Read Библи: Сыгъдӕг Левит 25 Bible Online

Левит 25 - Библи: Сыгъдӕг bible

Левит 25

¹Дунедарӕг Синайы хохыл Моисейӕн загъта: «Фехъусын кӕн израилӕгтӕн:

²кӕй уын дӕттын, уыцы зӕхмӕ куы бацӕуат, уӕд-иу алы ӕвдӕм аз дӕр уыцы зӕххыл мацы кусут, уымӕн ӕмӕ уый Дунедарӕджы сабат у.

³Ӕхсӕз азы дӕргъы уӕ хуымтӕ таут ӕмӕ уӕ сӕнӕфсиртӕ ’хсӕдут — уӕ зӕххы бӕркад ӕфснайут,

⁴ӕвдӕм аз та зӕххӕн уӕд сабаты ӕнцой, Дунедарӕджы сабат. Уӕ хуымтӕ-иу ма байтаут ӕмӕ-иу уӕ сӕнӕфсиртӕ ма бахсӕдут.

⁵Уӕ хуымты йӕхи ’гъдауӕй цы ӕрзайа, уыдон-иу ма ӕркӕрдут; кӕй нӕ бахсӕстой, уыцы сӕнӕфсиры цупӕлттӕ дӕр-иу ма ӕртонут. Уыцы аз уӕд ӕнцойы аз зӕххӕн.

⁶Сабаты аз зӕххыл цыдӕриддӕр ӕрзайа, уый уыдзӕни уӕ хойраг — уӕхицӕн, уӕ цагъар нӕлгоймӕгтӕн ӕмӕ уӕ цагъар сылгоймӕгтӕн, уе ’ххуырстытӕн, уе ’хсӕн цӕрӕг ӕрцӕуӕггӕгтӕн,

⁷уӕ фосӕн ӕмӕ, уӕ зӕххыл хъӕддаг сырдӕй цы ис, уыдонӕн.

⁸Анымайут авд хатты авд азы, ӕдӕппӕтӕй авд авды куыд уой. Ӕмӕ сабаты азтӕй авд куы рацӕуа — фараст ӕмӕ дыууиссӕдз азы,

⁹уӕд ӕвдӕм мӕйы дӕсӕм бон, Тӕригъӕдтӕ ныббарыны бон, уӕ бӕстӕйы сыкъауадындзтӕй уасут

¹⁰ӕмӕ афтӕмӕй фӕндзайӕм аз банымайут уазыл. Уӕ зӕххыл-иу алкӕмӕн дӕр фехъусын кӕнут, сӕрибар сын лӕвӕрд кӕй цӕуы, уый. Уыцы аз уын уыдзӕни Ӕрдӕгсӕдӕйон аз, алчидӕр уӕ хъуамӕ раздӕха йӕ зӕххы хаймӕ, йӕхи мыггагмӕ.

¹¹Уыцы аз-иу мацы байтаут, уӕ хуымты йӕхи ’гъдауӕй цы ӕрзайа, уыдон-иу ма ӕркӕрдут, кӕй нӕ бахсӕстой, уыцы сӕнӕфсиры цупӕлттӕ-иу ма ӕртонут, уымӕн ӕмӕ фӕндзайӕм аз у Ӕрдӕгсӕдӕйон аз, уазыл ӕй нымайут. Ӕрмӕстдӕр уӕ хуымты йӕхи ’гъдауӕй цы ’рзайа, уыдон-иу хӕрут.

¹²

¹³Ӕрдӕгсӕдӕйон азы-иу алчидӕр фӕстӕмӕ йӕ зӕххы хаймӕ раздӕхӕд.

¹⁴Де ’фсымӕрӕн, израилагӕн, зӕхх куы уӕй кӕнай кӕнӕ дзы куы ӕлхӕнай, уӕд-иу кӕрӕдзийы ма сайут.

