕй ӕз фылдӕр пайда ’рхӕсдзынӕн.

²⁰Ӕз цӕуын раст фӕндагыл, раст тӕрхоны къахвӕндӕгтыл,

²¹цӕмӕй, чи мӕ уарзы, уыдонӕн аккаг хорзӕхтӕ балӕвар кӕнон, байдзаг сын кӕнон сӕ хӕзнадӕттӕ.

²²Дунедарӕг мӕн сфӕлдыста Йӕ фӕндаджы райдиан, Йе ’ппӕт хъуыддӕгты размӕ, рагзаманы.

²³Ӕз фӕзындтӕн раджы, заманты размӕ, дуне сфӕлдисыны агъоммӕ.

²⁴Ӕз райгуырдтӕн ӕнӕбын сӕрсӕфӕнтӕ ӕмӕ денджызты разӕй;

²⁵хӕхтӕ ӕмӕ къуыбыртӕ нӕма сӕвзӕрдысты, зӕхх, быдыртӕ ӕмӕ дунейы фыццаг рыджы муртӕн сӕ кой дӕр нӕма уыди, афтӕ ӕз райгуырдтӕн.

²⁷Дунедарӕг уӕлӕрвтӕ куы айтыгъта, уӕд ӕз Йӕ разы уыдтӕн. Ӕнӕбын сӕрсӕфӕны сӕрмӕ зиллакк куы нывӕста,

²⁸уӕлейӕ куы ӕвӕрдта ӕврӕгътӕ, арф сӕрсӕфӕны — доны гуырӕнтӕ,

²⁹дӕттӕн сӕ бон ахизын кӕй сӕрты нӕ уыд, денджызӕн ахӕм арӕн куы скодта, зӕххӕн бындуртӕ куы ӕвӕрдта,

³⁰уӕд ӕз Йӕ разы нывгӕнӕг уыдтӕн, ӕрвылбоны цин Ын фестадтӕн. Ӕз цин кодтон ӕдзухдӕр Йӕ разы,

³¹цин кодтон Йӕ зӕххон дунейыл, адӕмыл.

³²Уӕдӕ мӕм байхъусут, сабитӕ: мӕ фӕндӕгтӕ чи хъахъхъӕны, уыдон тӕхудиаг сты!

³³Мӕ зондамындмӕ мын байхъусут ӕмӕ куырыхон суыдзыстут, уӕхи йыл ма атигъ кӕнут.

³⁴Чи мӕм хъусы, ӕхсӕвӕй-бонӕй мӕ къӕсӕрӕй чи нӕ хизы, мӕ дуарӕй мын йӕ цӕст чи нӕ исы, уый тӕхудиаг у!

³⁵Чи мӕ ссардта, уый схайджын ис цардӕй ӕмӕ Дунедарӕджы хорзӕх айсдзӕни.

³⁶Мӕ ныхмӕ чи сысты, уый та йӕхӕдӕг йӕхи сафы, ӕнӕуынон кӕмӕн дӕн, уыдон уарзынц мӕлӕт».