Read Библи: Сыгъдӕг Исайа 14 Bible Online

Исайа 14 - Библи: Сыгъдӕг bible

Исайа 14

¹Йӕ кӕрон ӕрӕввахс, бирӕ рӕстӕг ын нал ис. Дунедарӕг фӕтӕригъӕд кӕндзӕн Йаковы байзӕддагӕн, ногӕй та равзардзӕн Израилы адӕмы, сӕ зӕхмӕ сӕ ӕрбаздахдзӕн. Ӕндӕрбӕстӕгтӕ сӕм ӕнгом балӕудзысты ӕмӕ баиу уыдзысты семӕ.

²Адӕмтӕ сӕ ӕркӕндзысты сӕ фыдыуӕзӕгмӕ ӕмӕ сын уым, Дунедарӕджы зӕххыл, нӕлгоймагӕй, сылгоймагӕй, цагъартӕ суыдзысты. Израилӕгтӕ уацары райсдзысты, кӕддӕр сын сӕхи уацары чи акодта, уыцы адӕмты ӕмӕ ӕлдариуӕг кӕндзысты сӕ кӕддӕры ӕфхӕрджытӕн.

³Дунедарӕг кӕрон куы скӕна уӕ цагъардзинадӕн, куы уӕ фервӕзын кӕна уӕ тас ӕмӕ уӕ хъыгӕй, уе ’фхӕрджытӕн цы уӕззау куыстытӕ кодтат, уыдонӕй,

⁴уӕд сымах уӕлахизы зарӕг ныззардзыстут, Вавилоны паддзахӕн фидис кӕнгӕйӕ: Не ’фхӕрӕг нал ис, не стигъӕг бабын ис!

⁵Дунедарӕг басаста ӕнӕхуыцӕутты хъомыс, барджын хицӕутты паддзахлӕдзӕг ныссаста;

⁶уый хъӕхъхъагӕй алы адӕмты цавта, иу цӕф сын иннӕйы фӕдыл кодта, ӕлдариуӕг сын кодта карзӕй, ӕфхӕрдта сӕ ӕгъатырӕй.

⁷Ныр зӕхх сулӕфыди иууылдӕр, цинӕй райы, йӕ цины хъӕр хъуысы!

⁸Кипаристӕ ӕмӕ ливайнаг кедртӕ цин кӕнынц ӕмӕ дзурынц дӕу тыххӕй: «Ды мӕрдвынӕй куы бадӕ, уӕдӕй фӕстӕмӕ нӕм ничиуал цӕуы цӕгъдынмӕ».

⁹Мӕрдтыбӕстӕ базмӕлыд, ӕнхъӕлмӕ кӕсы де ’рбацыдмӕ — уый райхъал кодта мӕрдты, зӕххон фӕтӕгты се ’ппӕты дӕр. Муртаттаг паддзӕхты растын кодта сӕ паддзахы бадӕнтӕй.

¹⁰Иууылдӕр дын дзурдзысты ныр, ды дӕр махау сӕнӕбон дӕ, мах хал ахордтай, зӕгъгӕ.

¹¹Мӕрдтыбӕстӕм ӕппӕрст ӕрцыди де схъӕлдзинад дыууадӕстӕнонты цагъдимӕ. Уаллӕттӕй дын — гобан, уаллӕттӕ — дӕ хъӕццул дӕр.

¹²Уӕ сӕууон стъалы, мӕнӕ куыд расхъиудтай арвӕй! Дӕ къӕхты бын адӕмы ссӕстай, ныр дӕхӕдӕг ныцъцъӕл ӕмӕ ныммур дӕ зӕххыл!

¹³Кӕддӕр дӕхимидӕг афтӕ куы дзырдтай: «Уӕларвмӕ ссӕудзынӕн, Хуыцауы рафӕлдыст стъалытӕй бӕрзонддӕр сисдзынӕн мӕ паддзахы бадӕн ӕмӕ уым, цӕгаты тигъыл, хуыцӕутты ’хсӕн ӕрбаддзынӕн хохыл;

¹⁴ӕврӕгъты онг ссӕудзынӕн ӕмӕ Бӕрзонд Хуыцауы ӕмсӕр суыдзынӕн».

¹⁵Фӕлӕ ды ӕппӕрст ӕрцыдтӕ мӕрдтыбӕстӕм, зындоны арфмӕ.

¹⁶Чи дӕ уыны, уыдон дӕм ӕдзынӕг кӕсынц ӕмӕ дыл дисӕй мӕлынц: «Ай, зӕхх кӕй азарӕй рызти, уый у, паддзахӕдтӕ-иу чи ныууыгъта,

¹⁷дуне-иу ӕдзӕрӕг быдыр чи фестын кодта, сахартӕ та — хӕлддзӕгтӕ, йӕ уацайрӕгтӕн сӕрибар чи нӕ лӕвӕрдта?»

