Read Библи: Сыгъдӕг Исайа 10 Bible Online

Исайа 10 - Библи: Сыгъдӕг bible

Исайа 10

¹Додой сӕ къона, галиу ӕгъдӕуттӕ чи сфидар кӕны, фыдбылызы уынаффӕтӕ чи хӕссы,

²цӕмӕй Мӕ адӕмы мӕгуыртӕн ӕмӕ ӕнӕбонтӕн раст тӕрхон ма кӕной, сӕ бартӕ сын ссӕндой, идӕдз устыты, сидзӕр сабиты стигъой.

³Тӕрхоны бон куы ралӕууа, дардӕй уӕм фыдбылыз куы фӕзына, уӕд чердӕм цы кӕндзыстут, ӕххуысагур кӕмӕ лидздзыстут? Кӕм бафснайдзыстут уӕ бирӕ исбон?

⁴Уацайрӕгтимӕ уӕ уӕрджытыл ӕрлӕудзыстут, йе та мӕлӕты амӕттаг бауыдзыстут. Фӕлӕ ууыл дӕр Йӕ маст нӕма ссӕудзӕн, Йӕ къух нӕма ӕруадздзӕни дӕлӕмӕ.

⁵Сар сӕ сӕр кӕны ассириӕгтӕн — Мӕ масты лӕдзӕг ӕмӕ Мӕ азары ехсӕн!

⁶Ассириӕгты арвитдзынӕн ӕнӕхуыцау адӕмы, Мӕ маст кӕмӕ ссыгъди, уыдоны ныхмӕ — уадз ӕмӕ сӕ бастигъой, сафтид сӕ кӕной, уынгты рыгау сӕ бассӕндой.

⁷Фӕлӕ Ассирийы паддзахӕн ууыл нӕу йӕ мӕт, йӕ сагъӕс. Йӕ зӕрды ис бирӕ адӕмты бабын кӕнын.

⁸Уый зӕгъы: «Паддзӕхтӕ иууылдӕр мӕ лӕггадгӕнджытӕ не сты, мыййаг?

⁹Кално дӕр ӕмӕ Каркемиш дӕр, Хамат дӕр ӕмӕ Арпад дӕр, Самари дӕр ӕмӕ Дамаск дӕр.

¹⁰Мӕ бархъомыс ӕрӕвӕрдтон мӕнгхуыцӕуттӕм кувӕг паддзахӕдтыл. Уыдонмӕ цас гуымирытӕ уыд, уый бӕрц Йерусалим ӕмӕ Самарийы дӕр нӕ уыди.

¹¹Самари ӕмӕ йӕ гуымирыты куыд ныппырх кодтон, афтӕ бакӕндзынӕн Йерусалим ӕмӕ йӕ мӕнгхуыцӕуттӕн дӕр».

¹²Дунедарӕг Сионы хох ӕмӕ Йерусалимы ныхмӕ цы сфӕнд кодта, уый куы сӕххӕст кӕна, уӕд Ассирийы паддзахы бафхӕрдзӕн, сӕрбӕрзонд кӕй сси ӕмӕ иннӕтӕм ӕнӕввӕрсон цӕстӕй кӕсы, уый тыххӕй.

¹³Уымӕн ӕмӕ уый зӕгъы: «Мӕ хъомыс ӕмӕ мӕ зонды фӕрцы ӕз сарӕзтон ацы хъуыддӕгтӕ — ахӕм куырыхон дӕн, гъе! Бӕстӕтӕн фехалын сӕ арӕнтӕ, сӕ хӕзнадӕттӕ сын ныггаффутт кӕнын, сӕ паддзӕхты сын галау ныццӕвын ӕмӕ сӕ паддзахы бадӕнтӕй расхойын.

¹⁴Адӕмтӕн ратӕлӕт кодтон сӕ исбон, мӕргъты ахстӕттӕ сафтидгӕнӕгау; уагъд ӕйчытау ӕз ӕппӕт зӕххытӕ байстон, ӕмӕ мыл ничи йӕ базыр сцагъта, ничи йӕ дзых фӕхӕлиу кодта, ничи мыл цъиу-цъиу скодта».

¹⁵Фӕрӕт куыд хъуамӕ раппӕла йӕхицӕй, архайгӕ дзы чи кӕны, уый раз? Науӕд хырх сӕрбӕрзондӕй куыд хъуамӕ кӕса, хырхгӕ дзы чи кӕны, уымӕ? Лӕдзӕг, йӕ къухмӕ йӕ чи райсы, уыцы адӕймаджы ныттилдзӕни, мыййаг? Къобола лӕдзӕг, хъӕдӕй конд чи нӕу, уыцы цардуды хӕрдмӕ сисдзӕн?

¹⁶Уымӕ гӕсгӕ Дунедарӕг, Уӕларвӕфсады Бардарӕг, Ассирийы гуыппырсартӕн фесафдзӕни сӕ хъару, йӕ кад ын басудздзӕни артау.

