Read Библи: Сыгъдӕг Исайа 54 Bible Online

Исайа 54 - Библи: Сыгъдӕг bible

Исайа 54

¹«Сцин кӕн, ӕнӕзӕнӕг, сывӕллон чи никуы ныййардта, уый! Цинхъӕр кӕн, арӕг сылгоймаджы хъизӕмӕрттӕ чи нӕ бавзӕрста, уый! Кӕй ныууагътой, уымӕн фылдӕр цот уыдзӕни моймӕдзыдӕй». Афтӕ загъта Дунедарӕг Сионы сахарӕн.

²«Дӕ цатыры бынат фӕпарахатдӕр кӕн, йе ’мбӕрзӕнтӕ йын фӕуӕрӕхдӕр кӕн, ма бацауӕрд. Йе ’лвасӕн бӕндӕнтӕ йын фӕдаргъдӕр кӕн, зӕгӕлмихтӕ сӕ бынӕтты ныффидар кӕн.

³Дӕ байзӕддӕгтӕ сбирӕ уыдзысты, афсӕрдзысты хуссармӕ ӕмӕ цӕгатӕрдӕм, сӕ дӕлбар бакӕндзысты алы адӕмты, ӕрцӕрдзысты гӕныстон сахарты».

⁴Ма тӕрс! Нырӕй фӕстӕмӕ нал хӕсдзынӕ ӕгады ном. Мацӕмӕйуал ӕфсӕрмы кӕн! Нал дыл сбаддзӕни фидиссаджы ном. Де ’взонджы худинаг дӕ ферох уыдзӕни, дӕ идӕдзы бонты фидистӕ дӕ зӕрдыл дӕр нал ӕрӕфтдзысты.

⁵Уымӕн ӕмӕ Сфӕлдисӕг — дӕ Сӕрыхицау, Йӕ ном — Уӕларвӕфсады Бардарӕг. Дӕ Ирвӕзынгӕнӕг у Израилы Стыр Хуыцау, ӕгас зӕххы Хуыцау — афтӕ Йӕ хонынц.

⁶Ды уыдтӕ, удхайраг чи фӕвӕййы, ахӕм уагъд усы хуызӕн. Фӕлӕ дӕм ныр фӕстӕмӕ сиды Дунедарӕг, дӕ Хуыцау, ӕмӕ зӕгъы: «Фыццаг уарзоныл чи бахъоды кӕндзӕн?

⁷Уысмы бӕрц дӕ ныууагътон, фӕлӕ дӕ бирӕ уарзын ӕмӕ дӕ ӕрхондзынӕн фӕстӕмӕ.

⁸Мӕ маст дӕм куы ссыгъди, уӕд дыл Мӕхи атигъ кодтон, фӕлӕ дын ныр мыггагмӕ ныббардзынӕн. Афтӕ зӕгъы Дунедарӕг, дӕ Ирвӕзынгӕнӕг.

⁹Нойы заман доны хъаймӕт куы фӕци, уӕд куыд расомы кодтон, зӕххыл доны хъаймӕт нал уыдзӕни, зӕгъгӕ, афтӕ сомы кӕнын ныр дӕр, нал дӕм смӕсты уыдзынӕн ӕмӕ дӕм нал бартхъирӕн кӕндзынӕн.

¹⁰Хӕхтӕ сӕ бынатӕй фенкъуысдзысты, уӕлвӕзтӕ нырриздзысты, фӕлӕ дӕумӕ цы хорз зӕрдӕ дарын, уымӕн ивӕн нӕй, цы фарн дын балӕвар кодтон, уымӕн та — сӕфӕн. Уый дын зӕгъын Ӕз, уарзгӕ дӕ Чи кӕны, уыцы Дунедарӕг».

¹¹Уӕ, бецау, тымыгъты амӕттаг чи баци, хъыгӕй йемыдзаг чи у, уыцы сахар! Ӕз дын дӕ сисы дуртӕ самайдзынӕн зынаргъ ӕмӕ ӕнӕхӕлгӕ змӕстимӕ, бындур та сын сӕвӕрдзынӕн сапфирӕй.

¹²Дӕ систы дӕндаг-рӕгътӕ дын скӕндзынӕн лалӕй, дӕ кулдуӕрттӕ — изумрудӕй, дӕ алыварс быру та дын сфӕлынддзынӕн алы зынаргъ дуртӕй.

¹³Дӕ байзӕддӕгты дын се ’ппӕты дӕр сахуыр кӕндзӕн Дунедарӕг, ӕгӕрон уыдзӕн сӕ фарн.

¹⁴«Дӕ рӕстад сфидар уыдзӕн; ӕфхӕрд цы у, уый нӕ базондзынӕ, ферох дӕ уыдзӕн тас.

¹⁵Бабырсинаг-иу дӕм чи уа, уымӕн Ӕз фӕндаг нал ратдзынӕн, ӕмӕ-иу йӕхӕдӕг бабын уыдзӕн.

¹⁶Хӕцӕнгарз саразынӕн арт чи бандзары, уыцы куырд дӕр Ме ’сконд у. Афтӕ — уыцы хӕцӕнгарзӕй адӕмы чи цӕгъды, уый дӕр.

¹⁷Дӕ ныхмӕ рацӕуыны охыл хӕцӕнгарз саразын дӕр никӕмӕнуал бантысдзӕн. Суанг тӕрхоны мидӕг дӕр дӕ зылынгӕнӕгӕн дӕхӕдӕг йӕхи базылын кӕндзынӕ. Ахӕм хъысмӕт саккаг кодтон Ӕз Мӕ лӕггадгӕнӕг адӕмӕн — Мӕхӕдӕг дзурдзынӕн сӕ сӕрыл ӕмӕ сӕ сраст кӕндзынӕн», — зӕгъы Дунедарӕг.