Read Библи: Сыгъдӕг Йеремиа 38 Bible Online

Йеремиа 38 - Библи: Сыгъдӕг bible

Йеремиа 38

¹Маттаны фырт Шефати, Пашхуры фырт Гедалиа, Шелемийы фырт Йегухал ӕмӕ Малкиайы фырт Пашхур фехъуыстой, Йеремиа адӕмӕн афтӕ кӕй дзырдта, уый:

²«Дунедарӕг афтӕ зӕгъы: „Ацы сахары чидӕриддӕр баззайа, уыдон кард, стонг ӕмӕ рынӕй амӕлдзысты. Халдейӕгты къухтӕм йӕхи чи радта, уыдон та удӕгасӕй баззайдзысты ӕмӕ хорзӕхӕн цард айсдзысты.

³Дунедарӕг зӕгъы: ацы сахар вавилойнаг паддзахы къухмӕ лӕвӕрд ӕрцӕудзӕн, бацахсдзӕн ӕй“».

⁴Уӕд уӕздӕттӕ паддзахӕн загътой: «Ацы лӕджы амарын хъӕуы. Ахӕм ныхӕстӕй, сахары ма цы хӕстонтӕ баззад, уыдонӕн ӕмӕ иннӕ адӕмӕн сӕ хъару лӕмӕгъ кӕны. Йӕ зӕрдӕ адӕмӕн хорзӕй ницы зӕгъы, се сӕфтмӕ бӕллы».

⁵Паддзах Цедекиа сын дзуапп радта: «Уӕ бар ыл цӕуы. Сымах цы нӕ фӕнды, ахӕмӕй паддзахӕн йӕ бон саразын ницы у».

⁶Йеремиайы ӕрцахстой. Паддзахы фырт Малкиайӕн хъахъхъӕнджыты кӕрты цы цъай уыди, уым ӕй ныппӕрстой. Йеремиайы цъайы ауагътой бӕндӕнтыл. Уыцы рӕстӕг цъайы дон нӕ уыди, ӕрмӕстдӕр цъыф, ӕмӕ Йеремиа цъыфы аныгъуылди.

⁷Паддзахы галуаны барджынтӕй иу уыди эфиопаг, йӕ ном — Еведмелех. Уый, Йеремиайы цъайы кӕй ныппӕрстой, уыцы хабар фехъуыста. Уыцы рӕстӕг паддзах бадти Бениамины кулдуары раз.

⁸Еведмелех галуанӕй рацыд ӕмӕ паддзахӕн загъта:

⁹«Мӕ хицау ӕмӕ мӕ паддзах! Ацы адӕм пехуымпар Йеремиайӕн цы бакодтой, уый стыр фыдракӕнд у! Цъайы йӕ ныппӕрстой, ӕмӕ уым сыдӕй амӕлдзӕн, уымӕн ӕмӕ сахары дзул нал ис».

¹⁰Паддзах эфиопаг Еведмелехӕн бардзырд радта: «Демӕ дӕс ӕмӕ ссӕдз лӕджы акӕн, ӕмӕ пехуымпар Йеремиайы цъайӕ сисут, цалынмӕ нӕ амарди, уӕдмӕ.

¹¹Еведмелех йемӕ адӕмы акодта ӕмӕ бацыди паддзахы галуанмӕ, дзаумӕтты къӕбицмӕ. Уырдыгӕй зӕронд хӕцъилтӕ ӕмӕ бызгъуыртӕ райста ӕмӕ сӕ бӕндӕнтыл Йеремиамӕ цъаймӕ ӕруагъта».

¹²Эфиопаг Еведмелех загъта Йеремиайӕн: «Ацы бызгъуыртӕ ӕмӕ хӕцъилтӕ бӕндӕнты бын дӕ дӕлӕрмтты бавӕр». Йеремиа афтӕ бакодта.

¹³Бӕндӕнтыл уӕлӕмӕ схӕцыдысты, ӕмӕ Йеремиайы цъайӕ систой. Уый фӕстӕ Йеремиа хъахъхъӕнджыты кӕрты баззад.

¹⁴Паддзах Цедекиа Йеремиамӕ арвыста, ӕмӕ йӕ Дунедарӕджы хӕдзарӕн йе ’ртыккаг бацӕуӕны размӕ ӕрбакодтой. Паддзах Йеремиайӕн загъта: «Иу цӕмӕйдӕр дӕ бафӕрсинаг дӕн. Мацы мӕ басусӕг кӕн».

¹⁵Йеремиа Цедекиайӕн дзуапп радта: «Ӕмӕ дын ӕз дзуапп куы раттон, уӕд мӕ, ау, нӕ амарын кӕндзынӕ? Уӕддӕр мын мӕ уынаффӕмӕ нӕ байхъусдзынӕ».

