Read Библи: Сыгъдӕг Левит 23 Bible Online

Левит 23 - Библи: Сыгъдӕг bible

Левит 23

²цӕмӕй израилӕгтӕн зӕгъа: «Мӕнӕ — Дунедарӕджы бӕрӕгбӕттӕ, ӕмӕ-иу хъуамӕ уазӕмбырдтӕ скӕнат. Уыцы бонтӕ снысан кодтон Мӕхӕдӕг.

³Ӕхсӕз боны кусут, ӕвдӕм бон та ӕнцойбон у — сабат, уыцы бон-иу уазӕмбырд скӕнут. Мацы-иу бакусут, кӕмфӕнды куы цӕрат, уӕд дӕр: уый Дунедарӕджы сабат у.

⁴Мӕнӕ Дунедарӕджы бӕрӕгбӕттӕ, уазӕмбырдтӕ. Бӕрӕг кӕнын сӕ хъӕуы бӕлвырд афонты.

⁵Фыццаг мӕйы цыппӕрдӕсӕм бон, дыууӕизӕрастӕу — Дунедарӕджы Куадзӕн.

⁶Уыцы мӕйы фынддӕсӕм бон та райдайы Донгонд дзулты бӕрӕгбон, Дунедарӕджы кадӕн. Авд боны дӕргъы хӕрут донгонд дзултӕ.

⁷Фыццаг бон-иу уазӕмбырд скӕнут, мацы-иу бакусут.

⁸Авд боны дӕргъы Дунедарӕгӕн нывӕндтӕ хӕссут, ӕвдӕм бон та уазӕмбырд скӕнут: мацы-иу бакусут».

⁹Дунедарӕг Моисейӕн загъта: «Фехъусын кӕн израилӕгтӕн, зӕгъ сын:

¹⁰кӕй уын дӕттын, уыцы зӕхмӕ куы бацӕуат ӕмӕ уым уӕ хуымтӕ куы ӕркӕрдат, уӕд-иу уӕ хоры фыццаг куырис ӕрбахӕссут сауджынмӕ.

¹¹Уый-иу уыцы куырис Дунедарӕджы раз хӕрдмӕ сисӕд, цӕмӕй Дунедарӕджы зӕрдӕ балхӕна. Сабаты фӕстӕ-иу ӕй дыккаг бон сисӕд.

¹²Куырис сисыны бон-иу Дунедарӕгӕн иууылсудзинаг нывондӕн ӕрхӕссут ӕнӕсахъат фыргуист.

¹³Ноджы ма Дунедарӕгӕн арты нывондӕн, ӕхцон хӕрздӕфӕн, ӕрбахӕссут хойраджы хуын — сойамӕст ӕвзаргӕ мӕнӕуы ссад, ефӕйы дыууӕ дӕсӕймаг хайы, стӕй гины цыппӕрӕм хай сӕн.

¹⁴Мадӕр дзул, мадӕр цӕкуытӕ, мадӕр хъуыдыды нартхор бахӕрут, цалынмӕ уӕ Хуыцауӕн иууылсудзинаг нывонд ӕрбахӕссат, уӕдмӕ. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ, кӕмдӕриддӕр цӕрат, уым.

¹⁵Сабаты, куырис хӕрдмӕ сисыны фӕстӕ цы бон уа, уымӕй анымайут авд ӕнӕхъӕн къуырийы.

¹⁶Фӕндзайӕм бон-иу, ӕвдӕм сабаты фӕстӕ, Дунедарӕгӕн уӕ ног тыллӕгӕй хойраджы хуын ӕрбахӕссут.

¹⁷Кӕмдӕриддӕр цӕрат — хӕрдмӕ сисынӕн-иу ӕрбахӕссут дыууӕ дзулы. Хъуамӕ конд уой ӕвзаргӕ мӕнӕуы ссадӕй — ефӕйы дыууӕ дӕсӕймаг хайӕ, ӕнхъызт хыссӕйӕ — уӕ хоры сӕрӕй Дунедарӕгӕн хуын.

¹⁸Уыцы дзултӕй уӕлдай ма-иу ӕрбакӕнут авд ӕнӕсахъат фыргуисты, стӕй иу гал ӕмӕ дыууӕ фыры. Уыдон уыдзысты иууылсудзинаг нывӕндтӕ Дунедарӕгӕн, хойраджы хуын ӕмӕ сӕнимӕ — Дунедарӕгӕн арты нывондӕн, ӕхцон хӕрздӕфӕн.

¹⁹Ноджы ма-иу тӕригъӕды нывондӕн ӕрхӕссут цӕу, дыууӕ фыргуисты та — фидыды нывондӕн.

²⁰Сауджын-иу дыууӕ фыргуисты Дунедарӕджы раз хӕрдмӕ сисӕд хоры сӕртӕй конд дзултимӕ. Уыдон уыдзысты Дунедарӕджы уаз хай, сауджыны хай.

²¹Тӕккӕ уыцы бон-иу уазӕмбырд скӕнут, мацы-иу бакусут. Уый уын уыдзӕни мыггагмӕйы уагӕвӕрд, кӕмдӕриддӕр цӕрат, уым, фӕлтӕрӕй-фӕлтӕрмӕ.