¹⁵Зӕхх дзы куы ӕлхӕнай, уӕд-иу банымай, Ӕрдӕгсӕдӕйон азы фӕстӕ цал азы рацыди, уый. Зӕхх дын чи уӕй кӕна, уый дӕр банымайӕд, Ӕрдӕгсӕдӕйон азы ’рцыдмӕ уыцы зӕххӕй тыллӕг цал азы исӕн уыдзӕн, уый.

¹⁶Уыцы азтӕ цас фылдӕр уой, уыйас зӕххӕн йӕ аргъ фылдӕр уӕд, цас къаддӕр уой, уыйас та — къаддӕр, уымӕн ӕмӕ дын уӕй кӕны ӕрмӕстдӕр уал азы тыллӕг.

¹⁷Уӕ кӕрӕдзи-иу ма сайут, фӕлӕ тӕрсут уӕ Хуыцауӕй. Ӕз Дунедарӕг дӕн, уӕ Хуыцау.

¹⁸Ӕххӕст Мын кӕнут Мӕ уагӕвӕрдтӕ ӕмӕ Ме ’гъдӕуттӕ, ӕмӕ уӕд ацы зӕххыл ӕдасӕй цӕрдзыстут.

¹⁹Зӕхх уын йӕ бӕркад дӕтдзӕн, ӕмӕ ӕфсӕст уыдзыстут.

²⁰Сымах бафӕрсдзыстут: „Куы ницы байтауӕм ӕмӕ тыллӕг куынӕ ӕрӕмбырд кӕнӕм, уӕд ӕвдӕм аз цы хӕрдзыстӕм?“

²¹Ӕз уын ӕхсӕзӕм аз раарфӕ кӕндзынӕн, ӕмӕ уӕ зӕхх ӕртӕ азы бӕркад ратдзӕн.

²²Ӕстӕм аз байтаудзыстут уӕ хуымтӕ, хӕргӕ та нырма кӕндзыстут уӕ раздӕры тыллӕгӕй. Цалынмӕ фарӕстӕм азы тыллӕг ӕрзайа, уӕдмӕ уын фаг уыдзӕн.

²³Зӕхх мыггагмӕ ауӕй кӕнӕн нӕй, уымӕн ӕмӕ уый Мӕн у, сымах та стут, Мӕ зӕххыл чи ӕрцард, ахӕм ӕрцӕуӕггӕгтӕ.

²⁴Зӕхх куы ӕлхӕнат, уӕд хъуамӕ бар раттат фӕстӕмӕ йӕ балхӕнынӕн.

²⁵Де ’фсымӕр, израилаг, куы смӕгуыр уа ӕмӕ йӕ зӕххы хай куы ауӕй кӕна, уӕд-иу йӕ хӕстӕгдӕр къабӕзтӕй исчи ӕрбацӕуӕд ӕмӕ йын йӕ зӕхх фӕстӕмӕ балхӕнӕд.

²⁶Чи йӕ балхӕна, ахӕм къабаз ын куынӕ разына, фӕлӕ фӕстӕдӕр йӕхӕдӕг куы схъӕздыг уа ӕмӕ йӕ балхӕнынхъом куы суа,

²⁷уӕд-иу анымайӕд, йӕ зӕхх ауӕй кӕнынӕй цал азы рацыди, уый ӕмӕ ӕлхӕнӕгӕн, цы азтӕ ма баззади, уыдоны аргъ бафидӕд. Уӕд фӕстӕмӕ йӕ зӕххы хаймӕ раздӕхын йӕ бон суыдзӕн.

²⁸Кӕд ӕмӕ уыцы аргъ бафидыны фаг не суа, уӕд та, кӕй ауӕй кодта, уыцы зӕхх Ӕрдӕгсӕдӕйон азмӕ баззайдзӕн, чи йӕ балхӕдта, уый къухы. Уыцы аз, чи йӕ балхӕдта, уый уыцы зӕххы хай суӕгъд кӕндзӕн, ӕмӕ, чи йӕ ауӕй кодта, фӕстӕмӕ уый исбонмӕ раздӕхдзӕн.

