Read Библи: Сыгъдӕг Екклесиаст 10 Bible Online

Екклесиаст 10 - Библи: Сыгъдӕг bible

Екклесиаст 10

¹Мард бындзытӕй хӕрздӕфгӕнӕн дӕр сысмаг вӕййы; кадджын ӕмӕ куырыхон лӕг иу чысыл куы фӕрӕдийы, уӕд йӕ куырыхон зонд дӕр ӕмӕ йӕ кад дӕр ӕнӕпайда фӕвӕййынц.

²Куырыхоны зӕрдӕ раст фӕндаг равзарыныл архайы, зондцух цӕуы галиу фӕндӕгтыл.

³Зондцух фӕндагыл куы фӕцӕйцӕуы ӕмӕ йын алы хъуыддаджы дӕр зонд фаг куы нӕ фӕкӕны, уӕд алкӕмӕн дӕр йе ’дылыдзинад раргом вӕййы.

⁴Дӕ паддзах дӕм куы смӕсты уа, уӕд дӕ куыстӕй ма алидз; сӕрныллӕгӕн бирӕ рӕдыдтӕ ныххатыр кӕнынц.

⁵Барджынтӕ цы хъуыддӕгтӕ кӕнынц, уыдонӕй мӕм иу тынг ӕвзӕр фӕкаст:

⁶ӕдылыйы бӕрзонд сисынц, хъӕздыджы та ӕгады бынаты сӕвӕрынц;

⁷цагъар уӕлбӕхӕй кӕсы, ӕлдар та фистӕгӕй цӕуы.

⁸Дзыхъхъ чи къахы, уый дзы, гӕнӕн ис, йӕхӕдӕг дӕр аирвӕза; зӕронд къултӕ чи пырх кӕны, ууыл, чи зоны, калм фӕхӕца.

⁹Дуркӕрдӕг, гӕнӕн ис ӕмӕ, дур кӕрдгӕйӕ, исты знаггад ракӕна йӕхицӕн дуртӕй; хъӕддзауыл, бӕлӕстӕ калгӕйӕ, чи зоны, исты фыдбылыз ӕрцӕуа.

¹⁰Кӕд дӕ фӕрӕт ныкъкъуымых ис, уӕд дӕ фылдӕр тых бахъӕудзӕн, цӕмӕй дӕ куыст кӕронмӕ фӕуай. Цӕмӕй дӕ куыстӕн исты фӕстиуӕг разына, уый тыххӕй куырыхон зонд хъӕуы.

¹¹Калмӕн фӕхӕцыны бар куы радтай, уӕд, кӕлмытӕн кӕлӕнтӕ кӕнынмӕ цыфӕнды дӕсны куы уай, уӕд дӕр дзы пайда нал уыдзӕн.

¹²Куырыхоны ныхас фарн хӕссы, ӕдылыйы йе ’взаг сафгӕ кӕны.

¹³Зондцухӕн йӕ ныхасы райдиан — ӕдылы ныхӕстӕ, йӕ ныхасы кӕрон — фыдбылыз хӕссӕг ӕррадзинад.

¹⁴Ӕдылы дзурын бирӕ фӕуарзы. Адӕймаг нӕ зоны йӕ фидӕн, стӕй, йӕ фӕстӕ цы уыдзӕнис, уый дӕр. Чи йын ӕй радзура?

¹⁵Ӕдылы куыстӕй фӕллайгӕ кӕны, суанг, сахармӕ цы фӕндаг цӕуы, уый дӕр нал фӕуыны.

¹⁶Додойаг у, йӕ паддзах ӕвӕлтӕрд лӕппу кӕмӕн у, йӕ уӕздӕттӕ ӕхсӕвӕй бонмӕ куывдты кӕм бадынц, уыцы бӕстӕ.

¹⁷Амондджын у уыцы бӕстӕ, йӕ паддзах уӕздан мыггагӕй кӕмӕн у, йӕ барджынтӕ фынгтыл ӕрмӕст фӕхъуыртхъом уӕвынмӕ кӕм ӕрбадынц, сӕ рӕстӕг расыгӕй кӕм не ’рвитынц.

¹⁸Магусайӕн йӕ хӕдзары цар ӕркӕлы, зивӕггӕнагӕн къӕвда бон йӕ царӕй дон мизы.

¹⁹Куывд — ирхӕфсынӕн, сӕн — хъӕлдзӕг цардӕн, фӕлӕ сӕ дыууӕйыл дӕр ӕхца хардз кӕнын зонын хъӕуы.

²⁰Дӕхинымӕр дӕр паддзахы фыдгой ма ракӕн, дӕ хуыссӕнуаты дӕр ма рафау хъӕздыг лӕджы — уӕларвон мӕргътӕ дын дӕ хъуыдытӕ аскъӕфдзысты, дӕ ныхӕстӕй иунӕг дӕр нӕ басусӕг уыдзӕн.