¹⁷Стыр Хуыцау — Израилы Рухс — арт фестдзӕн ӕмӕ йын ӕмбойны бавзалы кӕндзӕн йӕ каконтӕ ӕмӕ йӕ сындзытӕ.

¹⁸Ныффӕйлаудзӕн ын йӕ диссаджы хъӕдтӕ ӕмӕ дыргъдӕттӕ бӕласӕй, къутӕрӕй. Афтӕмӕй Ассирийы бӕстӕ мӕлӕтдзаг рынчыны хал ахӕрдзӕн.

¹⁹Йӕ хъӕдты ма бӕлӕстӕ афтӕ чысыл баззайдзӕн, ӕмӕ сӕ суанг саби дӕр анымайдзӕн.

²⁰Ӕрцӕудзӕн ахӕм заман, ӕмӕ ма Йаковы хӕдзарвӕндагӕй, Израилы байзӕддӕгтӕй чи фервӕза, уыдон сӕ зӕрдӕ нал дардзысты, чи сӕ цагъта, уыцы ассириӕгтыл, фӕлӕ сӕ каст уыдзӕни Дунедарӕгмӕ, Израилы Уаз Хуыцаумӕ, иузӕрдион Ыл уыдзысты.

²¹Чи ма дзы фервӕза, уыдон раздӕхдзысты, Йаковы байзӕддӕгтӕ раздӕхдзысты хъомысджын Хуыцаумӕ.

²²Кӕд дӕ адӕм денджызы змисау ӕнӕнымӕц уыдысты, Израил, уӕддӕр сӕ фӕстӕмӕ раздӕхдзӕн ӕрмӕст чысыл къорд; се сӕфт рагацау нысангонд у, раст тӕрхон сӕ баййафдзӕн.

²³Дунедарӕг, Уӕларвӕфсады Бардарӕг, куыд снысан кодта, афтӕ ӕгас зӕххы дӕр баййафдзӕни Йӕ азар.

²⁴Уымӕ гӕсгӕ Дунедарӕг, Уӕларвӕфсады Бардарӕг, зӕгъы: «Мӕ адӕм, Сионы хохыл цӕрджытӕ! Ма тӕрсут ассириӕгтӕй, суанг уӕм лӕдзӕгӕй куы февзидой ӕмӕ уын кӕддӕр мысырӕгтӕ куыд бакодтой, афтӕ уӕм къобола лӕдзӕг куы сисой, уӕд дӕр.

²⁵Чысыл ма, хӕрз чысыл ма, ӕмӕ уӕм Мӕ маст ссӕудзӕн, ӕмӕ уӕд ассириӕгты Мӕ азары амӕттаг бакӕндзынӕн».

²⁶Уӕларвӕфсады Бардарӕг сӕм галтӕрӕн ехсӕй февзиддзӕн ӕмӕ, кӕддӕр Сынты Къӕдзӕхы цур мидианӕгты куыд ныддӕрӕн кодта, афтӕ адоныл дӕр нӕ бацауӕрддзӕн. Денджызмӕ февзиддзӕни Йӕ лӕдзӕгӕй, кӕддӕр Мысырмӕ куыд февзыста, афтӕ.

²⁷Уӕд фыдгулы ӕфсондз де уӕхсчытӕй, дӕ бӕрзӕйӕ ист ӕрцӕудзӕни, ныппырх уыдзӕни де ’фсондз.

²⁸Ассириӕгтӕ бабырстой Гаййатмӕ, Мигроны уылты ацыдысты, Михмасы ныууагътой сӕ чырӕ,

²⁹афсӕрстой комы нарӕджы ӕмӕ зӕгъынц, Гевӕйы бахсӕвиуат кӕнӕм, зӕгъгӕ. Рамайы сахайрӕгтӕ ӕмризӕджы ризынц, Саулы сахар Гевӕйы адӕм та лидзӕг фесты.

³⁰Хъӕрахст кӕн, Галлимы сахар! Хъус ӕм, Лаеша! Бафӕзм ӕй, Анатот!

³¹Мадменайы адӕм лидзӕг фесты, Гевимы цӕрджытӕ дӕр сӕ сӕртӕ ӕфснайынц.

³²Фыдгул ма Новы сахары фӕуыдзӕнис иу бон. Уырдыгӕй ӕртхъирӕн кӕндзӕни Сионы хохмӕ, Йерусалимы бӕрзӕндмӕ.

³³Мӕнӕ Дунедарӕг, Уӕларвӕфсады Бардарӕг, Йӕ тасӕфтауӕг хъомысӕй бӕлӕсты къалиутӕ ныссӕтдзӕн! Бӕрзонд бӕлӕстӕ акӕлдзысты, бӕрзӕндтӕ ӕрфӕлдӕхдзысты.

³⁴Тархъӕды бӕлӕстӕ Уый цӕгъддзӕни ӕфсӕн фӕрӕтӕй, Ливаны ӕгӕндӕг хъӕд зӕххы ӕмвӕз суыдзӕни Хъомысджыны къухӕй.