Read Библи: Сыгъдӕг Левит 24 Bible Online

Левит 24 - Библи: Сыгъдӕг bible

Левит 24

¹Дунедарӕг Моисейӕн загъта:

²«Израилӕгтӕн бафӕдзӕхс, цӕмӕй дын оливӕйы сой ӕрбахӕссой цырагъӕн — сыгъдӕг, къухӕй лӕмӕрст чи у, ахӕм, цӕмӕй цырагъ кӕддӕриддӕр судза.

³Аарон-иу йӕ хъус дарӕд, цӕмӕй Дунедарӕджы раз, Фембӕлды Цатыры, Фидыды Чырыны мидӕмбӕрзӕны ӕдде, изӕрӕй райсоммӕ цырӕгътӕ ма ахуыссой, уымӕ. Уый уын уыдзӕни мыггагмӕйы уагӕвӕрд, фӕлтӕрӕй-фӕлтӕрмӕ.

⁴Дунедарӕджы раз сыгъдӕг сыгъзӕринӕй конд цырагъдарӕныл цы цырӕгътӕ ис, уыдонмӕ-иу ӕдзухдӕр йӕ хъус дарӕд.

⁵Райс ӕвзаргӕ мӕнӕуы ссад ӕмӕ дзы сфыц дыууадӕс тӕнӕг дзулы, алы дзулыл дӕр ссад ефӕйы дыууӕ дӕсӕймаг хайы куыд ацӕуа, афтӕ.

⁶Дунедарӕджы раз-иу сӕ сыгъдӕг сыгъзӕринӕй конд фынгыл дыууӕ рӕнхъӕй ӕрӕвӕр, алы рӕнхъы дӕр ӕхсӕз дзулы куыд уа, афтӕ.

⁷Алы рӕнхъӕн дӕр-иу йӕ фарсмӕ ӕрӕвӕр сыгъдӕг буд, хуын иууылдӕр Дунедарӕджы кӕй у, уый нысанӕн, арты нывондӕн.

⁸Дунедарӕджы раз сӕ ӕвӕрын хъӕуы алы сабаты дӕр, ӕдзухдӕр. Уый у мыггагмӕйы фӕдзӕхст израилӕгтӕн.

⁹Уыдон уыдзысты Аарон ӕмӕ йӕ байзӕддӕгты хай. Хӕрдзысты сӕ уаз бынаты, уымӕн ӕмӕ уый у иууылсыгъдӕг, Дунедарӕджы номыл хаст кувинӕгты ӕхсӕн уый сӕ хай у».

¹⁰Израилӕгты рӕсӕнуаты уыдис иу лӕг, йӕ мад — израилаг, йӕ фыд — мысыраг. Йӕ мад Шеломит уыди Даны хӕдзарвӕндагӕй, Диврийы чызг. Уыцы лӕг фӕхыл ис ӕндӕр израилагимӕ ӕмӕ фаудта Дунедарӕджы ном.

¹²Ахӕстоны йӕ дардтой ӕмӕ ӕнхъӕлмӕ кастысты Дунедарӕджы уынаффӕмӕ.

¹³Дунедарӕг Моисейӕн загъта:

¹⁴«Уыцы фауӕджы рӕсӕнуатӕй ӕддӕмӕ ракӕн. Чидӕриддӕр ӕй фехъуыста, уыдон ын сӕ къухтӕ йӕ сӕрыл ӕрӕвӕрӕнт ӕмӕ йӕ адӕм дурты бын фӕкӕнӕнт.

¹⁵Израилӕгтӕн зӕгъ: „Йӕ Хуыцауы чидӕриддӕр ралгъита, уый йӕ тӕригъӕды тыххӕй ӕфхӕрд баййафдзӕн.

¹⁶Дунедарӕджы ном чи рафауа, уый мард ӕрцӕуӕд: адӕм-иу ӕй иумӕ дурты бын фӕкӕнӕнт. Ӕрцӕуӕггаг ӕви бынӕттон цӕрӕг уа, — Дунедарӕджы ном чи рафауа, уый хъӕуы амарын.

¹⁷Адӕймаджы чи амара, уый мард ӕрцӕуӕд.

¹⁸Искӕй фосӕй чи амара, уый йӕ бафидӕд, сӕр сӕры ныхмӕ.

¹⁹Йӕ адӕмӕй искӕй чи фӕсахъат кӕна, уымӕн йӕхицӕн дӕр афтӕ бакӕнын хъӕуы:

²⁰стӕгсасты ныхмӕ — стӕгсаст, цӕст — цӕсты ныхмӕ, дӕндаг — дӕндаджы ныхмӕ. Искӕй куыд фӕсахъат кодта, афтӕ йын йӕхи дӕр хъӕуы фӕсахъат кӕнын.

²¹Фос чи амара, уый йӕ бафидӕд, адӕймаджы чи амара, уый та мард ӕрцӕуӕд.

²²Ӕрцӕуӕггагӕн дӕр ӕмӕ бынӕттон цӕрӕгӕн дӕр уӕм иу ӕгъдау уӕд, уымӕн ӕмӕ Ӕз Дунедарӕг дӕн, уӕ Хуыцау“».

²³Моисей уыдӕттӕ израилӕгтӕн радзырдта, ӕмӕ уыдон бакодтой, Дунедарӕг Моисейӕн куыд бафӕдзӕхста, афтӕ: ӕлгъитӕджы рӕсӕнуатӕй ӕддӕмӕ ракодтой ӕмӕ йӕ дурты бын фӕкодтой.