Read Библи: Сыгъдӕг Левит 1 Bible Online

Левит 1 - Библи: Сыгъдӕг bible

Левит 1

¹Дунедарӕг фӕсидти Моисеймӕ Фембӕлды Цатырӕй ӕмӕ йын загъта:

²«Израилӕгтӕн фехъусын кӕн: Дунедарӕгӕн уӕ йӕ фосӕй нывондӕн чи цы хӕсса, стур уа ӕви лыстӕг фос, уый йӕхи бар у.

³Йе стурвосӕй иууылсудзинаг нывонд куы хӕсса, уӕд хъуамӕ равзара ӕнӕсахъат гал. Фембӕлды Цатыры къӕсӕрмӕ йӕ ӕрбакӕнӕд, цӕмӕй йӕ нывонд Дунедарӕгӕн ӕхцон уа.

⁴Иууылсудзинаг нывонды сӕрыл йӕ къух ӕрӕвӕрӕд, цӕмӕй йын ӕй айстӕуа ӕмӕ йӕ тӕригъӕдтӕ барст ӕрцӕуой.

⁵Галы Дунедарӕджы раз аргӕвдӕд, Аароны байзӕддӕгтӕ, сауджынтӕ та йын йӕ туг, Фембӕлды Цатыры раз цы нывондхӕссӕн ис, ууыл алырдыгӕй бапырх кӕнӕнт.

⁶Нывондхӕссӕг иууылсудзинагӕн йӕ царм бастигъӕд ӕмӕ йӕ суӕнгтӕ кӕнӕд.

⁷Сауджын Аароны байзӕддӕгтӕ нывондхӕссӕныл арт скӕнӕнт ӕмӕ йыл сугтӕ ӕрӕвӕрӕнт.

⁸Аароны байзӕддӕгтӕ, сауджынтӕ, сугты сӕрыл кусарты уӕнгтӕ равӕрӕнт, йӕ сӕр ӕмӕ йӕ фиу дӕр семӕ куыд уой, афтӕ.

⁹Кусартӕн йӕ хуылфыдзаумӕттӕ ӕмӕ йӕ къӕхтӕ хъӕуы доны ныхсын. Уый фӕстӕ сауджын кусарт ӕнӕхъӕнӕй нывондхӕссӕныл басудзӕд. Уый у иууылсудзинаг нывонд, ӕхцон хӕрздӕф, арты нывонд Дунедарӕгӕн.

¹⁰Искӕмӕн йӕ иууылсудзинаг нывонд лыстӕг фосӕй куы уа, фыс кӕнӕ сӕгъ, уӕд нывондӕн хъуамӕ ӕрхӕсса ӕнӕсахъат фыр кӕнӕ ӕнӕсахъат цӕу.

¹¹Аргӕвдӕд ӕй Дунедарӕджы раз, нывондхӕссӕны цӕгатварс, ӕмӕ йын Аароны байзӕддӕгтӕ, сауджынтӕ, йӕ туг нывондхӕссӕныл алырдыгӕй бапырх кӕнӕнт.

¹²Кусарт хъӕуы суӕнгтӕ кӕнын, ӕмӕ сауджын кусарты уӕнгтӕ сӕр ӕмӕ фиутимӕ равӕрӕд нывондхӕссӕныл, судзгӕ сугты сӕрыл.

¹³Кусарты хуылфыдзаумӕттӕ ӕмӕ къӕхтӕ хъӕуы доны ныхсын, уый фӕстӕ сӕ сауджын нывондхӕссӕныл басудзӕд. Уый у иууылсудзинаг нывонд, ӕхцон хӕрздӕфӕн, арты нывонд Дунедарӕгӕн.

¹⁴Исчи Дунедарӕгӕн иууылсудзинаг нывондӕн маргъ куы хӕсса, уӕд равзарӕд ӕхсинӕг кӕнӕ бӕдул бӕлон.

¹⁵Сауджын маргъы нывондхӕссӕнмӕ бахӕссӕд, йӕ къубал ын фездухӕд ӕмӕ йӕ нывондхӕссӕныл басудзӕд, йӕ туг та йын нывондхӕссӕны фарсыл бакалӕд.

¹⁶Йӕ гуцъа йын йӕ пакъуытимӕ стонӕд ӕмӕ йӕ нывондхӕссӕны скӕсӕнварс, фӕнык кӕдӕм фӕкалынц, уырдӕм аппарӕд.

¹⁷Йӕ базыртыл ын, скъуынӕгау, фӕйнӕрдӕм ахӕцӕд, фӕлӕ йӕ дыууӕ дихы ма фӕкӕнӕд, нывондхӕссӕныл ӕй сугӕй арты басудзӕд. Уый у иууылсудзинаг нывонд, ӕхцон хӕрздӕф, арты нывонд Дунедарӕгӕн.