Read Библи: Сыгъдӕг Екклесиаст 9 Bible Online

Екклесиаст 9 - Библи: Сыгъдӕг bible

Екклесиаст 9

¹Ӕз архайдтон бамбарын ӕмӕ басгарын: рӕстудтӕ ӕмӕ куырыхонтӕ сӕхӕдӕг дӕр ӕмӕ сӕ хъуыддӕгтӕ дӕр сты Хуыцауы къухы; адӕймаг нӕ фӕзоны, уарзт ӕви йӕм фыдӕх ӕнхъӕлмӕ кӕсы, уый.

²Алкӕуыл дӕр алцыдӕр ӕрцӕуы: рӕстуд ӕмӕ тӕригъӕдджыныл; сыгъдӕг ӕмӕ, чи фӕчъизи ис, ууыл; нывӕндтӕ чи хӕссы ӕмӕ сӕ чи нӕ хӕссы, уыдоныл; сомыгӕнджытыл ӕмӕ, сомы кӕнынӕй чи тӕрсы, уыдоныл.

³Дунейы алцы кӕуылфӕнды дӕр ӕрцӕуы. Удӕгас адӕймаг хӕрамӕй йедзагӕй ӕмӕ зондцухӕй фӕцӕры, уый фӕстӕ мӕрдтыл бафты.

⁴Фӕлӕ удӕгӕстӕн ис зӕрдӕдарӕн: удӕгас куыдз мард домбайӕ хуыздӕр у!

⁵Удӕгӕстӕ, кӕй амӕлдзысты, уый зонынц, мӕрдтӕ та ницы зонынц. Лӕг йӕ куыстӕй цы хӕрзиуӕгмӕ ӕнхъӕлмӕ кӕсы, ахӕмӕй ницыуал райсдзысты, уымӕн ӕмӕ ферох сты.

⁶Сӕ уарзт, сӕ фыдӕх ӕмӕ сӕ монцтӕ фӕцыдӕр сты, зӕххон цӕрджытимӕ сын ӕнусмӕ иумӕйагӕй ницыуал ис.

⁷Уӕдӕ хъӕлдзӕгӕй дӕ хойраг хӕр ӕмӕ цингӕнгӕйӕ сӕн нуаз, уымӕн ӕмӕ уый Хуыцауӕн ӕхсызгон у.

⁸Райдзаст дарӕсты цу, дӕ сӕрмӕ-иу сойӕ базил.

⁹Дӕ цард цыбыр у, ӕмӕ дӕ уарзон усимӕ амондджынӕй цӕр; бонтӕ тагъд фӕуынц, алы боныл дӕр цин кӕн — ацы дунейы уый у дӕ хай ӕмӕ дӕ куысты хӕрзиуӕг.

¹⁰Дӕ бон цыдӕриддӕр у, уый кӕн, уымӕн ӕмӕ мӕрдтыбӕстӕм куы ацӕуай, уӕд дын уым кусын, хъуыды кӕнын ӕмӕ куырыхон уӕвынӕн фадат нӕ уыдзӕн.

¹¹Ноджы ма иу хъуыддаг федтон зӕххыл: тагъд чи згъоры, уый дугъы уӕлахиз нӕ кӕны; хӕсты, тыхджын чи у, уый нӕ рамбулы; куырыхонтӕм хойраг нӕй, зонджынтӕм — мулк; курдиат кӕмӕ ис, уымӕн аргъ ничи кӕны. Алкӕмӕн дӕр ис йӕхи рӕстӕг ӕмӕ хуыздӕр фадат.

¹²Адӕймаг, йӕ царды ӕвзӕр рӕстӕг кӕд ӕрцӕудзӕнис, уый нӕ фӕзоны. Кӕсаг ахсӕн хызы куыд бахауы, маргъ — къӕппӕджы, афтӕ адӕймаджы ӕвиппайды къӕппӕгмӕ басайынц, ӕмӕ йыл фыдбылыз ӕрцӕуы.

¹³Куырыхон зонды иу дӕнцӕг ма федтон зӕххыл, тынг ахсджиаг у, мӕнмӕ гӕсгӕ.

¹⁴Иу сахары царди чысыл адӕм. Иу тыхджын паддзах сахармӕ ’рбабырста ӕмӕ йӕ алыварс ӕрхъула кодта.

¹⁵Сахары иу мӕгуыр, фӕлӕ куырыхон лӕг разынд ӕмӕ йӕ куырыхон зонды фӕрцы сахар фервӕзын кодта, фӕлӕ йӕ уый фӕстӕ сахары хъуыдыгӕнӕг нӕ уыди.

¹⁶Ӕмӕ загътон: куырыхондзинад хъаруйӕ хуыздӕр у, фӕлӕ мӕгуыр лӕджы куырыхон зонд нымады дӕр никӕмӕ у, йӕ ныхӕстӕм ын ничи хъусы.

¹⁷Куырыхон лӕджы сабыр ныхасмӕ хъусын, хицау ӕдылыты ’хсӕн куыд хъӕр кӕны, уымӕ хъусынӕй хуыздӕр у.

¹⁸Куырыхондзинад цыфӕнды хӕцӕнгарзӕй дӕр хуыздӕр у, фӕлӕ иу лӕджы рӕдыд бирӕ хӕрзтӕ фесафы.