Read Библи: Сыгъдӕг Левит 22 Bible Online

Левит 22 - Библи: Сыгъдӕг bible

Левит 22

¹Дунедарӕг Моисейӕн загъта:

²«Фехъусын кӕн Аарон ӕмӕ йӕ фырттӕн: израилӕгтӕ Хуыцауӕн цы кувинӕгтӕ ’рбахӕссынц, уыдонимӕ арӕхстгай архайут, Мӕ уаз ном Мын ма фегад кӕнут. Ӕз Дунедарӕг дӕн.

³Фӕлтӕрӕй-фӕлтӕрмӕ израилӕгтӕ Дунедарӕгӕн цы кувинӕгтӕ хӕссынц, уыдонмӕ уӕ байзӕддӕгтӕй ӕнӕсыгъдӕгӕй исчи куы бавнала, уӕд ӕй Ӕз фесафдзынӕн, нал ӕрлӕудзӕн Мӕ разы. Ӕз — Дунедарӕг.

⁴Аароны байзӕддӕгтӕй хъотырӕй рынчын чи уа кӕнӕ йӕ цъӕй кӕмӕн миза, уый кувинӕгтӕй ма хӕрӕд, цалынмӕ ссыгъдӕг уа, уӕдмӕ. Мардыл бандзӕвынӕй цы дзаума фӕчъизи ис, ууыл чи бандзӕва, йӕ мыг йӕхи ’гъдауӕй кӕмӕн акӕла,

⁵исты ӕнӕсыгъдӕг хилӕгой кӕнӕ ӕнӕсыгъдӕг адӕймагыл чи бандзӕва (цавӕрфӕнды ӕнӕсыгъдӕгдзинад дӕр уӕд),

⁶— уыдӕттӕй истӕуыл чидӕриддӕр бандзӕва, уый изӕрмӕ ӕнӕсыгъдӕг уыдзӕн. Цалынмӕ йӕхи нӕ цынайа, уӕдмӕ йын кувинӕгтӕй хӕрыны бар нӕй.

⁷Хур куы аныгуыла, уӕд ссыгъдӕг уыдзӕн, ӕмӕ уӕд йӕ бон уыдзӕни кувинӕгтӕй бахӕрын, уымӕн ӕмӕ уый йӕ хойраг у.

⁸Аароны байзӕддӕгтӕй хӕдмӕл фыд кӕнӕ, сырдтӕ кӕй ныттыдтой, ахӕм цӕрӕгойы фыд мачи бахӕрӕд — фӕчъизи уыдзӕн. Ӕз Дунедарӕг дӕн.

⁹Мӕ уагӕвӕрдтӕ Мын ӕххӕст кӕнӕнт, цӕмӕй тӕригъӕды ма бацӕуой ӕмӕ ма амӕлой, сӕхи сыл кӕй атигъ кодтой, уый тыххӕй. Ӕз Дунедарӕг дӕн, уаз Кӕй фӕрцы сты, Уый.

¹⁰Ӕддагон ма бахӕрӕд кувинӕгтӕй: нӕдӕр сауджынӕн йӕ уазӕг, нӕдӕр йе ’ххуырст.

¹¹Фӕлӕ, сауджын ӕлхӕнгӕ кӕй бакӕна, уымӕн йӕ бон у кувинӕгтӕй хӕрын. Сауджыны хойрагӕй хӕрын ӕмбӕлы, йӕ хӕдзары чи райгуыра, уыцы цагъарӕн дӕр.

¹²Сауджыны чызг, сауджынты мыггагӕй чи нӕу, ахӕммӕ куы смой кӕна, уӕд ын кувинӕгтӕй хӕрыны бар нӕ уыдзӕн.

¹³Фӕлӕ идӕдзӕй куы баззайа кӕнӕ йӕ лӕгӕй куы ахицӕн уа ӕмӕ, цот ын нӕ рацыди, афтӕмӕй фӕстӕмӕ йӕ цӕгатмӕ куы раздӕха, уӕд ын йӕ фыды хойрагӕй хӕрыны бар уыдзӕн. Ӕддагӕттӕй дзы мачи фӕхъӕстӕ уӕд.

¹⁴Кувинагӕй ӕнӕбары чи бахӕра, уый-иу сауджынӕн уыцы кувинаджы аргъ бафидӕд, ноджы ма-иу ӕм йӕ аргъы фӕндзӕм хай дӕр бафтауӕд.

¹⁵Сауджынтӕ дӕр-иу, израилӕгтӕ Дунедарӕгӕн цы уаз хуынтӕ ӕрбахӕссынц, уыдон ма фӕчъизи кӕнӕнт.

