Read Библи: Сыгъдӕг Левит 14 Bible Online

Левит 14 - Библи: Сыгъдӕг bible

Левит 14

²«Мӕнӕ, йӕ хъотырӕй чи сдзӕбӕх вӕййы, уый ссыгъдӕг кӕныны ӕгъдау. Сауджынмӕ-иу ӕй ӕрбакӕнӕнт:

³сауджын рӕсӕнуатӕй ӕддӕмӕ рацӕуӕд ӕмӕ йӕм ӕркӕсӕд. Рынчын йӕ низӕй сдзӕбӕх ис, уый куы фена,

⁴уӕд, ссыгъдӕг кӕнын кӕй хъӕуы, уыцы адӕймаджы тыххӕй ӕрбахӕссын кӕнӕд дыууӕ удӕгас маргъы — сыгъдӕг мӕргътӕ, стӕй кедры лыггаг, сырх-сырхид гӕппӕл ӕмӕ цӕвӕгхос.

⁵Мӕргътӕй иу, суадоны дон кӕм ис, ахӕм дурын мигӕнӕны сӕрмӕ аргӕвдын кӕнӕд.

⁶Удӕгас маргъы та райсӕд ӕмӕ йӕ кедры лыггаг, сырх гӕппӕл ӕмӕ цӕвӕгхосимӕ, доны сӕрмӕ кӕй аргӕвстой, уыцы маргъы туджы стулӕд.

⁷Хъотырӕй чи сдзӕбӕх ис, ууыл уыцы тугӕй авд хатты бапырх кӕнӕд ӕмӕ йӕ адӕмы раз банымайӕд сыгъдӕгыл. Удӕгас маргъы та ауадзӕд.

⁸Сыгъдӕггонд чи цӕуы, уый-иу йӕ дарӕс ныхсӕд, йӕ хил иууылдӕр адасӕд, йӕхи цынайӕд ӕмӕ уӕд уыдзӕни сыгъдӕг. Уый фӕстӕ йӕ бон уыдзӕни рӕсӕнуатмӕ бацӕуын, ӕцӕг ма-иу авд боны дӕргъы баззайӕд йӕ цатыры ӕдде.

⁹Ӕвдӕм бон та адасӕд йӕ сӕр, йӕ зачъетӕ ӕмӕ йе ’рфгуытӕ — йӕ хил иууылдӕр, ныхсӕд йӕ дарӕс, йӕхи цынайӕд, ӕмӕ уӕд ссыгъдӕг уыдзӕн.

¹⁰Ӕстӕм бон ӕрбакӕнӕд дыууӕ ӕнӕсахъат фыргуисты ӕмӕ иу ӕнӕсахъат далыс, хойраджы хуынӕн ӕрбахӕссӕд сойамӕст ӕвзаргӕ мӕнӕуы ссад — ефӕйы ӕртӕ дӕсӕймаг хайы, стӕй оливӕйы сойы кӕхц.

¹¹Ссыгъдӕг кӕныны ӕгъдау чи ӕххӕст кӕны, уыцы сауджын сыгъдӕггӕнинаджы йӕ хуынтимӕ ӕрлӕууын кӕнӕд Дунедарӕджы раз, Фембӕлды Цатыры къӕсӕры цур.

¹²Сауджын фыргуисттӕй иуы ракӕнӕд ӕмӕ йӕ оливӕйы сойы кӕхцимӕ фиддоны нывондӕн ӕрхӕссӕд, уый фӕстӕ сӕ Дунедарӕджы раз хӕрдмӕ сисӕд.

¹³Фыргуисты аргӕвдын хъӕуы Уаз бынаты, тӕригъӕды нывӕндтӕ ӕмӕ иууылсудзинаг нывӕндтӕ кӕм фергӕвдынц, уыцы ран. Фиддоны нывонд, тӕригъӕды нывондау, сауджыны хай у. Уый у иууылуаз.

