Read Библи: Сыгъдӕг Йеремиа 52 Bible Online

Йеремиа 52 - Библи: Сыгъдӕг bible

Йеремиа 52

¹Цедекиа паддзах куы сси, уӕд ыл цыдис иу ӕмӕ ссӕдз азы. Йерусалимы йӕ паддзахиуӕг ахаста иуӕндӕс азы. Йӕ мад уыди ливнӕйаг Йеремиайы чызг, йӕ ном — Хамутал.

²Цедекиа дӕр Иоакимау, Дунедарӕгӕн ӕнӕуынон цы уыди, уыдӕттыл бафтыд.

³Дунедарӕг афтӕ смӕсты ис Иудей ӕмӕ Йерусалиммӕ, ӕмӕ сыл Йӕхи атигъ кодта. Цедекиа Вавилоны паддзахы ныхмӕ сыстад.

⁴Цедекиайӕн йӕ хицаудзинадыл дӕсӕм аз куы цыд, уӕд дӕсӕм мӕйы дӕсӕм бон Йерусалиммӕ ӕрбабырста Вавилоны паддзах Навуходоносор йе ’ппӕт ӕфсадимӕ. Сахарыл ӕртыхсти ӕмӕ йын йӕ алыварс хӕцӕн бырутӕ самайын кодта.

⁵Сахар знӕгты ахӕсты уыди Цедекиайы хицаудзинады иуӕндӕсӕм азмӕ.

⁶Цыппӕрӕм мӕйы фарӕстӕм бон сахары цӕрджытӕ сыдӕй мардысты, адӕммӕ, цы бахӕрой, уый нал уыди.

⁷Уыцы бон знӕгтӕ сахары сис басастой. Паддзахы дыргъдоны раз, дыууӕ сисы ’хсӕн, уыди кулдуар. Кӕд халдейӕгтӕ сахарыл ӕрхъула кодтой, уӕддӕр хӕстонтӕ ӕхсӕвы иууылдӕр уыцы кулдуары уылты сахарӕй ралыгъдысты ӕмӕ Аравӕйы ’рдӕм ацыдысты.

⁸Халдейӕгты хӕстонтӕ паддзах Цедекиайы фӕсте расырдтой ӕмӕ йӕ Йерихонмӕ хӕстӕг тъӕпӕныл баййӕфтой. Йемӕ цы хӕстонтӕ уыди, уыдон иууылдӕр алырдӕмты фӕлыгъдысты,

⁹йӕхи та йын ӕрцахстой ӕмӕ йӕ ӕрбакодтой Вавилоны паддзахмӕ, Хаматы зӕхмӕ, Ривлайы сахармӕ. Уым ын паддзах Навуходоносор стӕрхон кодта.

¹⁰Ривлайы сахары Вавилоны паддзах Цедекиайӕн йӕ фыртты йӕхи раз амарын кодта, иудейаг уӕздӕтты се ’ппӕты дӕр ныццагъта.

¹¹Уый фӕстӕ Цедекиайӕн йӕ цӕстытӕ скъахта ӕмӕ йӕ хъадаманты акодта Вавилонмӕ. Суанг ӕй йӕ амӕлӕты бонмӕ ахӕстоны фӕдардта.

¹²Вавилоны паддзах Навуходоносор нудӕсӕм аз хицауиуӕг куы кодта, уӕд фӕндзӕм мӕйы дӕсӕм бон хъахъхъӕнджыты хицау Невузардан, вавилойнаг паддзахы фӕсдзӕуинтӕй иу, ӕрбацыди Йерусалиммӕ.

¹³Уый басудзын кодта Дунедарӕджы хӕдзар, паддзахы галуан ӕмӕ Йерусалимы хӕдзӕрттӕ — стыр хӕдзӕрттӕ иууылдӕр саусыгъд бакодта.

¹⁴Хъахъхъӕнджыты хицауимӕ цы халдейаг хӕстонтӕ уыди, уыдон Йерусалимы систӕ дӕр ныззыгуым кодтой.

¹⁵Мӕгуыртӕй иуӕй-иуты ӕмӕ, сахары цӕрджытӕй ма чи аирвӕзт, стӕй Вавилоны паддзахы къухмӕ йӕхи чи радта, уыдоны хъахъхъӕнджыты хицау Невузардан иууылдӕр уацары акодта. Ӕрмӕст ма сӕндӕтты ӕмӕ быдырты кусынӕн мӕгуыртӕй иу цасдӕр ныууагъта.

¹⁷Халдейӕгтӕ ныппырх кодтой Дунедарӕджы хӕдзары ӕрхуы цӕджындзтӕ, бынӕнцайӕнтӕ ӕмӕ ӕрхуы денджыз. Ӕрхуы иууылдӕр аластой Вавилонмӕ.

