Read Библи: Сыгъдӕг Исайа 41 Bible Online

Исайа 41 - Библи: Сыгъдӕг bible

Исайа 41

¹«Ӕдзӕмӕй Мӕм хъусут, денджызы сакъадӕхтӕ ӕмӕ денджызгӕрон зӕххытӕ! Сӕ хъарутӕ ӕрбамбырд кӕнӕнт адӕмтӕ, ӕрбацӕуӕнт ӕмӕ зӕгъӕнт, тӕрхоны раз ӕрлӕууӕм иумӕ, зӕгъгӕ!

²Скӕсӕны Чи растын кодта рӕстӕвзары, Чи йӕ рацӕуын кодта Йӕ фӕдыл? Йӕ дӕлбар ын бакодта адӕмты, йӕ къӕхты бын — паддзӕхты. Уый сӕ йӕ кардӕй фӕнык фестын кодта, йӕ фатӕй сӕ ныззыгуым кодта.

³Йӕ разӕй сӕ ӕдӕрсгӕ айста, йӕ къӕхтӕ зӕххыл дӕр нӕ ныдзӕвынц.

⁴Ацы хабӕрттӕ Кӕй фӕрцы ӕрцӕуынц, уый Чи у? Уый у, адӕмты фӕлтӕртӕн райдианӕй нырмӕ дунейы рухс Чи фенын кӕны, уыцы Хуыцау. Ӕз Дунедарӕг дӕн. Райдианы дӕр Ӕз дӕн ӕмӕ фӕстаг заман дӕр Ӕз уыдзынӕн».

⁵Денджызгӕрон сахарты цӕрджытыл, ацы цаутӕ фенгӕйӕ, ризӕг бахӕцыд, зӕххы цъары алы кӕрӕтты дӕр адӕм базыр-зыр кодтой. Ӕрбангом сты, иумӕ ӕрбамбырд сты.

⁶Кӕрӕдзийӕн ӕххуыс кӕнынц, ныфсытӕ ӕвӕрынц, фидар лӕуу, зӕгъгӕ.

⁷Ӕрмдӕсны разӕнгард кӕны згъӕртайынгӕнӕджы, хъӕсдарӕгыл згъӕр сыф тъӕпӕнгӕнӕджы. Зӕгъы йын, хорз у, зӕгъгӕ, ӕмӕ йӕ зӕгӕлтӕй ныффидар кӕны, куыннӕ фенкъуыса, афтӕ.

⁸«Израилы адӕм, Йаковы байзӕддӕгтӕ! Ӕз уӕ равзӕрстон лӕггад кӕнынмӕ, Мӕ хӕлар Авраамы фӕстагӕттӕ!

⁹Фӕсидтӕн уӕм ӕмӕ уӕ дунейы алы кӕрӕттӕй ӕрӕмбырд кодтон, загътон уын, Мӕ цагъартӕ стут, зӕгъгӕ. Ӕз уӕ равзӕрстон ӕмӕ уыл Мӕхи нӕ атигъ кӕндзынӕн.

¹⁰Тӕрсгӕ ма кӕнут, Ӕз уемӕ дӕн! Уӕ зӕрдӕ мацӕмӕ ӕхсайӕд, уымӕн ӕмӕ Ӕз уӕ Хуыцау дӕн! Уӕ зӕрдӕйы уын бауадздзынӕн ныфс, баххуыс уын кӕндзынӕн ӕмӕ уӕ бахъахъхъӕндзынӕн Мӕ хъомысджын къухӕй.

¹¹Лӕбургӕ уӕм чи кӕны — иууылдӕр худинаг ӕмӕ аллайаг фӕуыдзысты. Уемӕ чи быцӕу кӕны — заууатмӕ ӕрцӕудзысты ӕмӕ бабын уыдзысты.

¹²Уӕ фыдгулты уӕ цӕсты кӕронӕй дӕр нал фендзыстут. Уӕ ныхмӕ чи хӕцы, уыдон зыбыты ницӕмӕ ӕрцӕудзысты.

¹³Уымӕн ӕмӕ Ӕз — Дунедарӕг, уӕ Хуыцау. Уӕ рахиз къухыл уын хӕцын ӕмӕ уын зӕгъын, ма тӕрсут, Ӕз уе ’ххуысгӕнӕг дӕн, зӕгъгӕ.

¹⁴Ма тӕрсут, Израилы адӕм, Йаковы байзӕддӕгтӕ! Къуыдыргалмау ӕнӕбон куы уат, уӕд дӕр Ӕз уӕ фарсмӕ дӕн ӕмӕ уын баххуыс кӕндзынӕн. Ӕз — Дунедарӕг, Израилы Стыр Хуыцау — ссӕрибар кӕндзынӕн сымах.