¹⁴Сауджын фиддоны нывонды тугӕй райсӕд ӕмӕ дзы сыгъдӕггӕнинагӕн ацахорӕд йӕ рахиз хъусы кӕрон, йӕ рахиз къухы хистӕр ӕнгуылдз ӕмӕ йӕ рахиз къахы хистӕр ӕнгуылдз.

¹⁵Стӕй сойы кӕхцӕй йӕ галиу армы дзыхъхъы ӕркӕнӕд

¹⁶ӕмӕ дзы йӕ амонӕн ӕнгуылдзӕй Дунедарӕджы раз авд хатты бапырх кӕнӕд.

¹⁷Йӕ армы дзыхъхъы ма дзы цы сой баззайа, уымӕй та сыгъдӕггӕнинагӕн ацахорӕд йӕ рахиз хъусы кӕрон, йӕ рахиз къухы хистӕр ӕнгуылдз ӕмӕ йӕ рахиз къахы хистӕр ӕнгуылдз — фиддоны нывонды тугӕй кӕмыты ахуырст ӕрцыд, уым.

¹⁸Сауджынӕн ма йӕ армы дзыхъхъы цы сой баззайа, уымӕй сыгъдӕггӕнинагӕн йӕ сӕр байсӕрдӕд, ӕмӕ афтӕмӕй Дунедарӕджы раз йе ссыгъдӕг кӕныны ӕгъдау сӕххӕст кӕндзӕн.

¹⁹Уый фӕстӕ сауджын ӕрхӕссӕд тӕригъӕды нывонд, ӕмӕ афтӕмӕй уыцы адӕймаджы ссыгъдӕг кӕндзӕн. Стӕй аргӕвдӕд иууылсудзинаг нывонд

²⁰ӕмӕ йӕ хойраджы хуынимӕ нывондхӕссӕныл сӕвӕрӕд. Афтӕмӕй ссыгъдӕг кӕныны ӕгъдау сӕххӕст кӕндзӕн, ӕмӕ уыцы адӕймаг уыдзӕни сыгъдӕг.

²¹Кӕд сыгъдӕггӕнинаг мӕгуыр у, ӕмӕ ахӕм хуын ӕрбахӕссын йӕ къух нӕ амоны, уӕд фиддоны нывондӕн ӕрбакӕнӕд иу фыргуист, цӕмӕй йӕ сауджын хӕрдмӕ сиса Дунедарӕджы раз ӕмӕ уыцы адӕймагӕн йе ссыгъдӕг кӕныны ӕгъдау сӕххӕст кӕна. Хойраджы хуынӕн та райсӕд сойамӕст ӕвзаргӕ мӕнӕуы ссад — ефӕйы дӕсӕймаг хай, оливӕйы сойы кӕхц,

²²стӕй дыууӕ ӕхсинӕджы кӕнӕ дыууӕ бӕдул бӕлоны, йӕ къухы цы бафта, уый, сӕ иу — тӕригъӕды нывондӕн, иннӕ — иууылсудзинаг нывондӕн.

²³Ӕстӕм бон йе ссыгъдӕг кӕнынӕн уыдӕттӕ ӕрбахӕссӕд сауджынмӕ, Фембӕлды Цатыры къӕсӕрмӕ, Дунедарӕджы размӕ.

²⁴Фиддоны нывонд — фыргуист, стӕй оливӕйы сойы кӕхц — сауджын Дунедарӕджы раз хӕрдмӕ сисӕд.

²⁵Фыргуисты аргӕвдӕд фиддоны нывондӕн, уый фӕстӕ йын йӕ тугӕй райсӕд ӕмӕ дзы, сыгъдӕг кӕй кӕны, уымӕн ацахорӕд йӕ рахиз хъусы кӕрон, йӕ рахиз къухы хистӕр ӕнгуылдз ӕмӕ йӕ рахиз къахы хистӕр ӕнгуылдз.

