Read Библи: Сыгъдӕг Исайа 19 Bible Online

Исайа 19 - Библи: Сыгъдӕг bible

Исайа 19

¹Рагуац Мысыры тыххӕй. Дунедарӕг рог ӕврагъыл ӕртӕхдзӕни Мысырмӕ. Ӕмризӕджы нырриздзысты Йӕ цуры Мысыры мӕнгхуыцӕуттӕ, ӕмӕ Мысырӕн асӕтдзӕни йӕ ныфс.

²Дунедарӕг зӕгъы: «Ӕз мысырӕгты кӕрӕдзиуыл сардаудзынӕн, ӕмӕ схӕцдзысты ӕфсымӕр ӕфсымӕримӕ, сыхаг сыхагимӕ, сахар сахаримӕ, паддзахад паддзахадимӕ.

³Сӕ сӕрӕн нал уыдзысты мысырӕгтӕ, сӕ фӕндтӕ сын ныссуйтӕ кӕндзынӕн. Уынаффӕгур фӕрсдзысты гуымирыты, мӕрдты монты, мӕрдтӕмсидджыты ӕмӕ дӕсныфӕрсджыты.

⁴Ӕз мысырӕгты ратдзынӕн ӕгъатыр хицауы къухмӕ, тызмӕг паддзах сын ӕлдариуӕг кӕндзӕни», — зӕгъы Дунедарӕг, Уӕларвӕфсады Бардарӕг.

⁵Денджызы дон стӕнӕг уыдзӕни, цӕугӕдӕттӕ байсысдзысты, бахуыскъ уыдзысты.

⁶Дӕтты дон смаг кӕндзӕн, Мысыры цӕугӕдӕттӕ стӕнӕг уыдзысты, байсысдзысты; цъӕнут ӕмӕ хъӕз сау адардзысты.

⁷Пыхсбынтӕ ӕмӕ ӕфсиры хуымтӕ бахус уыдзысты Нилы былгӕрӕтты, дымгӕ сӕ ныххӕлиу кӕндзӕни, фӕхӕсдзӕни сӕ дард.

⁸Ныхъхъынцъым кӕндзысты кӕфахсджытӕ, сдзыназдзысты, йе ’нгуыр-иу Нилы чи баппӕрста, уыдон, нырхӕндӕг уыдзысты, йӕ кӕфахсӕн хыз-иу доны чи ауагъта, уыдон.

⁹Гӕнкуыстгӕнджытӕ ницыуал зондзысты сӕ сӕрӕн, хъуымацуафджытӕн асӕтдзӕни сӕ ныфс.

¹⁰Ӕлвисджытӕ нырхӕндӕг уыдзысты, сӕ ныфс асӕтдзӕн кусӕг адӕмӕн.

¹¹Сӕ зонд фӕцыди Цоаны барджынтӕн! Фараоны куырыхонтӕ, йӕ уынаффӕйы лӕгтӕ, ӕдылы уынаффӕтӕ кӕнынц. Чи ма уӕ бауӕнддзӕн фараонӕн йӕхи рагон куырыхон паддзӕхты байзӕддаг схонын?

¹²Цы фесты, фараон, дӕ куырыхонтӕ? Зӕгъӕнт-ма дын уӕдӕ ӕмӕ базонӕнт, Уӕларвӕфсады Бардарӕг Мысырӕн цы тӕрхон рахаста, уый!

¹³Сӕ зонд фӕцыди Цоаны барджынтӕн! Сӕхи сайынц Нофы[5] барджынтӕ дӕр. Сӕ хистӕрты зондӕй Мысыры адӕм рӕдыд фӕндагыл адзӕгъӕл сты.

¹⁴Дунедарӕг сын сӕ сӕрызонд фӕцӕуын кодта, ӕмӕ мысырӕгты галиу фӕндӕгтӕм аздӕхтой. Адӕм ӕнӕхъола цоппай кӕнынц, расыг лӕг йӕ омдзӕджы куыд фӕрабыр-бабыр кӕны, уыйау.

