Read Библи: Сыгъдӕг Исайа 44 Bible Online

Исайа 44 - Библи: Сыгъдӕг bible

Исайа 44

¹Ныр Мӕм ӕрбайхъусут, Мӕ цагъартӕ — Йаковы байзӕддӕгтӕ, Ме ’взӕрстытӕ — Израилы адӕм!

²Афтӕ уын зӕгъын Ӕз, Дунедарӕг, уе Сфӕлдисӕг, мады гуыбыны уӕ Чи равзӕрын кодта ӕмӕ уын ӕххуыс Чи кӕндзӕни, Уый: ма тӕрсут, Мӕ цагъартӕ, Йаковы байзӕддӕгтӕ, Ме ’взӕрстытӕ — Йешурун!

³Донмӕ бӕллӕджы Ӕз донхорыг скӕндзынӕн, ӕнӕ донӕй баруайӕджы бафсаддзынӕн донӕй. Уӕ мыггаджы уын Мӕ Уды фарнӕй схайджын кӕндзынӕн, Мӕ арфӕ уын ӕруадздзынӕн уӕ фӕстагӕттыл.

⁴Кӕрдӕджы ӕхсӕнты сӕ сӕртӕ сдардзысты донбыл зайӕг гӕды бӕлӕстау.

⁵Сӕ иу дзурдзӕн, ӕз Дунедарӕджы дӕн, иннӕ йӕхи схондзӕн Йаковы номӕй, ӕртыккаг ма йӕ къухыл дӕр ныффысдзӕн, Дунедарӕджы дӕн, зӕгъгӕ, ӕмӕ йӕ схондзысты Израил.

⁶Афтӕ зӕгъы Дунедарӕг, Израилы Паддзах, йӕ Ирвӕзынгӕнӕг, Уӕларвӕфсады Бардарӕг: «Ӕз дӕн фыццаг ӕмӕ фӕстаг, Мӕн йеддӕмӕ нӕй Хуыцау.

⁷Кӕй ис абарӕн Мемӕ? Йӕхи Мын раргом кӕнӕд уый, хъӕрӕй зӕгъӕд, фӕд-фӕдыл цаутӕ радзурӕд: Ӕз рагон адӕмы куы сфӕлдыстон, уӕдӕй нырмӕ цытӕ ӕрцыд ӕмӕ цытӕ ӕрцӕудзӕн фидӕны, зӕгъӕд сӕ.

⁸Ӕппындӕр мацӕмӕй тӕрсут. Уӕхӕдӕг Мын ӕвдисӕн стут — цы хабӕрттӕ цӕуы ныртӕккӕ, ӕппӕт уыдон уын рагагъоммӕ исты Ӕз нӕ дзырдтон? Мӕн йеддӕмӕ чи у Хуыцау? Ӕндӕр Къӕдзӕх нӕ зонын Ӕз».

⁹Гуымирытӕ чи аразы, уыдон иууылдӕр ницӕйӕгтӕ сты. Афтӕ уарзон сын чи у, уыдонӕй ӕппындӕр кӕй ницы пайда ис, уымӕн сӕхӕдӕг ӕвдисӕн. Сӕ гуымирытӕ ницы уынынц ӕмӕ ницы зонынц. Уымӕ гӕсгӕ сыл худинаджы ном сбаддзӕн.

¹⁰Чи аразы йӕхицӕн хуыцау ӕмӕ, бынтондӕр пайда кӕмӕй нӕ уыдзӕн, уыцы гуымиры джиппы чи уадзы?

¹¹Чидӕриддӕр ӕм бакува — ӕнӕмӕнг фегад уыдзысты, уымӕн ӕмӕ уыцы гуымиры саразӕг адӕймаг у. Уӕдӕ уыцы адӕм иумӕ ӕрӕмбырд уӕнт ӕмӕ тӕрхоны раз ӕрлӕууӕнт. Фӕтӕрсдзысты ӕмӕ сӕ худинаджы кой айхъуысдзӕн.

¹²Дӕсны куырд ӕфсӕйнаджы мур райсы, зынджытыл ӕй ӕртайын кӕны ӕмӕ йӕ дзӕбугӕй хойын райдайы. Йе ’ппӕт хъарутӕ йыл бахардз кӕны, бафӕллайы, бастайы, къӕбӕр ӕмӕ доны хъӕстӕ нӕ фӕвӕййы, цалынмӕ уыцы ӕфсӕйнаджы мурӕй фӕрӕт саразы, уӕдмӕ.

¹³Хъӕддӕсны синагӕй рабары ӕмӕ цыргъагӕй ӕрхӕххытӕ кӕны хъӕды лыггагыл, стӕй йӕ сартӕй къахын райдайы, цалынмӕ дзы адӕймаджы аив сурӕт рауайы, уӕдмӕ. Уый фӕстӕ йӕ кувӕн бынаты сӕвӕры.

¹⁴Уыцы сурӕт саразыны тыххӕй ракалы кедр, йе та равзары тулдз кӕнӕ ӕндӕр исты фидар бӕлас, йе та ныссадзы нӕзы бӕлас ӕмӕ банхъӕлмӕ кӕсы, цалынмӕ йын хъӕды бӕлӕсты ӕхсӕн уарынтӕм дзӕбӕх нӕ сырӕзы, уӕдмӕ.