²⁶Стӕй йӕ галиу къухы армы дзыхъхъы оливӕйы сой ӕркӕнӕд

²⁷ӕмӕ дзы йӕ амонӕн ӕнгуылдзӕй Дунедарӕджы раз авд хатты бапырх кӕнӕд.

²⁸Йӕ армы дзыхъхъы ма цы сой уа, уымӕй ма, сыгъдӕг кӕй кӕны, уымӕн ацахорӕд йӕ рахиз хъусы кӕрон, йӕ рахиз къухы хистӕр ӕнгуылдз ӕмӕ йӕ рахиз къахы хистӕр ӕнгуылдз — фиддоны нывонды тугӕй кӕмыты ахуырст ӕрцыд, уым.

²⁹Сауджынӕн ма йӕ армы дзыхъхъы цы сой баззайа, уымӕй, сыгъдӕг кӕй кӕны, уымӕн йӕ сӕр дӕр байсӕрдӕд, ӕмӕ афтӕмӕй Дунедарӕджы раз уыцы адӕймаджы ссыгъдӕг кӕныны ӕгъдау сӕххӕст кӕнӕд.

³⁰Уый фӕстӕ ӕхсинӕгтӕй кӕнӕ бӕлӕттӕй — сыгъдӕггӕнинагӕн йӕ къухы цы бафтыд, уыдонӕй —

³¹сауджын иу ӕрхӕссӕд тӕригъӕды нывондӕн, иннӕ та — иууылсудзинаг нывондӕн, хойраджы хуынимӕ иумӕ, ӕмӕ афтӕмӕй Дунедарӕджы раз сӕххӕст кӕнӕд уыцы адӕймаджы ссыгъдӕг кӕныны ӕгъдау.

³²Ахӕм у, хъотырӕй чи сдзӕбӕх ис, фӕлӕ мӕгуыр чи у, уыцы адӕймаджы ссыгъдӕг кӕныны ӕгъдау».

³³Дунедарӕг загъта Моисей ӕмӕ Ааронӕн:

³⁴«Сымах, кӕй уын дӕттын, уыцы Ханааны зӕхмӕ куы бацӕуат, ӕмӕ уыцы ран Ӕз искӕцы хӕдзарыл хъуына куы бафтауон,

³⁵уӕд-иу хӕдзары хицау сауджынмӕ бацӕуӕд ӕмӕ йын-иу зӕгъӕд, мӕ хӕдзарыл хъуынайы хуызӕн цыдӕр фӕзынди, зӕгъгӕ.

³⁶Цалынмӕ йӕм фенынмӕ нӕма ацыди, уӕдмӕ-иу сауджын бафӕдзӕхсӕд, цӕмӕй, хӕдзары цыдӕриддӕр ис, уыдон ӕддӕмӕ рахӕссой, науӕд хӕдзары алцыдӕр нымад ӕрцӕудзӕн ӕнӕсыгъдӕгыл.

³⁷Сауджын, хӕдзары къултыл цы бурбын цъӕх кӕнӕ сырхбын хъуына тӕппытӕ фӕзынд, уыдон бадзыхъхъытӕ сты, уый куы фена,

³⁸уӕд уырдыгӕй рацӕуӕд ӕмӕ хӕдзары дуар авд боны ӕмгъуыдмӕ сӕхгӕнын кӕнӕд.

³⁹Ӕвдӕм бон сауджын ногӕй ӕрбацӕуӕд ӕмӕ та йӕм ӕркӕсӕд. Хӕдзары къултыл хъуына схӕцыди, зӕгъгӕ,

⁴⁰уӕд, цы дуртыл фӕзынди, уыдон ракалын кӕнӕд, фӕссахар сӕ ӕнӕсыгъдӕг бынаты аппарын кӕнӕд.