¹⁶Паддзах Цедекиа сусӕгӕй расомы кодта Йеремиайӕн: «Сомы кӕнын Дунедарӕгӕй, цард нын Чи радта, Уымӕй! Нӕ дӕ амарын кӕндзынӕн ӕмӕ, дӕ мӕлӕтмӕ чи бӕллы, уыдоны къухтӕм дӕр дӕ нӕ ратдзынӕн».

¹⁷Уӕд Йеремиа паддзах Цедекиайӕн загъта: «Уӕларвӕфсады Дунедарӕг, Израилы Хуыцау, афтӕ зӕгъы: „Вавилойнаг паддзахы ӕфсады хицӕуттӕм дӕхи куы раттай, уӕд фервӕздзынӕ, ацы сахар та сыгъд не ’рцӕудзӕн. Де ’ппӕт хӕдзаронтимӕ удӕгасӕй баззайдзынӕ.

¹⁸Фӕлӕ вавилойнаг паддзахы ӕфсады хицӕуттӕн сӕ размӕ куынӕ рацӕуай, уӕд ацы сахар халдейӕгты къухтӕм лӕвӕрд ӕрцӕудзӕн, ӕмӕ йӕ басудздзысты, дӕхӕдӕг дӕр сӕ къухтӕй нӕ аирвӕздзынӕ“».

¹⁹Паддзах Цедекиа Йеремиайӕн дзуапп радта: «Ӕз тӕрсын, халдейӕгты ’рдӕм чи балыгъди, уыцы иудейӕгтӕй. Халдейӕгтӕ мӕ сӕ къухтӕм куы радтой, уӕд мӕ хынджылӕггаг скӕндзысты».

²⁰Йеремиа йын загъта: «Нӕ дӕ ратдзысты уыдоны къухтӕм, байхъус Дунедарӕджы ныхасмӕ. Цы дын зӕгъын, уый бакӕн ӕмӕ ӕнӕмаст уыдзынӕ, удӕгасӕй баззайдзынӕ.

²¹Сахарӕй рацӕуыныл куы не сразы уай, уӕд та, Дунедарӕг мын цы раргом кодта, уымӕ байхъус:

²²иудейаг паддзахы галуаны ма цы сылгоймӕгтӕ баззад, уыдоны вавилойнаг паддзахы ӕфсады хицӕуттӕм акӕндзысты, ӕмӕ уыцы сылгоймӕгтӕ дзурдзысты: „Де ’рдхӕрдтӕ дыл сайдӕй рацыдысты ӕмӕ дыл фӕуӕлахиз сты. Ныр цъымарайы куы ныссагъдтӕ, уӕд та лидзӕг фесты“.

²³Дӕ устытӕ ӕмӕ дын дӕ фыртты халдейӕгтӕм акӕндзысты, ӕмӕ дӕхӕдӕг дӕр сӕ къухтӕй нӕ аирвӕздзынӕ. Вавилоны паддзах дӕ ӕрцахсдзӕн, ацы сахар та сыгъд ӕрцӕудзӕни».

²⁴Цедекиа Йеремиайӕн загъта: «Ацы ныхӕстӕ мачи базонӕд, науӕд удӕгасӕй нӕ баззайдзынӕ.

²⁵Уӕздӕттӕ, демӕ кӕй дзырдтон, уый куы фехъусой, уӕд дӕм ӕрбацӕудзысты ӕмӕ зӕгъдзысты: „Паддзахӕн цы загътай, уый нын радзур, мацы нӕ басусӕг кӕн, науӕд дӕ амардзыстӕм“.

²⁶Уӕд-иу сын ахӕм дзуапп ратт: „Ӕз лӕгъстӕ кодтон паддзахӕн, цӕмӕй мӕ Йонатаны хӕдзармӕ мауал арвита ӕмӕ уым ма амӕлон“».

²⁷Уӕздӕттӕ иууылдӕр Йеремиамӕ ӕрбацыдысты. Рафӕрс-бафӕрс ӕй фӕкодтой, ӕмӕ сын уый, паддзах ын цы бафӕдзӕхста, уый загъта. Уӕд ӕй уыдон ницӕмӕйуал бафарстой, уымӕн ӕмӕ, сӕ ныхасы сӕр цӕуыл уыди, уымӕн ничи ницы зыдта.

²⁸Йеремиа хъахъхъӕнджыты кӕрты баззад, цалынмӕ знӕгтӕ Йерусалим нӕ бацахстой, уӕдмӕ.