Read Библи: Сыгъдӕг Екклесиаст 4 Bible Online

Екклесиаст 4 - Библи: Сыгъдӕг bible

Екклесиаст 4

¹Ӕз федтон, ӕфхӕрд адӕм куыд кӕуынц, уый, ничи сын ӕххуыс кӕны, уымӕн ӕмӕ се ’фхӕрджытӕ тыхджын сты.

²Ӕмӕ уӕд мӕрдты удӕгӕстӕй амондджындӕр схуыдтон.

³Сӕ дыууӕтӕй хуыздӕр раны та ис, чи нӕма райгуырд ӕмӕ, арвы бын цы фыдбылызтӕ цӕуы, уый чи нӕма базыдта.

⁴Ноджы ма федтон: адӕм кусынц ӕмӕ истӕуыл архайынц, кӕрӕдзимӕ хӕлӕг кӕй кӕнынц, уымӕн. Фӕлӕ уыдӕттӕ дӕр аивгъуыйынц, дымгӕ ’рцахсыныл куы архайай, уымӕй уӕлдай не сты!

⁵Афтӕ фӕзӕгъынц: «Ӕдылы магуса у ӕмӕ сыдӕй мӕлдзӕнис».

⁶Фӕлтау дӕм армыдзаг исты уӕд ӕмӕ ӕнӕмастӕй цӕр, дыууӕ армыдзаджы тыххӕй амал кӕныны ӕмӕ дымгӕйы фӕдыл зилыны бӕсты!

⁷Ноджы ма иу ӕнӕпайда ӕмӕ, чи аивгъуыйы, ахӕм хъуыддаг федтон зӕххыл:

⁸кӕмӕндӕр нӕ — ӕрдхорд, нӕ — ӕмбал, нӕ йын — фырт, нӕ — ӕфсымӕр, афтӕмӕй ӕхсӕвӕй-бонӕй ӕвӕлмӕцгӕйӕ кусы, фӕлӕ ӕфтиаджы фыдӕй, кӕм ӕрлӕууа, уый нӕ зоны. Цӕмӕн ӕмӕ кӕмӕн кусы, уый бӕрӕг нӕй. Уый дӕр та аивгъуыйы, стыр бӕллӕх у уый дӕр!

⁹Ӕмбалимӕ цӕрын хуыздӕр у, дыууӕ лӕджы куыстӕн мызд хуыздӕр фидынц.

¹⁰Иу дзы куы ахауа, уӕд ӕй иннӕ сыстын кӕндзӕн. Фӕлӕ иунӕг куы фӕкӕла, уӕд ма йыл чи схӕцдзӕнис?

¹¹Хуыссӕны дӕр дыууӕйӕ хъармдӕр у, иунӕджы та чи схъарм кӕна?

¹²Знаджы ныхмӕ дӕр дыууӕйӕ хӕцын ӕнцондӕр у, иунӕгыл та йе знӕгтӕ уӕлахиз кӕнынц; бӕндӕн ӕртӕ ӕндахӕй быд куы уа, уӕд тагъд нӕ аскъуындзӕн.

¹³Мӕгуыр ӕмӕ зондджын лӕппу, уынаффӕтӕм чи нӕ хъусы, ахӕм ӕдылы ӕмӕ зӕронд паддзахӕй хуыздӕр у.

¹⁴Зондджын мӕгуыр лӕг суанг ахӕстонӕй дӕр рухсмӕ рацӕуы ӕмӕ паддзахы бынат бацахсы.

¹⁵Ӕз кастӕн ӕмӕ, ног ӕвзонг паддзахы заман цы адӕм цӕрдзысты, уыдоныл сагъӕс кодтон.

¹⁶Лӕггад ын чи кӕндзӕн, уыцы адӕм змисӕй фылдӕр уыдзысты, фӕлӕ йын сӕ байзӕддӕгтӕ аргъ нӕ кӕндзысты. Ӕмӕ та уыдӕттӕ дӕр аивгъуыйдзысты, уыдон дӕр, дымгӕ ’рцахсыныл куы архайай, уымӕй уӕлдай не сты!

¹⁷Хуыцауы хӕдзармӕ цӕугӕйӕ, дӕхимӕ лӕмбынӕг кӕс. Хӕстӕг ӕрбалӕуу ӕмӕ байхъус, ӕдылытӕ цы нывӕндтӕ хӕссынц, уымӕй уый хуыздӕр у. Нывӕндтӕ чи хӕссы, уыцы ӕдылытӕ се ’взӕр митӕ нӕ фӕуынынц.