Read Библи: Сыгъдӕг Левит 21 Bible Online

Левит 21 - Библи: Сыгъдӕг bible

Левит 21

¹Дунедарӕг Моисейӕн загъта: «Фехъусын кӕн сауджынтӕн — Аарон ӕмӕ йӕ фырттӕн: сауджын йӕхи йӕ хӕстӕджы мардмӕ баввахс кӕнынӕй ма фӕчъизи кӕнӕд,

²хӕрз хион — мад, фыд, фырт, чызг, ӕфсымӕр

³кӕнӕ, нырма йемӕ иу хӕдзары чи цӕры, ахӕм ӕнӕмойгонд хо ма уӕд, уый йеддӕмӕ.

⁴Иннӕ хӕстӕджытӕй йын йӕхи никӕй тыххӕй фӕчъизи кӕнӕн ис.

⁵Сауджынтӕн сӕ сӕр дасын, сӕ зачъетӕ цыбыр кӕнын ӕмӕ сӕ буар лыгтӕ кӕнын не ’мбӕлы.

⁶Уаз уӕнт сӕ Хуыцауы раз ӕмӕ сӕ Хуыцауы ном ма фӕчъизи кӕнӕнт, уымӕн ӕмӕ уыдон хӕссынц нывӕндтӕ Дунедарӕгӕн, хойраг — сӕ Хуыцауӕн, ӕмӕ хъуамӕ уой уаз.

⁷Сауджын ма ракурӕд хӕтаг, чи фӕчъизи ис кӕнӕ йӕ лӕгӕй чи ахицӕн ис, ахӕм сылгоймаджы, уымӕн ӕмӕ уаз у Хуыцауы раз.

⁸Сауджыны уазыл нымай, уымӕн ӕмӕ уый хӕссы хойраг дӕ Хуыцауӕн. Сауджынмӕ уазы цӕстӕй кӕс, уымӕн ӕмӕ Ӕз Дунедарӕг дӕн, сымах уаз Кӕй фӕрцы стут, Уый.

⁹Сауджыны чызг хӕтынӕй куы фӕчъизи уа, уӕд йӕ фыды ӕгад кӕны, ӕмӕ йӕ арты басудзын хъӕуы.

¹⁰Йе ’рвад-ӕфсымӕрты ’хсӕн хистӕр цы сауджын у — йӕ сӕрыл сӕрдӕн сой уагъд кӕмӕн ӕрцыд ӕмӕ уаз чи сси, уаз дарӕс дарыны бар кӕмӕн ис, уымӕн не ’мбӕлы йӕ сӕрыхъуынтӕ уӕгъдӕй хӕссын, стӕй йӕ дарӕс фӕйнӕрдӕм рӕдувын.

¹¹Мард адӕймаг кӕм уа, уырдӕм ма бацӕуӕд: суанг йӕ мад ӕмӕ йӕ фыды тыххӕй дӕр ын йӕхи фӕчъизи кӕнӕн нӕй.

¹²Йӕ Хуыцауы Уаз Цӕрӕнӕй дӕр-иу ма рацӕуӕд ӕмӕ йӕ уымӕй ма фӕчъизи кӕнӕд, уымӕн ӕмӕ йӕ сӕрдӕн сойӕ снывонд чындӕуыд йӕ Хуыцауӕн. Ӕз — Дунедарӕг.

¹³Алчер хъуамӕ ӕрмӕстдӕр ӕнӕцыд чызг ракура.

¹⁴Нӕй йын ракурӕн нӕдӕр идӕдзы, нӕдӕр уагъд, хӕтаг кӕнӕ, чи фӕчъизи ис, ахӕм сылгоймаджы. Йӕ бон ракурын у ӕрмӕстдӕр ӕнӕцыд чызджы йӕхи мыггагӕй.

¹⁵Науӕд йӕ байзӕддӕгты йӕ мыггаджы ’хсӕн фӕчъизи кӕндзӕн. Ӕз Дунедарӕг дӕн, уаз Кӕй фӕрцы у, Уый».

¹⁶Дунедарӕг Моисейӕн бафӕдзӕхста, цӕмӕй Ааронӕн зӕгъа:

¹⁷«Фӕлтӕрӕй-фӕлтӕрмӕ дӕ байзӕддӕгтӕй истӕмӕй сахъат чи уа, уый нывӕндтӕ ма хӕссӕд йӕ Хуыцауӕн.

¹⁸Иу сахъат дӕр нывондхӕссӕнмӕ хӕстӕг ма бацӕуӕд: нӕдӕр куырм, нӕдӕр къуылых, нӕдӕр, ӕнахъинон цӕсгом кӕмӕн ис, уый, нӕдӕр, цӕнкуыл чи у,

¹⁹нӕдӕр, йӕ къах кӕнӕ йӕ къух саст кӕмӕн у, ахӕм,

²⁰нӕдӕр къуыпсин, нӕдӕр дӕлӕмӕдзыд, нӕдӕр урсцӕст, нӕдӕр хӕлмагджын, нӕдӕр уыдырнджын, нӕдӕр дзӕдӕл.

²¹Аароны байзӕддӕгтӕй истӕмӕй сахъат чи уа, уыдонӕй иуӕн дӕр Дунедарӕгӕн нывӕндтӕ хӕссӕн нӕй. Сахъатӕн Дунедарӕджы нывондхӕссӕнмӕ хойраг хӕссын не ’мбӕлы.

²²Йӕ Хуыцауы номыл хаст хойрагӕй, иууылуаз ӕмӕ йын уаз хуынтӕй хӕрыны бар ис.

²³Ӕрмӕст-иу ма бацӕуӕд ӕмбӕрзӕнмӕ, ма баввахс уӕд нывондхӕссӕнмӕ, уымӕн ӕмӕ сахъат у. Мӕ Уаз Цӕрӕн Мын ма фӕчъизи кӕнӕд. Ӕз Дунедарӕг дӕн, уаз Кӕй фӕрцы сты, Уый».

²⁴Моисей уыцы ныхӕстӕ фехъусын кодта Аарон ӕмӕ йӕ фырттӕн, стӕй ӕппӕт израилӕгтӕн.