¹⁸Алы адӕмты паддзӕхтӕ кад ӕмӕ цытимӕ хуыссынц, алчи — йӕхи зӕппадзы.

¹⁹Дӕу та ингӕны нӕ бавӕрдтой, аппӕрстой дӕ хус къалиуау. Мӕрдты ’хсӕн, карды амӕттаг чи баци, уыдоны астӕу хуыссыс; дурастӕрд ингӕны дӕ ныппӕрстой, сӕ къӕхтӕй дын дӕ мард ссӕндынц адӕм.

²⁰Тохы чи фӕмард, уыдонӕй хъауджыдӕр дӕу ингӕны нӕ бавӕрдзысты, уымӕн ӕмӕ бабын кодтай дӕ бӕстӕ ӕмӕ фӕцагътай дӕ адӕмы. Фыдгӕнӕджы байзӕддӕгтӕ макуы скӕнӕнт ном, рохуаты баззайӕнт мыггагмӕ.

²¹Ацы паддзахӕн хъуамӕ йӕ фырттӕ дӕр амӕлой сӕ фыды азымы тыххӕй, науӕд та уын иуахӕмы бацахсдзысты уӕ зӕхх сӕ сахартӕй байдзаг кӕндзысты ӕгас дуне.

²²Уӕларвӕфсады Бардарӕг зӕгъы: «Ӕз сӕ ныхмӕ рацӕудзынӕн ӕмӕ Вавилоны адӕмы бындзагъд ныккӕндзынӕн — цъиуызмӕлӕг дӕр сӕ нал баззайдзӕн, фырт-бындар ӕмӕ сӕм хӕрӕфырт-бындарӕй чи ис, уыдон иууылдӕр бабын уыдзысты.

²³Вавилон фестын кӕндзынӕн уызынты бӕстӕ ӕмӕ цъымара, рамӕрздзынӕн ӕй куынӕггӕнӕг уисойӕ», — зӕгъы Уӕларвӕфсады Бардарӕг.

²⁴Уӕларвӕфсады Бардарӕг басомы кодта: «Ӕз сараздзынӕн, цы сфӕнд кодтон, уый. Цы тӕрхон рахастон, уымӕн ӕнӕ ’рцӕугӕ нӕй.

²⁵Ассириӕгты ныддӕрӕн кӕндзынӕн Мӕ зӕххыл, бассӕнддзынӕн сӕ Мӕ хӕхтыл, ӕмӕ уӕд Мӕ адӕм сӕ бӕрзӕйӕ раппардзысты се ’фсондз, се уӕхсчытӕ фервӕздзысты сӕ уаргъӕй».

²⁶Хуыцау тӕрхон кӕндзӕни зӕххы цъарӕн, ӕппӕт адӕмтӕм сисдзӕни Йӕ къух.

²⁷Уӕларвӕфсады Бардарӕг рахаста тӕрхон — чи йӕ аивдзӕн? Уый систа Йӕ къух — чи Йын ӕй бауромдзӕн?

²⁸Паддзах Ахазы амарды аз уыдис ахӕм рагуац:

²⁹«Филистимӕгтӕ, ма цин кӕнут, цы лӕдзӕгӕй уӕ надтой, уый кӕй ныппырх ис, ууыл, уымӕн ӕмӕ маргджын калмы уидагӕй райгуырдзӕнис калм, уымӕй та — фат-калм.

³⁰Уӕд Мӕ адӕмы мӕгуырдӕртӕ хӕринагӕй бафсӕддзысты, гӕвзыччытӕ ӕдас ӕмӕ ӕнӕмӕтӕй цӕрдзысты. Сымах та Хуыцау сыдӕй амардзӕн, чи ма уӕ баззайа, уыдоны та ныццӕгъддзӕн.

³¹Сахары кулдуар, дзыназ! Нырдиаг кӕн ды дӕр, сахар! Фыр тӕссӕй ризут, филистимӕгтӕ, уымӕн ӕмӕ цӕгатӕрдыгӕй ӕрбаввахс сты фӕздӕджы къуыбылӕйттӕ — уый ӕрбацӕуы ӕфсад, бырсынц ӕмдых-ӕмзондӕй.

³²Уӕдӕ цы дзуапп раттын хъӕуы ацы адӕмы минӕвӕрттӕн? Уыдонӕн зӕгъын хъӕуы, Сион сфидар кодта Дунедарӕг, ӕмӕ дзы Йӕ адӕмы мӕгуыртӕ сӕ сӕртӕ бафснайдзысты, зӕгъгӕ».