¹⁵Нал баххуыс кӕндзӕни Мысырӕн нӕдӕр сӕр, нӕдӕр къӕдзил, нӕдӕр уӕздан, нӕдӕр сау лӕг.

¹⁶Уыцы бон мысырӕгтӕ сылгоймӕгтау ныззыр-зыр кӕндзысты, Уӕларвӕфсады Бардарӕг сӕм Йӕ къух куы сиса, уӕд.

¹⁷Иудейӕгты зӕххӕн-иу ӕрмӕст йӕ койӕ дӕр мысырӕгтӕн сӕ зӕрдӕ бауазал уыдзӕн. Уӕларвӕфсады Бардарӕг сын цы тӕрхон рахаста, уый сӕ кӕмӕнфӕнды йӕ хъуыдыйы куы ’рӕфта — фыр тӕссӕй-иу нырриздзӕн.

¹⁸Уыцы заман Мысыры сахартӕй фондз райдайдзысты дзурын ханаанӕгты ӕвзагыл. Уӕларвӕфсады Бардарӕгӕн расомы кӕндзысты, иузӕрдион Ыл кӕй уыдзысты, уый тыххӕй; сахартӕй иу схондзысты Хуры сахар.

¹⁹Уыцы бон Дунедарӕгӕн Мысыры бӕстастӕу ӕвӕрд ӕрцӕудзӕни нывондхӕссӕн, йӕ арӕныл та — Дунедарӕджы уаз дур:

²⁰Уӕларвӕфсады Бардарӕджы ӕвдисӕн ӕмӕ Йӕ нысан Мысыры зӕххыл. Мысыры ӕфхӕрд адӕм Дунедарӕгмӕ куы сдзыназой, уӕд сын Уый рарвитдзӕнис ирвӕзынгӕнӕджы, сӕрылхӕцӕджы, ӕмӕ сӕ уый фервӕзын кӕндзӕн.

²¹Афтӕмӕй Дунедарӕг Йӕхи раргом кӕндзӕни мысырӕгтӕн, ӕмӕ Йӕ уыдон базондзысты ӕмӕ Йын нывӕндтӕ ӕмӕ хойраджы хуынтӕ ӕрхӕсдзысты, сомы Йын ракӕндзысты ӕмӕ сӕ сомытӕ сӕххӕст кӕндзысты.

²²Афтӕмӕй Дунедарӕг Мысыры адӕмыл бафтаудзӕни Йӕ фыдӕх, цӕмӕй сын уый фӕрцы сӕ цард банывыл кӕна. Уыдон Дунедарӕгмӕ се ’ргом сараздзысты, ӕмӕ сын Уый фехъусдзӕни сӕ куывдтытӕ ӕмӕ сын ахъаз бакӕндзӕн.

²³Уыцы заман Мысырӕй Ассирийы ’хсӕн уыдзӕни уӕрӕх фӕндаг, стыр бастдзинӕдтӕ. Ассириӕгтӕ цӕудзысты Мысырмӕ, мысырӕгтӕ та — Ассиримӕ, ӕмӕ мысырӕгтӕ ассириӕгтимӕ иумӕ кувдзысты Дунедарӕгмӕ.

²⁴Уыцы заман Израил Мысыр ӕмӕ Ассирийӕн суыдзӕни се ’ртыккаг ӕмбал — се ’мдӕндаг. Ӕмӕ Израилы фӕрцы ӕгас зӕхх дӕр арфӕгонд фӕуыдзӕн.

²⁵Уӕларвӕфсады Бардарӕг сын ахӕм арфӕ ракӕндзӕн: «Арфӕгонд уӕнт Мӕ адӕм — мысырӕгтӕ, Ме сконд адӕм — ассириӕгтӕ ӕмӕ Мӕ исбон — Израил!»