Read Библи: Сыгъдӕг Екклесиаст 7 Bible Online

Екклесиаст 7 - Библи: Сыгъдӕг bible

Екклесиаст 7

¹Кад хӕрздӕфгӕнӕнӕй хуыздӕр у, мӕлӕты бон та — райгуырӕн бонӕй.

²Цинтӕм цӕуынӕй мӕстджын хӕдзармӕ цӕуын хуыздӕр у, уымӕн ӕмӕ алкӕмӕ дӕр иу кӕрон ӕнхъӕлмӕ кӕсы, уадз ӕмӕ йӕ рох мачи кӕна.

³Куырыхонтӕ, хъыг кӕм кӕнынц, уырдӕм цӕуын хуыздӕрыл нымайынц, ӕдылытӕ цинтӕм цӕуын уарзынц.

⁴Зондджын сагъӕс арӕх кӕны, ӕдылыйӕн йӕ худын нӕ фенцайы.

⁵Ӕдылыйы зарджыты бӕсты куырыхоны уайдзӕфтӕм хъус.

⁶Ӕдылыйы худт, какон сындз аджы бын судзгӕйӕ куыд къӕс-къӕс кӕны, уымӕй уӕлдай нӕу. Уый дӕр тагъд аивгъуыйы!

⁷Искӕй ӕфхӕргӕйӕ, зондджын дӕр сӕдылы вӕййы; гӕртӕмттӕ лӕгӕн йӕ зонд сафынц.

⁸Хъуыддагӕн йӕ кӕрон йӕ райдианӕй хуыздӕр у; сӕрыстыры бӕсты фӕразон у.

⁹Мӕстыгӕр ма у, йӕ маст ӕдзух йӕ зӕрдӕйы ӕдылы хӕссы.

¹⁰Ивгъуыды цард хуыздӕр цӕмӕн уыди, зӕгъгӕ, макуы фӕрс, уый зондджын лӕджы фарст нӕу.

¹¹Удӕгас лӕгӕн йӕ бынтӕй куыд пайда ис, афтӕ йӕ зондӕй дӕр.

¹²Куырыхондзинад лӕджы ӕхцайау хорз хъахъхъӕны, фӕлӕ зонд хуыздӕр у, куырыхонтӕ удӕгасӕй баззайынц.

¹³Акӕс-ма Хуыцауы хъуыддӕгтӕм: Хуыцау цы ныззылын кодта, уый чи сраст кӕндзӕн?

¹⁴Ӕнӕмаст куы уай, уӕд цин кӕн, фыдбылызтӕ куы ’взарай, уӕд ахъуыды кӕн: сӕ иу дӕр ӕмӕ иннӕ дӕр Хуыцау уый тыххӕй радта, цӕмӕй адӕймаг, йӕ фӕстӕ цы уыдзӕн, уый ма зона.

¹⁵Мӕ цыбыр царды алцыдӕр федтон: рӕстуд ӕвзӕрӕй ницы ракӕны, афтӕмӕй йӕ мӕлӕт ссары, тӕригъӕдджын та ’взӕр митӕ кӕны, афтӕмӕй йӕм бирӕ рӕстӕг мӕлӕт ӕввахс нӕ цӕуы.

¹⁶Рӕстӕй цӕрыныл, дӕ алы хъуыддаджы дӕр зондджын уӕвыныл ӕгӕр тынг ма архай, науӕд фесӕфдзынӕ.

¹⁷Фӕлӕ ӕвзӕр митӕ дӕр ӕгӕр бирӕ ма кӕн, ӕдылыты ма фӕзм — афонӕй раздӕр мӕрдтӕм цӕмӕн тагъд кӕныс?

¹⁸Фӕндаджы астӕуыл хӕц — Хуыцауӕн кад чи кӕны, уый йӕхи алцӕмӕй дӕр бахиздзӕн.

¹⁹Куырыхон йӕ зонды фӕрцы сахары дӕс хицауӕй тыхджындӕр у.

²⁰Ӕрмӕстдӕр хорздзинӕдтӕ чи кӕны, тӕригъӕд ӕппындӕр чи никуы ракодта, ахӕм рӕстуд нӕй зӕххыл.

²¹Алы ныхас дӕ зӕрдӕмӕ ма ис — мыййаг, дӕ лӕггадгӕнӕджы дӕ фыдгой кӕнгӕйӕ куы баййафай.

²²Зоныс ӕй, дӕхӕдӕг дӕр искӕй ӕвзӕры кой арӕх кодтай.

²³Уыдӕттӕ ӕз иууылдӕр мӕ зонды руаджы бафӕлвӕрдтон. Загътон мӕхицӕн: «Куырыхон зондмӕ куы сӕххӕссин!» Фӕлӕ йӕм мӕ бон сӕххӕссын нӕ уыди.

²⁴Цы уыди, уыдон тынг дард сты, дард ӕмӕ арф! Цы нысан кӕнынц, уый чи базондзӕн?

²⁵Мӕ зонды фӕрцы архайдтон басгарын: зӕххыл цытӕ цӕуы, уыдон цавӕр барӕнтӕй ис абарӕн, ӕдылыдзинад цас ӕвзӕр у, ӕррадзинад цӕйбӕрц у ӕнӕзонд.

²⁶Ӕз бамбӕрстон: мӕлӕтӕй фыддӕр — къӕппӕджы ’нгӕс сылгоймӕгтӕ; сӕ зӕрдӕтӕ — ахсӕн хызтӕ, сӕ къухтӕ — хъадамантӕ. Хуыцауы раз раст адӕймаг чи у, уый ахӕм сылгоймагӕй аирвӕздзӕн, тӕригъӕдджын йӕ ахсӕн хызы бахаудзӕн.

²⁷Мӕнӕ цы базыдтон, зӕгъы Хуыцауы ныхас амонӕг, иу иннӕмӕ ’фтаугӕйӕ, ахӕм нымӕц ссардтон:

²⁸бирӕ фӕцагуырдтон, стӕй агургӕ дӕр кӕнын, фӕлӕ иу сылгоймагыл никуы фӕхӕст дӕн, мины ’хсӕн иу лӕджы ссардтон.

²⁹Иу хъуыддаг бамбӕрстон: Хуыцау адӕймаджы хуымӕтӕгӕй сфӕлдыста, фӕлӕ адӕм алцыдӕр райдыдтой сӕхи барӕнтӕй барын.