²⁹Исчи быруйӕ ӕхгӕд сахары йӕ хӕдзар куы ауӕй кӕна, уӕд ын, йӕ ауӕй кӕнынӕй цалынмӕ афӕдз нӕ рацӕуа, уӕдмӕ фӕстӕмӕ балхӕнӕн уыдзӕн. Уыцы рӕстӕджы дӕргъы йын балхӕнӕн уыдзӕни.

³⁰Афӕдзы кӕронмӕ, бырухгӕд сахары цы хӕдзар ис, уый фӕстӕмӕ ӕлхӕд не ’рцыди, зӕгъгӕ, уӕд мыггагмӕ суыдзӕни йӕ балхӕнӕджы, стӕй уымӕн йӕ байзӕддӕгты исбон; Ӕрдӕгсӕдӕйон азы дӕр нал суӕгъд уыдзӕн.

³¹Ӕнӕбыру хъӕуты цы хӕдзӕрттӕ ис, уыдон та нымад цӕуынц зӕххы хӕйттыл: фӕстӕмӕ сын балхӕнӕн ис, Ӕрдӕгсӕдӕйон азы сӕ суӕгъд кӕнын хъӕуы.

³²Фӕлӕ левиттӕн сӕ сахарты кӕддӕриддӕр бар ис сӕ хӕдзӕрттӕ фӕстӕмӕ балхӕнынӕн.

³³Левитты сахары цы хӕдзар ауӕй кӕной, уый балхӕнӕн ис, Ӕрдӕгсӕдӕйон азы йӕ суӕгъд кӕнын хъӕуы, уымӕн ӕмӕ, левитты сахарты цы хӕдзӕрттӕ ис, уыдон израилӕгты ’хсӕн сты сӕ исбон.

³⁴Сӕ сахарты раз цы сӕрвӕттӕ ис, уыдонӕн та уӕйгӕнӕн нӕй, уымӕн ӕмӕ мыггагмӕ сӕ исбон сты.

³⁵Де ’фсымӕр, израилаг, куы смӕгуыр уа, йӕхи дарынхъом куынӕуал уа, уӕд-иу ӕм фӕкӕс, ӕрцӕуӕггагмӕ кӕнӕ, уе ’хсӕн рӕстӕгмӕ чи ’рцӕра, уымӕ куыд фӕкӕсис, афтӕ. Уадз ӕмӕ дарддӕр цӕра дӕ разы.

³⁶Пайдайы охыл дзы мацы ис, тӕрс дӕ Хуыцауӕй. Уадз ӕмӕ де ’фсымӕр дӕ разы цӕра.

³⁷Пайдайы охыл ын ӕхца ӕфстау ма ратт, хойраг дӕр ын пайдайы фӕдыл ма ауӕй кӕн.

³⁸Ӕз Дунедарӕг дӕн, уӕ Хуыцау, Мысыры зӕххӕй уӕ Чи ракодта, Уый, цӕмӕй уын раттон Ханааны зӕхх ӕмӕ уон уӕ Хуыцау.

³⁹Де ’фсымӕр, израилаг, куы смӕгуыр уа ӕмӕ дын йӕхи куы ауӕй кӕна, уӕд ыл цагъары ’фсондз ма сӕвӕр.

⁴⁰Ӕххуырст кӕнӕ уе ’хсӕн ӕрцӕрӕг ӕцӕгӕлоны цӕстӕй йӕм кӕс, Ӕрдӕгсӕдӕйон азы онг дӕм кусӕд.

⁴¹Уый фӕстӕ йӕ цотимӕ аздӕхӕд йӕ мыггагмӕ, йӕ фыдӕлты зӕххы хаймӕ.

