Read Библи: Сыгъдӕг Исайа 15 Bible Online

Исайа 15 - Библи: Сыгъдӕг bible

Исайа 15

¹Рагуац Моавы тыххӕй. Куыд сафтид ис Ар-Моав — дӕрӕнгонд ӕрцыди иу ӕхсӕвмӕ! Куыд сафтид ис Кир-Моав, бацарӕфтыд иу ӕхсӕвмӕ!

²Моавы цӕрджытӕ ссыдысты Дивоны кувӕн къуыбыртӕм ӕмӕ уым еххӕй кӕуынц Нево ӕмӕ Медевайы сахартыл; иууылдӕр алвыдтой сӕ сӕртӕ, адастой сӕ боцъотӕ.

³Уынгты хилынц сӕхъис пӕлӕзты, уӕлхӕдзӕрттӕ ӕмӕ фӕзтӕй се ’рдиаг хъуысы, цыхцырӕй кӕлы сӕ цӕссыг.

⁴Богъ-богъ кӕнынц Хешбон ӕмӕ Елалейы цӕрджытӕ, сӕ хъӕрахст суанг Йахацы сахары онг хъуысы. Моавы хӕстонтӕн дӕр сӕ ныфс асаст ӕмӕ ӕрдиаг кӕнынц.

⁵Мӕ зӕрдӕ дзыназы Моавы хъысмӕтыл; йӕ адӕм лидзынц Цоары сахармӕ — Еглат-Шелишимӕ. Кӕугӕйӕ ссӕуынц Лухиты хъӕуы хӕрдыл; Хоронаимы сахармӕ фӕндагыл зӕрдӕхалӕн хъарджытӕ кӕнынц.

⁶Байсыстысты Нимримы суадӕттӕ; хурмӕ баруади кӕрдӕг, цъӕх зайӕгхалӕн йӕ кой дӕр нал ис.

⁷Моавы адӕм сӕ фӕллой Хӕристы дӕлвӕзы фалӕмӕ фӕхӕссынц.

⁸Адӕмы ӕрдиаг суанг бӕстӕйы арӕнты онг айзӕлы, Еглаим ӕмӕ Беер-Елимы сахартӕм хъуысы.

⁹Димоны сахар цы доны был ис, уый туг фестади, фӕлӕ сыл Ӕз ноджы фыддӕр фыдбылыз бафтаудзынӕн: моавӕгтӕй ма чи аирвӕзт, уыцы бӕстӕйы ма чидӕриддӕр баззади, уыдоныл Ӕз се ’ппӕтыл дӕр сардаудзынӕн домбайы.