¹⁵Ӕз уӕ сарӕзтон найгӕнӕн дзоныгъ, цыргъдӕндагджын, ӕмӕ банай кӕндзыстут, ныххафдзыстут хӕхтӕ ӕмӕ уӕлвӕзтӕ, рыг сӕ фестын кӕндзыстут.

¹⁶Дымгӕмӕ сӕ ныддардзыстут, ӕмӕ сӕ дымгӕ ахӕсдзӕн, уаддым сӕ ныххӕлиу кӕндзӕн. Ӕмӕ уӕд бацин кӕндзыстут Дунедарӕгыл, стаудзыстут Израилы Стыр Хуыцауы».

¹⁷Дунедарӕг загъта: «Мӕ мӕгуыр, Мӕ гӕвзыкк адӕм дойныйӕ мӕлынц ӕмӕ дон нӕ арынц, донмондагӕй се ’взаг сӕ комы ныххус ис. Фӕлӕ сӕ Ӕз — Дунедарӕг, Израилы Хуыцау — фехъусдзынӕн, сӕ тыхсты сӕ нӕ ныууадздзынӕн.

¹⁸Хӕхтыл сын рауадздзынӕн цӕугӕдӕттӕ, дӕлвӕзты сын фестын кӕндзынӕн суадӕттӕ, ӕдзӕрӕг быдыры сын айтындздзынӕн цад, сыгъд зӕххы азгъордзысты къададӕттӕ.

¹⁹Ӕдзӕрӕг быдыры ныссадздзынӕн кедртӕ, акъацитӕ, миртытӕ, оливӕ бӕлӕстӕ, тыгъд быдыры — кипаристӕ, цымтӕ ӕмӕ тӕрс бӕлӕстӕ,

²⁰цӕмӕй феной ӕмӕ базоной, ӕркӕсой ӕмӕ бамбарой: Дунедарӕджы, Израилы Стыр Хуыцауы, конд сты».

²¹«Уӕ хъаст ӕрбахӕссут, — зӕгъы Дунедарӕг. — Бӕлвырдгӕнӕнтӕ равдисут», — зӕгъы Йаковы Паддзах. —

²²Уӕ хуыцӕуттӕ нын ӕрхӕссӕнт бӕлвырд ӕвдисӕйнӕгтӕ, рагацау фехъусын кӕнӕнт, фидӕны цы ӕрцӕудзӕн, уыдӕттӕ. Сӕ ныхӕстӕ кӕд сӕххӕст уой, уӕд сыл баууӕнддзыстӕм.

²³Зӕгъут нын, фидӕны цы ӕрцӕудзӕни хорзӕй дӕр ӕмӕ фыдӕй дӕр, уый, ӕмӕ уӕд базондзыстӕм, сымах ӕцӕгдӕр хуыцӕуттӕ кӕй стут, ӕмӕ уын аргъуыц кӕндзыстӕм.

²⁴Фӕлӕ сымах уӕхӕдӕг дӕр ницы стут, ӕмӕ уӕ митӕ дӕр ницы сты. Чи уӕ нымайы, уый та ӕлгъаг у.

²⁵Ӕз рӕстӕвзары ракодтон цӕгатӕй, ӕмӕ ӕрбацӕуы. Скӕсӕнӕй Мӕм кувы. Цъыфау йӕ къӕхты бын ссӕнды барджынты, дурынгӕнӕг ӕлыг куыд фӕнӕмы, афтӕ.

²⁶Сымахӕрдыгӕй рагацау чи загъта уыцы рӕстӕвзары тыххӕй, цӕмӕй мах дзӕвгар фӕстӕдӕр балхынцъ кӕнӕм, раст загъта, зӕгъгӕ? Ничи загъта, ничи фехъусын кодта. Уӕ ныхӕстӕ уын хъусгӕ дӕр ничи фӕкодта.

²⁷Иунӕг Ӕз загътон Сионы сахарӕн, Йерусалимы цӕрджытӕн, мӕнӕ уӕм фарны уац хӕссӕджы ӕрвитын, зӕгъгӕ.

²⁸Афтӕмӕй Ӕз адӕмтыл афӕлгӕсыдтӕн, ӕмӕ се ’хсӕн иу хуыцау дӕр нӕ разынд, зондӕй кӕй бафӕрсой, ахӕм. Никӕй сӕм федтон, кӕй бафӕрсон, ахӕм хуыцау.

²⁹Афтӕмӕй, сӕхӕдӕг дӕр — ницы, сӕ митӕ дӕр — ницӕйаг; сӕ гуымирытӕ дымгӕйӕ уӕлдай не сты, ницы сты.