Read Библи: Сыгъдӕг Зарджыты зарӕг 8 Bible Online

Зарджыты зарӕг 8 - Библи: Сыгъдӕг bible

Зарджыты зарӕг 8

¹— Ехх, ме ’фсымӕр куы фестис, мӕ ныййарӕг мад дӕ йӕ риуӕй куы схастаид! Уӕд дын, уынджы фембӕлгӕйӕ, батӕ кӕнин, ӕмӕ мыл ничи фӕхудид.

²Ӕрбакӕнин дӕ мӕ ныййарӕг мады, мӕ хъомылгӕнӕджы, хӕдзармӕ. Бафсадин дӕ, хъацӕнтӕ цы сӕныл конд ис, уымӕй, мӕ гранаты донӕй.

³Йӕ галиу къух мын бакодта мӕ сӕры бын, рахизӕй мӕ ’рбатыхта йӕ хъӕбысы.

⁴О, Йерусалимы чызджытӕ, расомы кӕнут: ма райхъал кӕнут, ма фӕхъыгдарут уарзт, цалынмӕ йӕхи бафӕнда, уӕдмӕ!

⁵— Чи у уый, ӕдзӕрӕг быдырӕй чи ссӕуы, йӕ къух йӕ уарзоны дӕлармы бакодта, афтӕмӕй? — Фӕткъуы бӕласы бын дӕ райхъал кодтон — уым равзӕрди дӕ гуырдз, уым рантыстӕ дӕ ныййарӕг мадӕн.

⁶О, макуы мӕ фӕхицӕн кӕн дӕ зӕрдӕйӕ, о, де ’нгуылдзыл мӕ къухдарӕнау бакӕн! Уымӕн ӕмӕ уарзондзинад тыхджын у мӕлӕтау, мӕрдтыбӕстау ӕгъатыр у зӕрдӕхсайд, йӕ фӕттӕ пиллон артау судзынц!

⁷Уарзондзинад денджызы бын дӕр нӕ ахуысдзӕн, цӕугӕдӕтты бын нӕ фӕдӕлдон уыдзӕн. Йӕ хӕдзары ӕппӕт хӕзнатӕ уарзондзинадыл чи ива, ууыл ӕрмӕст фӕхуддзысты.

⁸— Нӕ хо чысыл у нырма, риуы хъӕр ыл нӕма ис, курӕг ӕй куы фӕуа, уӕд цы кӕндзыстӕм?

⁹Кӕд сис у, уӕд ыл самайдзыстӕм ӕвзист галуантӕ; кӕд дуар у, уӕд ӕй сӕхгӕндзыстӕм нӕзы фӕйнӕджытӕй.

¹⁰— О, сис дӕн ӕз, мӕ риутӕ та — мӕсгуытӕ, йӕ хорзӕхы аккаг мӕ уымӕн скодта!

¹¹— Соломонӕн Баал-Хамоны — сӕндон, хъахъхъӕнджыты бӕрны йӕ бакодта. Уыдонӕй йын алчидӕр йӕ дыргътӕн хъуамӕ фида мин ӕвзист шекелы.

¹²Мӕнӕн мӕ сӕндон у мӕхи бар! Мин ӕвзист шекелы дӕу фӕуӕд, Соломон, фӕйнӕ дыууӕсӕдӕ шекелы та — дӕ сӕндондартӕн!

¹³— О дыргъдӕтты цӕрӕг! Дӕ хъӕлӕсмӕ дын хъусынц де ’мбӕлттӕ, фехъусын ӕй кӕн мӕнӕн дӕр!

¹⁴— О, лидзгӕ кӕн, мӕ уарзон! Хӕрздӕфгӕнаг кӕрдӕджытӕ цы хӕхтыл зайынц, уыдоны сӕрты саг кӕнӕ сычъийау азгъор!