¹⁵Адӕймаг уыцы бӕлӕстӕн сӕ сугӕй арт скӕны йӕхи батавын ӕмӕ дзул сфыцынӕн, иннахӕм — уыцы бӕлӕстӕн сӕ хъӕдӕй скӕны хуыцауы сурӕт, цӕмӕй ӕрзоныг кӕна йӕ разы ӕмӕ гуымирымӕ кува.

¹⁶Афтӕмӕй бӕласӕн йӕ иу хай ӕрцӕуы арты сыгъд, ӕмӕ адӕймаг уыцы артыл йӕхицӕн сфыцы дзидза, скӕны физонӕг. Йӕ фаг куы бахӕры ӕмӕ куы бахъарм вӕййы, уӕд фӕзӕгъы, куыд дзӕбӕх бахъарм дӕн арты фарсмӕ, зӕгъгӕ.

¹⁷Хъӕдӕрмӕгӕй ма цы баззайы, уымӕй та адӕймаг йӕхицӕн скӕны гуымиры ӕмӕ йӕм йӕ уӕрджытыл бакувы, ды мӕ хуыцау дӕ ӕмӕ мӕ фервӕзын кӕн, зӕгъгӕ.

¹⁸Ахӕмтӕ ӕппындӕр ницы зонынц ӕмӕ ӕмбарынц: Уый сын сӕхгӕдта сӕ цӕстытӕ, цӕмӕй ма уыной, сӕ зӕрдӕтӕ — цӕмӕй ма хатой.

¹⁹Ахӕм адӕймагӕн йӕ хъуыдыйы дӕр нӕй, нӕ зоны ӕмӕ не ’мбары, науӕд зӕгъид: «Уый цы ми кӕнын? Бӕласӕн йе ’мбис арты басыгътон, зынгыл сфыхтон дзул, скодтон физонӕг ӕмӕ бахордтон. Цы ма дзы баззади, уымӕй та ацы ӕлгъаг дзаума куыд аразын? Куыд хъуамӕ бакувон хъӕды лыггагмӕ?»

²⁰Раст цыма, дымгӕ цы рыг систа, уый фӕсте суры ӕмӕ йӕ ӕрцахсынмӕ хъавы. Йе ’дылы зондӕй йӕ фӕндагӕй адзӕгъӕл ис. Куыд фервӕза, уый нӕ зоны, ӕмӕ йӕ бон нӕу зӕгъын: «Уый мӕ къухы ӕцӕгдзинадӕй куы ницы ис!»

²¹Дунедарӕг зӕгъы: «Уӕ зӕрдыл ӕй бадарут, Йаковы байзӕддӕгтӕ, Израилы адӕм, Мӕ цагъартӕ кӕй стут, уый уӕ рох ма уӕд. Ӕз уӕ сфӕлдыстон, Мӕ цагъартӕ стут. Мӕнӕй рох никуы уыдзынӕ, Израил.

²²Мигъау уын ӕрбайсӕфтон уӕ азымтӕ, ӕврагъау — уӕ тӕригъӕдтӕ. Раздӕхут Мӕм — Ӕз уӕ Ирвӕзынгӕнӕг дӕн».

²³Цингӕнгӕ зарут, уӕлӕрвтӕ! Цинхъӕр кӕнут, зӕххы ӕрфытӕ, фӕзмӕнт уӕ, заргӕ, хӕхтӕ ӕмӕ хъӕды ӕппӕт бӕлӕстӕ! Уымӕн ӕмӕ Дунедарӕг ссӕрибар кодта Йаковы байзӕддаджы, Израилы руаджы Йӕхи ӕргом кӕны, тӕмӕнкалгӕ.

²⁴Афтӕ зӕгъы Дунедарӕг, уӕ мады гуыбыны уӕ Чи равзӕрын кодта, Уый, уӕ Ирвӕзынгӕнӕг: «Ӕз Дунедарӕг дӕн, ӕппӕт дӕр Чи сфӕлдыста, Уый. Уӕлӕрвтӕ Ӕз айтыгътон, Зӕхх Мӕ хъомысӕй Ӕз ӕрцарӕзтон.

²⁵Мӕнгпехуымпарты Ӕз багӕды кӕнын, дӕсныфӕрсджытӕй ӕдылытӕ аразын, куырыхонтӕн сӕ зонд сафын.

²⁶Мӕ цагъарӕн сфидар кӕнын йӕ пехуымпар ныхас, сӕххӕст кӕнын Ме ’рвыст лӕгты дзырд. Ныр Йерусалимӕн зӕгъын, дӕ мидӕг та ӕрцӕрӕнт адӕм, зӕгъгӕ. Иудейы сахартӕн дӕр зӕгъын, ногӕй та арӕзт ӕрцӕудзыстут, уӕ кӕлддзӕгты бынаты ног хӕдзӕрттӕ сараздзынӕн, зӕгъгӕ.

²⁷Ӕнӕбын денджызӕн зӕгъын: „Басур у, дӕ уылӕнтӕ дын байсысын кӕндзынӕн“.

²⁸Кирӕн зӕгъын: „Мӕ адӕмӕн фыййау уыдзынӕ“. Уый Мын сӕххӕст кӕндзӕни Ме ’ппӕт фӕндтӕ дӕр. Йерусалимӕн зӕгъдзӕни: „Ногӕй дӕ рацараздзысты!“ Кувӕндонӕн зӕгъдзӕни: „Амад ӕрцӕудзынӕ!“»