¹⁸Ноджы ма райстой ӕгтӕ, ӕвгӕнӕнтӕ, ӕртыскӕнтӕ, кӕхцытӕ, куыситӕ — кувыны рӕстӕг цы мигӕнӕнтӕй пайда кодтой, уыдон иууылдӕр.

¹⁹Хъахъхъӕнджыты хицау йемӕ аласта, сыгъзӕрин ӕмӕ ӕвзист мигӕнӕнӕй дзы цыдӕриддӕр уыдис, уыдон: боцкъатӕ, будсудзӕнтӕ, кӕхцытӕ, ӕгтӕ, цырагъдарӕнтӕ, будсудзӕн куыситӕ ӕмӕ мигӕнӕнтӕ.

²⁰Дыууӕ цӕджындзы, стӕй, йӕ быны дыууадӕс ӕрхуы галы кӕмӕн уыд, уыцы ӕрхуы денджыз ӕмӕ бынӕнцайӕнтӕ Дунедарӕджы хӕдзарӕн саразын кодта паддзах Соломон. Уыдоны уый бӕрц ӕрхуы уыди, ӕмӕ йын сбарӕн дӕр нӕ уыд.

²¹Дыууӕ цӕджындзӕй алкӕмӕн дӕр йӕ бӕрзӕнд уыди ӕстдӕс ӕлмӕрины, йӕ уӕрх та — дыууадӕс ӕлмӕрины. Мидӕгӕй уыдысты афтид, сӕ къултӕ та — цыппар ӕнгуылдзы фӕтӕнӕн.

²²Цӕджындзты сӕртыл уыди ӕрхуы кады худтӕ, алкӕцыйӕн дӕр йӕ бӕрзӕнд — фондз ӕлмӕрины. Кады худты алыварс — ӕрхуы хызӕг ӕмӕ гранаты дыргътӕ, уыдон дӕр — ӕрхуыйӕ конд.

²³Цӕджындзты фӕрстыл уыди нӕуӕдз ӕхсӕз гранаты, ӕдӕппӕтӕй та хызӕгты алыварс — фӕйнӕ сӕдӕйы.

²⁴Хъахъхъӕнджыты хицау уацары акодта алчер Серайы, Кувӕндоны дыккаг сауджын Софониайы ӕмӕ, Кувӕндонмӕ бацӕуӕн цы ӕртӕ лӕджы хъахъхъӕдтой, уыдоны.

²⁵Ноджы ма сахарӕй ракодта ӕфсӕддон хицауы, паддзахы фӕсдзӕуинтӕй сахары чи баззад, уыцы авд лӕджы ӕмӕ, бӕстӕйы цӕрджыты ӕфсадмӕ чи фыста, уыцы нымӕрдары, стӕй ма, бӕстӕйы адӕмӕй сахары кӕй ссардта, уыцы ӕхсай лӕджы.

²⁶Хъахъхъӕнджыты хицау Невузардан сӕ ӕрбакодта Ривлайы сахармӕ, Вавилоны паддзахмӕ.

²⁷Ӕмӕ Вавилоны паддзах Ривлайы сахары, Хаматы бӕстӕйы, се ’ппӕты дӕр амарын кодта. Афтӕ иудейӕгтӕ ӕрвыст ӕрцыдысты сӕ зӕххӕй.

²⁸Навуходоносор йӕ хицаудзинады ӕвдӕм аз уацары райста ӕртӕ мин дыууын ӕртӕ иудейаджы,

²⁹Навуходоносор ӕстдӕсӕм аз паддзахиуӕг куы кодта, уӕд та Йерусалимӕй хаст ӕрцыдысты астсӕдӕ ӕртын дыууӕ адӕймаджы.

³⁰Дыууын ӕртыккӕгӕм аз хицауиуӕг куы кодта, уӕд ма хъахъхъӕнджыты хицау Невузардан иудейӕгтӕй ноджыдӕр уацары райста авдсӕдӕ цыппор фондз адӕймаджы, ӕдӕппӕтӕй — цыппар мин ӕхсӕзсӕдӕ.

³¹Иудейаг паддзах Йехониа ӕртын ӕвдӕм аз уацары куы уыди, уӕд Вавилоны бӕстӕйы паддзах сси Евил-Меродах. Дыууадӕсӕм мӕйы дыууын фӕндзӕм бон Иудейы паддзах Иоакимы йӕ хорзӕхы аккаг скодта ӕмӕ йӕ ахӕстонӕй рауагъта.

³²Йемӕ хӕларӕй дзырдта ӕмӕ йӕ Вавилоны иннӕ паддзӕхтӕй уӕлдӕр сӕвӕрдта.

³³Иоакимӕн йӕ ахӕстоны дарӕс раивын кодта, ӕмӕ йӕ царды кӕронмӕ паддзахимӕ иу фынгыл бадти.

³⁴Суанг ӕй йӕ амӕлӕты бонмӕ вавилойнаг паддзах иу бон дӕр хъуаг ницӕмӕй ныууагъта.