Read Библи: Сыгъдӕг Зарджыты зарӕг 7 Bible Online

Зарджыты зарӕг 7 - Библи: Сыгъдӕг bible

Зарджыты зарӕг 7

¹— О, раздӕх-ма, раздӕх, Суламитӕ! Раздӕх-ма, ӕмӕ дӕм бакӕсӕм! — Цӕмӕн кӕсут Суламитӕмӕ, раст цыма маханаимаг кафт кӕны, уыйау?

²О номджын мыггаджы чызг! Куыд рӕсугъд сты къахыдарӕсы дӕ къӕхтӕ! Фӕрдгуыты ’нгӕс — дӕ синтӕ, дӕсны нывгӕрдӕг сӕ сфӕлдыста!

³Дӕ бикъ — тымбыл кӕхцы ӕнгӕс, хӕрздӕф сӕн ӕвидигӕ у йӕ мидӕг; мӕнӕугӕрдӕджы дидинбаст — дӕ гуыбын, кӕркусӕгтӕ йӕ алыварс.

⁴Дӕ риутӕ — саджы дыууӕ лӕппыны, сычъийы фаззӕттӕ.

⁵Дӕ хъуыр — пылыстӕгӕй конд мӕсыгау. Баш-Раббимы кулдуары цур — Хешбоны донуӕттӕ, уыдоны ’нгӕс — дӕ цӕстытӕ. Цыма ливайнаг мӕсыг Дамаскы ’рдӕм кӕсы, уый ӕнгӕс — дӕ фындз.

⁶Дӕ сӕр — Кармелы хох, дӕ сӕрыхъуынтӕ — сӕнт сырх, дӕ къӕбӕлдзыг дзыккутӕ фӕсырдтой йе ’нцой паддзахӕн.

⁷Цӕй рӕсугъд дӕ, мӕ уарзон, дӕ хӕрзаивӕй зӕрдӕйӕн цӕй адджын дӕ!

⁸Дӕ гуыр хӕрзконд у пальмӕйау, дӕ риутӕ — сӕнӕфсиры цупӕлттӕ.

⁹Ӕз ахъуыды кодтон: схиздзынӕн пальмӕмӕ, баныхӕсдзынӕн йӕ къалиутыл, дӕ риутӕ мын сӕнӕфсиры цупӕлттӕ фестдзысты, дӕ улӕфт та — фӕткъуыты хӕрздӕф,

¹⁰дӕ былты хӕрздӕф нуаздзынӕн сӕнау. — Уадз ацы сӕн мӕ былтӕй мӕ уарзонӕн йӕ комы ахъара!

¹¹Ӕз мӕ уарзоны дӕн, уый мӕнмӕ бӕллы.

¹²Цом, мӕ уарзон, быдырмӕ дӕ хонын, не ’хсӕв хъӕуты арвитдзыстӕм,

¹³боныцъӕхтыл сӕндонмӕ ацӕудзыстӕм ӕмӕ фендзыстӕм, фӕкъуыбар ис сӕнӕфсир ӕви нӕ, мыййаг, кӕд дидин ракалдта гранат, — мӕ рӕвдыдӕй дӕ бафсаддзынӕн уым.

¹⁴Мандрагорты хӕрздӕф хъары уӕлдӕфы, нӕ къӕсӕры раз — алыхуызон диссаджы дыргътӕ, зӕрӕдтӕ ӕмӕ ногтӕ. Дӕуӕн сӕ бавӕрдтон, мӕ уарзон!