Read Библи: Сыгъдӕг Екклесиаст 5 Bible Online

Екклесиаст 5 - Библи: Сыгъдӕг bible

Екклесиаст 5

¹Дӕ ныхасы размӕ уал хорз ахъуыды кӕн, Хуыцауы раз ард бахӕрынмӕ тагъд ма кӕн: Хуыцау уӕларвыл ис, ды та — зӕххыл, дӕ алы ныхас дӕр сасирӕй балуар.

²Лӕг бирӕ цӕуылдӕрты куы фӕтыхсы, уӕд фынтӕ фӕуыны, афтӕ ӕдылы дӕр йӕ бирӕдзурагӕй бӕрӕг дары.

³Хуыцауы раз дзырд куы раттай, уӕд ӕй ӕвӕстиатӕй сӕххӕст кӕн. Хуыцау ӕдылытыл нӕ ауды, лӕг хъуамӕ йӕ ныхасӕн хицау уа.

⁴Дӕ ныхас нӕ сӕххӕст кӕныны бӕсты, фӕлтау дӕ дзыхӕй хъыпп-сыпп ма суадз;

⁵де ’взаджы тыххӕй тӕригъӕды куы бахауай, уӕд Хуыцауы минӕвары раз дӕхи ма раст кӕн. Дзырд радтон, фӕлӕ уымӕй фӕрӕдыдтӕн, зӕгъгӕ, ма мӕсты кӕн Хуыцауы, науӕд дын дӕ хъуыддаг фехалдзӕн.

⁶Бирӕ сӕнттӕй, уддзӕфау цы хъуыддӕгтӕ фӕцыдӕр вӕййынц, уыдонӕй бирӕ ныхӕстӕ райгуыры, фӕлӕ ды тӕрс Хуыцауӕй!

⁷Кӕцыфӕнды бӕстӕйы дӕр мӕгуыр лӕджы ’фхӕрдӕн, рӕстдзинад ӕмӕ раст тӕрхон ссӕст кӕй цӕуынц, уымӕн ӕвдисӕн куы суай, уӕд-иу ма бадис кӕн. Алы хицауӕн дӕр ис уӕлдӕр хицау, сӕ дыууӕйы сӕрмӕ та — ноджы стырдӕр.

⁸Бӕстӕйӕн йӕ хуыздӕр ӕфтиаг — чи йыл ауды, уыцы паддзах.

⁹Ӕхца чи уарзы, уымӕн фаг никуы уыдзысты, хъӕздыгдзинадмӕ чи бӕллы, уымӕн йӕ зыд зӕрдӕ нӕ бафсӕддзӕн. Уыдӕттӕ дӕр аивгъуыйдзысты!

¹⁰Бирӕ мулк дӕм куы уа, уӕд дӕ алыварс, чи дын ӕй хӕра, ахӕмтӕ бирӕ фӕзындзӕн. Цы пайда ис хъӕздыг лӕгӕн йӕ мулкӕй? Дӕ исбон цас фылдӕр кӕна, уыйас фӕлхасгӕнджытӕ фылдӕрӕй фылдӕр кӕндзысты.

¹¹Кусӕг лӕг чысыл бахӕра ӕви бирӕ — алкӕддӕр адджын фынтӕ уыны, хъӕздыгӕн та фыр ӕфсӕстӕй йӕ хуыссӕг фӕлидзы.

¹²Иу ӕнамонд хъуыддаг бафиппайдтон зӕххыл: хъӕздыг йӕ мулк йӕхи фыдбылызӕн фембырд кӕны,

¹³фӕлӕ йӕ хъуыддӕгты ӕнтыстджын нал вӕййы, йӕ мулк ӕрбайсӕфы, ӕмӕ йӕ фыртӕн бынтӕ нӕ ныууадзы.

¹⁴Мады гуыбынӕй бӕгънӕгӕй рацыд, ӕмӕ дунейӕ дӕр афтӕмӕй ацӕуы, йӕ исбонӕй йемӕ ницы ахӕссы.

¹⁵Уый стыр бӕллӕх у — гуыргӕ куыд ракӕны, мӕлгӕ дӕр афтӕ. Уӕд ма дзӕгъӕлы цӕуыл фӕтухӕн кӕны, йӕ тухӕнтӕ йын дымгӕ куы ныффӕйлауы?

¹⁶Цӕрӕнбонты хӕры талынджы, бирӕ хӕрамдзинад, рыст ӕмӕ зӕрдӕхудтытӕ бавзары.

¹⁷Хуыцау нын цӕрынӕн цы цыбыр ӕмгъуыд ратты, уымӕй куыд хуыздӕр спайда чындӕуа? Уӕдӕмӕ хӕр, нуаз ӕмӕ дӕ къухты фӕллойыл цин кӕн. Уый адӕймагӕн йӕ нывысконд у.

¹⁸Хуыцау искӕмӕн хъӕздыгдзинад куы ратты, йӕ къухвӕллойыл йӕ бар куы фӕцӕуы ӕмӕ йӕ зӕрдӕ цинӕй дзаг куы вӕййы, уӕд зӕгъӕн ис, ӕмӕ йын Хуыцау стыр лӕвар ракодта.

¹⁹Ахӕм адӕймаг йӕ ивгъуыдыл арӕх нӕ хъуыды кӕны, уымӕн ӕмӕ йын Хуыцау йӕ зӕрдӕ цинӕй байдзаг кодта.