Read Библи: Сыгъдӕг Исайа 24 Bible Online

Исайа 24 - Библи: Сыгъдӕг bible

Исайа 24

¹Дунедарӕг гӕныстон фӕкӕндзӕни зӕхх, ныззаууат ӕй кӕндзӕн — зӕхх аивдзӕни йӕ хуыз, йӕ цӕрджытӕ ныххӕлиу уыдзысты.

²Иу у сӕ хъысмӕт се ’ппӕтӕн дӕр: сауджынтӕ ӕмӕ адӕмӕн, барджынтӕ ӕмӕ дӕлдӕртӕн, ӕхсинтӕ ӕмӕ унӕуттӕн, уӕйгӕнджытӕ ӕмӕ ӕлхӕнджытӕн, цъынды чи дӕтты ӕмӕ хӕс чи дары, уыдонӕн, пайдайы охыл ӕфстау дӕтджытӕ ӕмӕ ӕфстау исджытӕн.

³Бынтондӕр ныггӕныстон ӕмӕ ныххӕлӕттаг уыдзӕн зӕхх, уымӕн ӕмӕ афтӕ загъта Дунедарӕг.

⁴Хъынцъым кӕны, баруади зӕхх, ӕгас дуне ныттар ис ӕмӕ сӕфы; зӕххыл цӕрӕг адӕмӕн сӕ барджын хицӕуттӕ сӕфынц.

⁵Зӕхх фегад кодтой йӕ цӕрджытӕ, сӕ къух систой Хуыцауы ӕгъдауыл, сзыгъуыммӕ Йын кодтой Йӕ уагӕвӕрдтӕ, фехӕлдтой мыггагмӕйы фидыд.

⁶Уымӕ гӕсгӕ ӕлгъыст ӕрцӕудзӕни зӕхх — ӕфхӕрд баййафдзысты йӕ цӕрджытӕ; скуынӕг уыдзысты адӕм, бирӕ сӕ нал баззайдзӕн.

⁷Сӕн байсысти, сӕнӕфсиры зӕнг баруади; цинӕй чи ради, уыдон ныр хъӕрзынц.

⁸Далаты цины хъӕр нал хъуысы, цингӕнӕг адӕмы хъӕлӕс бамыр ис, бамынӕг дыууадӕстӕнонты цагъд;

⁹цины зарджытимӕ сӕн нал нуазынц адӕм, мастад кӕны хъӕбӕр нозт дзыхы.

¹⁰Федзӕрӕг сахар, ныппырх, йӕ хӕдзӕрттӕ — ӕхгӕд, бацӕуӕн сӕм нӕй.

¹¹Уынджы цӕуджытӕ ӕрдиаг кӕнынц — сӕн нал ис! Хъӕлдзӕгдзинадӕн нал ис йӕ кой дӕр, циндзинад фӕлыгъди а бӕстӕй.

¹²Сахар ныззаууат, йӕ кулдуар рафӕлдӕхт.

¹³Зӕххы цъары адӕмтӕн сӕ уавӕр уыдзӕни, оливӕ бӕлӕстӕ куы ’рцӕгъдынц кӕнӕ ма тыллӕгисӕны фӕстӕ сӕнӕфсирыл цы цупӕлттӕ аззайы, уыдон куы ’ртонынц, уый хуызӕн.

¹⁴Адӕмтӕй ма чи баззайа, уыдон хъӕлӕсыдзагӕй стаудзысты Дунедарӕджы кад, ныгуылӕнӕрдыгӕй сӕ цины хъӕр хъуысдзӕн.

¹⁵О скӕсӕны дзыллӕтӕ, кад кӕнут Дунедарӕгӕн! Денджызгӕрӕтты цӕрджытӕ, кад кӕнут Дунедарӕгӕн, Израилы Хуыцауӕн!

¹⁶Арвы кӕронӕй нӕм кады зарӕг хъуысы: «Кад уӕд Рӕстӕвзарӕн!» Фӕлӕ ӕз загътон: «Ме сӕфт ӕрцыди, додойаг фӕдӕн! Гадзрахатӕй цӕуынц уӕйгӕнджытӕ, сӕ гадзрахат фылдӕрӕй-фылдӕр кӕны!»

¹⁷А зӕххы цӕрджытӕм гӕппӕввонгӕй лӕууынц ӕвирхъау тас, хъоргъ ӕмӕ ахсӕн хыз.

¹⁸Ӕвирхъау тасы хъӕр фехъусгӕйӕ, лидзынмӕ чи фӕуа, уый ныххаудзӕни хъоргъы, хъоргъӕй чи сбыра, уый та бахаудзӕн ахсӕн хызы. Арвы дуӕрттӕ фегом уыдзысты, зӕххы бындуртӕ нынкъуысдзысты.

¹⁹Зӕхх скъуыдтӕ кӕндзӕн, ӕнкъуысдзӕн ӕмӕ ӕмризӕджы риздзӕн.

²⁰Расыг лӕгау дзедзырой кӕндзӕн, ӕнкъуысдзӕни мӕнгӕфсон халагъудау. Йӕ фыдракӕндтӕ йыл сӕ уӕз куы ’руадзой, уӕд афӕлдӕхдзӕн ӕмӕ никуыуал схӕцдзӕн йӕхиуыл.

²¹Уыцы заман Дунедарӕг Йӕ азары амӕттаг бакӕндзӕн уӕларвӕфсад дӕр ӕмӕ зӕххон паддзӕхты дӕр.

²²Ахӕстытау хъоргъы ӕппӕрст ӕрцӕудзысты иумӕ. Бирӕ бонты сӕ гуыдырӕхгӕдӕй фӕдардзысты, стӕй сӕ бафхӕрдзысты.

²³Мӕй ныссырх уыдзӕн ӕмӕ хур къӕмдзӕстыгӕй баззайдзӕн, уымӕн ӕмӕ Уӕларвӕфсады Бардарӕг паддзахиуӕг кӕндзӕни Сионы хохыл, Йерусалимы, ӕмӕ Йӕ кад адӕмы хистӕртӕн раргом кӕндзӕн.