Read Библи: Сыгъдӕг Левит 18 Bible Online

Левит 18 - Библи: Сыгъдӕг bible

Левит 18

¹Дунедарӕг Моисейӕн бафӕдзӕхста, цӕмӕй израилӕгтӕн зӕгъа:

²«Ӕз Дунедарӕг дӕн, уӕ Хуыцау.

³Кӕм цардыстут, уыцы Мысыры, стӕй, кӕдӕм уӕ кӕнын, уыцы Ханааны хъуыддӕгтӕ дӕр ма бафӕзмут. Се ’гъдӕуттыл сын ма ныххӕцут.

⁴Мӕ амындтытӕ ӕмӕ Мӕ уагӕвӕрдтӕ Мын ӕххӕст кӕнут: Ӕз Дунедарӕг дӕн, уӕ Хуыцау.

⁵Ӕххӕст Мын кӕнут Мӕ уагӕвӕрдтӕ ӕмӕ Мӕ амындтытӕ, уымӕн ӕмӕ, чи сӕ ӕххӕст кӕны, уый цӕрдзӕни сӕ фӕрцы. Ӕз Дунедарӕг дӕн.

⁶Хӕстӕг уын чи ӕййафа, ахӕм сылгоймагмӕ уӕ мачи бавналӕд, мачи ӕрӕмуат уӕд йемӕ: Ӕз Дунедарӕг дӕн.

⁷Ма ӕрӕмуат у дӕ мадимӕ — уымӕй дӕ фыды фегад кӕндзынӕ. Уый дӕ мад у, ма ӕрӕмуат у йемӕ.

⁸Ма ӕрӕмуат у дӕ фыды бинойнагимӕ — уымӕй дӕ фыды ӕгад кӕныс.

⁹Ма ӕрӕмуат у дӕ хоимӕ, фыд кӕнӕ мадӕй иу кӕимӕ стут, уыимӕ — иу хӕдзары райгуырдыстут ӕви нӕ, уый уӕлдай нӕу. Ма ӕрӕмуат у йемӕ.

¹⁰Ма ӕрӕмуат у дӕ фырты чызг кӕнӕ дӕ чызджы чызгимӕ. Ма ӕрӕмуат у семӕ — уымӕй дӕхи ӕгад кӕныс.

¹¹Ма ӕрӕмуат у, дӕ фыдӕй йын чи райгуырди, дӕ фыды бинойнаджы уыцы чызгимӕ — уый дӕ хо у.

¹²Ма ӕрӕмуат у дӕ фыды хоимӕ — уый дӕ фыдӕн йӕ туг, йе стӕг у.

¹³Ма ӕрӕмуат у дӕ мады хоимӕ — уый дӕ мадӕн йӕ туг, йе стӕг у.

¹⁴Дӕ фыды ’фсымӕры ма фегад кӕн — ма йын бавнал йӕ усмӕ. Уый дӕ хион у.

¹⁵Ма ӕрӕмуат у дӕ чындзимӕ — уый дӕ фырты ус у, ма ӕрӕмуат у йемӕ.

¹⁶Ма ӕрӕмуат у де ’фсымӕры усимӕ — уымӕй де ’фсымӕры ӕгад кӕныс.

¹⁷Ма ӕрӕмуат у сылгоймаг ӕмӕ йӕ чызгимӕ, ма ӕрӕмуат у сылгоймагӕн йӕ цоты чызджытимӕ, уымӕн ӕмӕ уыдон уыцы сылгоймагӕн йӕ туг, йе стӕг сты — уый ӕлгъаг ми у.

¹⁸Дӕ усы хойы ма ракур, дӕ усы удӕгасӕй ма ӕрӕмуат у йемӕ.

¹⁹Сылгоймагмӕ йе ’рвылмӕйон тугцыды рӕстӕг ма бавнал, уымӕн ӕмӕ уыцы бонты ӕнӕсыгъдӕг у.

²⁰Ма ӕрӕмуат у искӕй усимӕ, науӕд дӕхи фӕчъизи кӕндзынӕ.

²¹Дӕ цотӕй Молохӕн макӕй снывонд кӕн, ма фегад кӕн дӕ Хуыцауы ном. Ӕз Дунедарӕг дӕн.

²²Сылгоймагимӕ ӕмуат куыд ӕрцӕуынц, афтӕ нӕлгоймагимӕ ӕмуат ма ӕрцу — уый ӕлгъаг ми у.

²³Ма ӕриу у фосимӕ, дӕхи ма фӕчъизи кӕн. Сылгоймаг дӕр фосы бын ма ’рхуыссӕд — уый ӕлгъаг ми у.

²⁴Ахӕм хъуыддӕгтӕй уӕхи ма фӕчъизи кӕнут, уымӕн ӕмӕ уыдӕттӕй сӕхи фӕчъизи кодтой, Ӕз уӕ цурӕй кӕй сурын, уыцы адӕмтӕ.

²⁵Уыдоны тыххӕй зӕхх фӕчъизи ис. Ӕз зӕххӕй дзуапп ӕрдомдтон йӕ тӕригъӕды тыххӕй, ӕмӕ йӕ цӕрджыты расхуыста йӕхицӕй.

²⁶Фӕлӕ сымах ӕххӕст кӕнут Мӕ уагӕвӕрдтӕ ӕмӕ Мӕ амындтытӕ. Ахӕм ӕлгъаг митӕ сымахӕй мачи кӕнӕд, фӕнды израилаг уа, фӕнды уе ’хсӕн цӕрӕг ӕрцӕуӕггаг,

²⁷уымӕн ӕмӕ ӕппӕт уыдӕттӕ кодтой, ацы зӕххыл уӕ размӕ чи царди, уыцы адӕм, ӕмӕ зӕхх фӕчъизи ис.

²⁸Уӕдӕ ацы зӕхх куы фӕчъизи кӕнат, уӕд уӕ йӕхицӕй расхойдзӕн, уӕ размӕ дзы чи царди, уыцы адӕмты куыд расхуыста, афтӕ.

²⁹Уыцы ӕлгъаг митӕ чидӕриддӕр кӕна, уый йӕ адӕмӕй фӕхъӕудзӕн.

³⁰Мӕ фӕдзӕхстытӕ Мын ӕххӕст кӕнут — ма бафӕзмут, уӕ размӕ ам цы ӕлгъаг ӕгъдӕуттыл хӕст уыдысты, уыдон, науӕд фӕчъизи уыдзыстут. Ӕз Дунедарӕг дӕн, уӕ Хуыцау».