²²Уӕ тыллӕг куы ӕфснайат, уӕд-иу уӕ хуымты кӕрӕттӕ ма ныккӕрдут, тыллӕгӕй ма хуымы цы ’фсиртӕ баззайа, уыдон дӕр ма ӕруидзут, мӕгуыр ӕмӕ ӕрцӕуӕггагӕн сӕ ныууадзут. Ӕз Дунедарӕг дӕн, уӕ Хуыцау».

²³Дунедарӕг Моисейӕн загъта:

²⁴«Израилӕгтӕн фехъусын кӕн: ӕвдӕм мӕйы фыццаг бон уын уӕд ӕнцойбон, сыкъауадындзты уаст-иу уазӕмбырдмӕ фӕсидӕд.

²⁵Мацы-иу бакусут, Дунедарӕгӕн-иу нывӕндтӕ ӕрхӕссут».

²⁶Дунедарӕг Моисейӕн бафӕдзӕхста:

²⁷«Ӕвдӕм мӕйы дӕсӕм бон уыдзӕни Тӕригъӕдтӕ ныббарыны бон, ӕмӕ-иу уазӕмбырд скӕнут: ком дарут ӕмӕ-иу Дунедарӕгӕн арты нывӕндтӕ ӕрхӕссут.

²⁸Мацы-иу бакусут уыцы бон, уымӕн ӕмӕ уый у Тӕригъӕдтӕ ныббарыны бон. Дунедарӕджы, уӕ Хуыцауы раз, уыцы бон сӕххӕст вӕййы уӕ тӕригъӕдтӕ ныббарыны ӕгъдау.

²⁹Уыцы бон ком чи нӕ дара, уый йӕ адӕмӕй фӕхъӕудзӕн.

³⁰Уыцы бон исты чи бакуса, уый йӕ адӕмӕй фӕхъӕудзӕн.

³¹Мацы-иу бакусут. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ, кӕмдӕриддӕр цӕрат, уым.

³²Сабатау ӕнцойбон у уый сымахӕн, ӕмӕ-иу ком дарут. Уыцы мӕйы фарӕстӕм боны изӕрӕй дыккаг боны изӕрмӕ бӕрӕг кӕнут ӕнцойбон».

³³Дунедарӕг Моисейӕн загъта: «Израилӕгтӕн фехъусын кӕн:

³⁴ӕвдӕм мӕйы фынддӕсӕм бонӕй фӕстӕмӕ авд боны дӕргъы уыдзӕни Халагъудты бӕрӕгбон — Дунедарӕджы кадӕн.

³⁵Фыццаг бон-иу уазӕмбырд скӕнут, мацы-иу бакусут.

³⁶Авд боны дӕргъы Дунедарӕгӕн хӕссут нывӕндтӕ. Ӕстӕм бон-иу уазӕмбырд скӕнут, Дунедарӕгӕн арты нывӕндтӕ ӕрхӕссут. Уый у бӕрӕгбоны фӕстаг бон, мацы-иу бакусут.

³⁷Адон сты Дунедарӕджы бӕрӕгбӕттӕ. Уыцы бонты хъуамӕ кӕнат уазӕмбырдтӕ, Дунедарӕгӕн хӕссат иууылсудзинӕгтӕ, хойраджы хуынтӕ ӕмӕ нывӕндтӕ сӕнимӕ, уыцы бонты куыд ӕмбӕлы, афтӕ.

³⁸Ӕппӕт уыдӕттӕ кӕнут, сабаттӕй — Дунедарӕджы бонтӕй, стӕй уе ’ппӕт лӕвӕрттӕй, ардбахӕрд ӕмӕ бархийы нывӕндтӕй уӕлдай.

³⁹Ӕвдӕм мӕйы фынддӕсӕм бонӕй, уӕ тыллӕг ӕфснайд куы фӕуат, уыцы бонӕй фӕстӕмӕ-иу авд боны дӕргъы бӕрӕг кӕнут Дунедарӕджы бӕрӕгбон[1]. Фыццаг бон дӕр ӕмӕ ӕстӕм бон дӕр уын уӕнт ӕнцойбонтӕ.

⁴⁰Фыццаг бон-иу райсут уӕ бӕлӕсты хуыздӕр дыргътӕй, стӕй пальмӕтӕ, сыфтӕрджын бӕлӕстӕ ӕмӕ донхӕристы къалиутӕ; авд боны дӕргъы цин кӕнут Дунедарӕджы, уӕ Хуыцауы раз.

⁴¹Уыцы бӕрӕгбон, Дунедарӕджы бӕрӕгбон, ӕрвылаз дӕр бӕрӕг кӕнут ӕвдӕм мӕйы — авд боны дӕргъы. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ; ӕвдӕм бон-иу бӕрӕг кӕнут уыцы бӕрӕгбон.

⁴²Авд боны дӕргъы-иу халагъудты цӕрут. Израилы алы бынӕттон цӕрӕг дӕр уыцы бонты цӕрӕд халагъуды,

⁴³цӕмӕй фӕлтӕрӕй-фӕлтӕрмӕ уӕ байзӕддӕгтӕ зоной, Ӕз израилӕгты Мысыры зӕххӕй куы ракодтон, уӕд сӕ халагъудты кӕй ӕрцӕрын кодтон, уый. Ӕз Дунедарӕг дӕн, уӕ Хуыцау».

⁴⁴Моисей израилӕгтӕн фехъусын кодта Дунедарӕджы бӕрӕгбӕтты тыххӕй.