Read Библи: Сыгъдӕг Йеремиа 18 Bible Online

Йеремиа 18 - Библи: Сыгъдӕг bible

Йеремиа 18

¹Дунедарӕг Йеремиайӕн фехъусын кодта Йӕ ныхас:

²«Ацу дурынгӕнӕджы хӕдзармӕ, ӕмӕ дын уым Мӕ ныхас фехъусын кӕндзынӕн».

³Ӕз дурынгӕнӕджы хӕдзармӕ бацыдтӕн ӕмӕ йӕ баййӕфтон йӕ куысты уӕлхъус.

⁴Ӕлыгӕй цы мигӕнӕн арӕзта, уый йӕ къухты ныппырх ис, ӕмӕ сарӕзта ӕндӕр, цавӕр ӕй бафӕндыд, ахӕм.

⁵Дунедарӕг мын загъта:

⁶«Израилы байзӕддӕгтӕ! Ау, сымахӕн Мӕ бон, дурынгӕнӕгӕг ӕлыгӕн цы бакуыста, уый бакӕнын нӕу? — зӕгъы Дунедарӕг. — Израилы фӕстагӕттӕ, дурынгӕнӕгӕн ӕлыгыл йӕ бар куыд цӕуы, афтӕ сымах дӕр Мӕ къухы стут.

⁷Иуӕй-иу хатт Ӕз искӕцы адӕмы кӕнӕ паддзахады тыххӕй фӕзӕгъын: йӕ бындзарӕй йӕ срӕдувдзынӕн, басӕтдзынӕн ӕй ӕмӕ йӕ бабын кӕндзынӕн.

⁸Фӕлӕ, афтӕ цы адӕмӕй загътон, уыдон сӕ фыдракӕндтӕ куы ныууадзынц, уӕд Мӕ фӕнд аивын, цы бӕллӕх сыл ӕруадзынмӕ хъавыдтӕн, уый сыл нал бафтауын.

⁹Ӕз сфӕнд кӕнын искӕцы адӕм кӕнӕ паддзахад сфидар ӕмӕ ӕрбынӕттон кӕнын.

¹⁰Фӕлӕ уыцы адӕм Мӕ разы фыдракӕндтӕ куы фӕкӕнынц ӕмӕ Мӕм куы нӕ фӕхъусынц, уӕд Мӕ фӕнд аивын, цы хорзӕх сын балӕвар кӕнынмӕ фӕхъавын, уый сын нал раттын.

¹¹Уӕдӕ зӕгъ Иудей ӕмӕ Йерусалимы цӕрджытӕн: „Афтӕ зӕгъы Дунедарӕг: Ӕз уын цӕттӕ кӕнын фыдбылыз, уӕ ныхмӕ аразын фыдвӕнд. Алчидӕр уӕ йӕ фыдвӕндӕгтӕ ныууадзӕд, уӕ фӕндӕгтӕ ӕмӕ уӕ хъуыддӕгтӕ сраст кӕнут“.

¹²Фӕлӕ дын уыдон зӕгъдзысты: „Ӕдылы ныхӕстӕ! Цыдӕриддӕр нӕ фӕнды, уыдӕттӕ кӕндзыстӕм, нӕхи куыд фӕнды, афтӕ цӕрдзыстӕм“.

¹³Уымӕ гӕсгӕ Дунедарӕг афтӕ зӕгъы: Бафӕрсут-ма адӕмты, ахӕм диссаг, цымӕ, искуы фехъуыстӕуыд? Израилы чызг ӕбуалгъ цъаммар митыл бафтыд!

¹⁴Ливаны хӕхтӕй искуы мит фесӕфы? Хӕххон суадӕттӕ, уазал цӕугӕдӕттӕ искуы байсыстысты?

¹⁵Мӕн та Мӕ адӕм ферох кодтой се ’ппӕт дӕр: ницӕйаг гуымирытӕн будсудзӕн кӕнынц! Сӕ цӕуӕнтыл фӕкалдысты, сӕ рагон фӕндӕгтӕ ныууагътой ӕмӕ ӕнӕцыд къахвӕндӕгтӕм рахызтысты.

¹⁶Сӕ зӕхх адӕмыл ӕвирхъау тас ӕфтаудзӕн, мыггагмӕ сӕгад уыдзӕн! Сӕ рӕзты чи фӕцӕйцӕуа, уый-иу, йӕ сӕр ӕнкъусгӕйӕ, стыр дисы бафтдзӕн.

¹⁷Ӕз сӕ се знӕгты раз скӕсӕйнаг дымгӕйау ныххӕлиу кӕндзынӕн, бӕллӕхы заман сӕм раздахдзынӕн Ме ’ргом нӕ, фӕлӕ Мӕ чъылдым».

¹⁸Фӕлӕ уыдон загътой: «Цӕй ӕмӕ Йеремиайы ныхмӕ исты фыдвӕнд саразӕм, цӕмӕй сауджынты Ӕгъдау, куырыхонты уынаффӕтӕ ӕмӕ пехуымпарты ныхӕстӕ ма фесӕфой. Цӕуӕм ӕмӕ йыл хахуыртӕ ӕрымысӕм, ма йын байхъусӕм йӕ ныхӕстӕм».

¹⁹О Дунедарӕг, фехъус мӕ! О, байхъус ме знӕгты ныхӕстӕм!

²⁰Ау, хорз ӕвзӕрӕй фидгӕ у? Мӕ фесафынӕн дзыхъхъ куы скъахтой! Ӕрхъуыды-ма кӕн: ӕз-иу Дӕ разы лӕууыдтӕн ӕмӕ сын хорзӕх куырдтон, цӕмӕй сӕ Дӕ маст аздахай.

²¹Ныр Дӕ фӕндонӕй стонг бавзарӕнт, кардӕй сӕ фӕмар, уадз ӕмӕ сбирӕ уой идӕдзтӕ! Сӕ цот ӕмӕ сӕ лӕгтӕй ӕнӕхай фӕуӕнт, сӕ лӕппутӕ карды амӕттаг бауӕнт хӕсты!

²²Ӕвиппайды сӕм ӕнӕнымӕц ӕфсӕдтӕ куы ’рбакӕнай, уӕд сӕ хӕдзӕрттӕй хъуысӕд хъӕрзын, уымӕн ӕмӕ уыдон ме ’рцахсынӕн дзыхъхъ скъахтой, мӕ къӕхтӕн мын къӕппӕджытӕ сӕвӕрдтой!

²³О Дунедарӕг, Ды зоныс бӕлвырд: мӕ фесафынӕн аразынц фыдвӕндтӕ. О, ма сын сис сӕ фыдракӕндты азым, сӕ тӕригъӕдтӕ сын макуы ныббар! Уадз ӕмӕ бабын уой Дӕ разы, фесаф сӕ Дӕ масты бон!