⁴²Израилӕгтӕ сты мӕ лӕггадгӕнджытӕ, уымӕн ӕмӕ се ’ппӕты дӕр Ӕз ракодтон Мысыры зӕххӕй; цагъартау сӕ уӕйгӕнӕн нӕй.

⁴³Ӕгъатыр хицау сын ма у, дӕ Хуыцауӕй тӕрс.

⁴⁴Дӕ цагъар нӕлгоймӕгтӕ ӕмӕ дӕ цагъар сылгоймӕгтӕ, уӕ алыварс цы адӕмтӕ ис, уыдонӕй уӕнт, се ’хсӕнӕй сӕ ӕлхӕнут.

⁴⁵Уе ’хсӕн цы ӕрцӕуӕггӕгтӕ ис, уыдонӕй, стӕй сӕ бинонтӕй — уӕ зӕххыл чи райгуырди, уыдонӕй дӕр уын ӕлхӕныны бар ис, ӕмӕ уыдзысты уӕ исбон.

⁴⁶Уӕ бон сӕ у уӕ байзӕддӕгтӕн исбонӕн ныууадзын, семӕ уӕхи, куыд цагъартимӕ, афтӕ дарын, фӕлӕ уе ’фсымӕртӕн, израилӕгтӕн, карз хицӕуттӕ ма ут.

⁴⁷Израилӕгты ’хсӕн ӕрцӕуӕггагӕй чи ис, уый куы сбонджын уа, де ’фсымӕр, израилаг, та куы смӕгуыр уа, ӕмӕ йӕхи ӕрцӕуӕггагӕн кӕнӕ уый мыггагӕй искӕмӕн куы ауӕй кӕна,

⁴⁸уӕд ӕй фӕстӕмӕ балхӕнӕн уыдзӕн. Йӕ хӕстӕджытӕй йӕ искӕмӕн балхӕныны бар уыдзӕни:

⁴⁹йӕ фыды ’фсымӕр, йӕ фыды ’фсымӕры фырт кӕнӕ та ӕндӕр хион — тугхӕстӕг ын чи ӕййафы, ахӕмӕн. Кӕд йӕхицӕн йӕ къух амона, уӕд та-иу йӕхӕдӕг йӕхи балхӕнӕд фӕстӕмӕ.

⁵⁰Йӕ балхӕнӕгимӕ-иу анымайӕд, йӕхи йын куы ауӕй кодта, уӕдӕй Ӕрдӕгсӕдӕйон азы онг цал азы рацыди, уый. Фидгӕ та йын хъуамӕ бакӕна, уал азы дӕргъы ӕххуырстӕн цас бафыстӕуы, уыйас.

⁵¹Кӕд ма Ӕрдӕгсӕдӕйон азмӕ бирӕ азтӕ баззади, уӕд хъуамӕ, цы аргъӕй йӕ балхӕдӕуыд, уымӕн йӕ фылдӕр хай бафида.

⁵²Ӕрдӕгсӕдӕйон азмӕ кӕд бирӕ нал баззад, уӕддӕр анымайӕд ӕмӕ уыцы азтӕм гӕсгӕ ӕмбӕлгӕ аргъ бафидӕд.

⁵³Йӕ балхӕнӕгӕн, иу афӕдзмӕ кӕй баххуырсынц, уыцы кусӕджы хуызӕн уӕд; карз ма уӕд йемӕ.

⁵⁴Фӕстӕмӕ ӕлхӕд куынӕ ӕрцӕуа, уӕд йӕ цотимӕ уӕгъдгонд ӕрцӕудзӕн Ӕрдӕгсӕдӕйон азы,

⁵⁵уымӕн ӕмӕ израилӕгтӕ сты Мӕ лӕггадгӕнджытӕ, Мысыры зӕххӕй кӕй ракодтон, уыдон. Ӕз Дунедарӕг дӕн, уӕ Хуыцау.