¹⁶Ма дзы хӕрӕнт, ма бацӕуӕнт тӕригъӕды, науӕд сӕ азым фидинаг фӕуыдзӕн. Ӕз Дунедарӕг дӕн, уаз Кӕй фӕрцы сты, Уый».

¹⁷Дунедарӕг Моисейӕн загъта:

¹⁸«Фехъусын кӕн Аарон ӕмӕ йӕ фырттӕн, стӕй ӕппӕт израилӕгтӕн: Израилы адӕмӕй кӕнӕ се ’хсӕн цӕрӕг ӕрцӕуӕггӕгтӕй исчи сомыйы фӕдыл кӕнӕ барвӕндӕй Дунедарӕгӕн иууылсудзинаг нывонд куы хӕсса,

¹⁹уӕд, цӕмӕй Хуыцауы зӕрдӕ балхӕна, уый тыххӕй йӕ нывонд хъуамӕ уа ӕнӕсахъат ӕмӕ нӕл: гал, фыр кӕнӕ цӕу.

²⁰Сахъат фос нывондӕн ма хӕссут, уымӕн ӕмӕ барст нӕ уыдзӕн.

²¹Исчи сомыйы фӕдыл кӕнӕ йӕ зӕрдӕйы фӕндонмӕ гӕсгӕ стурвосӕй кӕнӕ лыстӕг фосӕй фидыды нывонд куы хӕсса Дунедарӕгӕн, уӕд, цӕмӕй барст ӕрцӕуа, уый тыххӕй равзарӕд ӕнӕсахъат фос, иу аипп дӕр кӕмӕ нӕ уа, ахӕм.

²²Куырм, сахъат кӕнӕ уӕнгсаст чи у, хӕфдзӕстытӕ, хӕлмаг кӕнӕ уыдырн кӕуыл ис, ахӕм фос Дунедарӕгӕн ма хӕссут арты нывондӕн, ма сӕ ӕвӕрут Дунедарӕджы нывондхӕссӕныл.

²³Стур кӕнӕ фысӕн йӕ къӕхтӕ ӕгӕр даргъ кӕнӕ ӕгӕр цыбыр куы уой, уӕд ӕй ис ӕрхӕссӕн бархийы нывондӕн. Сомыйы нывондӕн ӕй нӕй ӕрхӕссӕн, уымӕн ӕмӕ барст нӕ уыдзӕн.

²⁴Йӕ хъӕппытӕ цъӕл, пырх, тынд кӕмӕн сты кӕнӕ ӕрдызт чи у, ахӕм фос-иу Дунедарӕгӕн нывондӕн ма хӕссут. Ахӕм ми ма бакӕнут уӕ зӕххыл.

²⁵Ӕцӕгӕлӕттӕй дӕр ма райсут ахӕм фос уӕ Хуыцауӕн нывондӕн ӕрхӕссынӕн. Сахъат кӕй сты ӕмӕ сӕм аиппытӕ кӕй ис, уымӕ гӕсгӕ барст нӕ уыдзысты».

²⁶Дунедарӕг Моисейӕн загъта:

²⁷«Ногзад род, уӕрыкк кӕнӕ сӕныччы авд боны ныууадзын хъӕуы йӕ мадимӕ, ӕстӕм бонӕй фӕстӕмӕ йӕ Дунедарӕгӕн нывондӕн ӕрхӕссын ӕмбӕлы.

²⁸Хъуг кӕнӕ фысы йӕ род кӕнӕ йӕ уӕрыккимӕ уыцы иу бон ма ӕргӕвдут.

²⁹Дунедарӕгӕн арфӕйы нывонд куы хӕссат, уӕд ӕй ӕрхӕссут афтӕ, цӕмӕй барст уа.

³⁰Бахӕрын ӕй хъӕуы тӕккӕ уыцы бон, райсоммӕ дзы мацы ныууадзут. Ӕз Дунедарӕг дӕн.

³¹Мӕ фӕдзӕхстытӕ Мын ӕххӕст кӕнут. Ӕз Дунедарӕг дӕн.

³²Мӕ уаз ном Мын ма фегад кӕнут, уазыл Мӕ нымайӕнт израилӕгтӕ. Ӕз Дунедарӕг дӕн, сымах уаз Кӕй фӕрцы стут, Уый.

³³Ӕз уӕ ракодтон Мысыры зӕххӕй, цӕмӕй уон уӕ Хуыцау. Ӕз Дунедарӕг дӕн».