Read Библи: Сыгъдӕг Езекиел 19 Bible Online

Езекиел 19 - Библи: Сыгъдӕг bible

Езекиел 19

¹«Ды та хъарӕг сис Израилы паддзӕхтыл:

²„Дӕ мад цы домбай уыди, уастӕн! Куы царди домбӕйттӕн сӕ астӕу. Ӕвзонг домбӕйтты цур йӕ лӕппынты куы хаста.

³Сӕ иуы слӕууын кодта уалынмӕ йӕ къӕхтыл, ӕмӕ тыхджын домбайӕ агӕпп ласта уый; ныттыдта-иу йӕ амӕттаджы: сахуыр, уый адӕмы ныхъуырдта.

⁴Адӕмты ’хсӕн айхъуысти йӕ кой, ӕмӕ сӕ хъоргъы ’ппӕрст ӕрцыди, рӕхысбастӕй йӕ акодтой Мысырмӕ.

⁵Йӕ мад ӕм каст ӕнхъӕлмӕ, фӕлӕ федта, куыд бацарӕфтыд йе ’нхъӕлцау, уӕд райста уый йӕ лӕппынтӕй ӕндӕры, ӕмӕ йын уый тыхджын домбай куы басгуыхт.

⁶Тыхджын домбай куы басгуыхти йӕ лӕппын, ӕрцарди домбӕйтты ӕхсӕн; уый сахуыр ис йӕ амӕттаджы ахсын ӕмӕ ныхъуырдта адӕмы.

⁷Ныппырх-иу кодта адӕмтӕн сӕ фидӕрттӕ, сӕ сахартӕ дӕр афтӕ. Йӕ рыхынӕй ныггӕныстон ис ацы зӕхх ӕд хъӕутӕ.

⁸Фӕлӕ йӕ ныхмӕ сыстадысты уӕд йӕ алфамбылай бӕстӕты цӕрджытӕ. Сӕ ахсӕн хыз ыл баппӕрстой, ӕмӕ сӕ хъоргъы ’ппӕрст ӕрцыди.

⁹Рӕхысбастӕй йӕ къалатийы бакодтой, Вавилоны паддзахмӕ йӕ аластой; уыцы ран ӕй ахӕстоны баппӕрстой, цӕмӕй йӕ рыхын Израилы хӕхтӕй макуыуал райхъуыса.

¹⁰Донбыл сагъд сӕнӕфсиры талайау — дӕ мад, донарӕхы фӕрцы — къабузджын, дыргъджын.

¹¹Йӕ къалиутӕ — фидар, паддзӕхты лӕдзгуытӕн дӕр бӕззыдысты. Йӕ зӕнг ӕврӕгъты онг схӕццӕ, ӕд бирӕ къабузтӕ фӕлгӕсыди бӕрзондӕй.

¹²Фӕлӕ йӕ, мӕстӕй судзгӕйӕ, срӕдывтой бындзарӕй ӕмӕ йӕ афӕлдӕхтой зӕххыл, йӕ дыргъ куы бахус скӕсӕйнаг дымгӕмӕ. Йӕ фидар къалиутӕ ӕрсастысты, ныххус сты, аныхъуырдта сӕ арт.

¹³Ныр ӕй ныссагъдӕуыд ӕдзӕрӕг ран — ӕнӕдон ӕмӕ хус зӕххыл.

¹⁴Йӕ зӕнг, йӕ къалиутыл ын сирвӕзт пиллон арт, йӕ дыргътӕ йын аныхъуырдта. Паддзахы лӕдзӕгӕн чи сбӕзза, ахӕм фидар къалиу ыл нал баззад“. Ай хъарӕг у ӕмӕ баззайдзӕни хъарӕджы номыл».