⁴¹Хӕдзары къултӕ мидӕджырдыгӕй иууылдӕр хъӕуы ныххафын, сӕ хафӕнтӕ та фӕссахар ӕнӕсыгъдӕг бынаты акалын.

⁴²Уый фӕстӕ, кӕй ракалдтой, уыцы дурты бӕсты бавӕрӕнт ӕндӕр дуртӕ ӕмӕ хӕдзары къултӕ ногӕй байсӕрдӕнт.

⁴³Дуртӕ куы ракалой ӕмӕ хӕдзары къултӕ куы ныххафой, ногӕй сӕ куы байсӕрдой ӕмӕ та сыл уый фӕстӕ хъуына куы схӕца,

⁴⁴сауджын куы ӕрбацӕуа ӕмӕ та, хӕдзарыл хъуына схӕцыди, уый куы фена, уӕд уый фыдхъуына у. Уыцы хӕдзар ӕнӕсыгъдӕг у,

⁴⁵ӕмӕ йӕ фехалӕнт. Йӕ дуртӕ, йӕ хъӕдӕрмӕг ӕмӕ-иу ын йӕ къулсӕрстытӕ фӕссахармӕ, ӕнӕсыгъдӕг бынатмӕ, ахӕссӕнт.

⁴⁶Хӕдзармӕ йе ’хгӕды бонты чи бацӕуа, уый изӕрмӕ ӕнӕсыгъдӕг уыдзӕн.

⁴⁷Уыцы хӕдзары чи бахсӕвиуат кӕна, уый-иу йӕ дарӕс ныхсӕд. Ахӕм хӕдзары чи бахӕра, уый дӕр-иу ныхсӕд йӕ дарӕс.

⁴⁸Фӕлӕ сауджын, сӕ байсӕрдыны фӕстӕ хӕдзары къултӕ нал схъуына сты, уый куы фена, уӕд уыцы хӕдзар адӕмы раз банымайӕд сыгъдӕгыл, уымӕн ӕмӕ йыл хъуына нал ис.

⁴⁹Хӕдзар ссыгъдӕг кӕныны тыххӕй райсӕд дыууӕ маргъы, стӕй кедры лыггаг, сырх-сырхид гӕппӕл ӕмӕ цӕвӕгхос.

⁵⁰Мӕргътӕй иуы, суадоны дон кӕм ис, ахӕм дурын мигӕнӕны сӕрмӕ аргӕвдӕд.

⁵¹Уый фӕстӕ райсӕд кедры лыггаг, цӕвӕгхос, сырх гӕппӕл ӕмӕ удӕгас маргъы. Се ’ппӕты дӕр ӕргӕвст маргъы туджы стулӕд, суадоны донимӕ йӕ схӕццӕ кӕнӕд, афтӕмӕй ӕмӕ уыцы тугӕй хӕдзар авд хатты бапырх кӕнӕд.

⁵²Маргъы туг, суадоны дон, удӕгас маргъ, кедры лыггаг, цӕвӕгхос ӕмӕ сырх-сырхид гӕппӕлӕй хӕдзар ссыгъдӕг кӕнӕд,

⁵³удӕгас маргъы та фӕссахар ауадзӕд. Афтӕмӕй хӕдзар ссыгъдӕг кӕныны ӕгъдау сӕххӕст кӕндзӕн, ӕмӕ уӕд хӕдзар уыдзӕни сыгъдӕг.

⁵⁴Ахӕм ӕгъдау ис алы хъотыр ӕмӕ гӕбӕрнизӕн,

⁵⁵дарӕс ӕмӕ хӕдзары хъуынайӕн, тӕппӕлттӕ, цъутхӕлттӕ ӕмӕ урс стъӕлфытӕн,

⁵⁶цӕмӕй адӕм кӕрӕдзийӕ хицӕн кӕной ӕнӕсыгъдӕг ӕмӕ сыгъдӕг. Ахӕм ӕгъдау ис хъотырӕн».