Read Библи: Сыгъдӕг Езекиел 21 Bible Online

Езекиел 21 - Библи: Сыгъдӕг bible

Езекиел 21

¹Дунедарӕг мын загъта:

²«Адӕймаджы фырт! Де ’ргом Йерусалимы ’рдӕм сараз ӕмӕ Кувӕндоны ныхмӕ, стӕй Израилы бӕстӕйы ныхмӕ пехуымпариуӕг кӕн!

³Израилы зӕххӕн фехъусын кӕн: „Афтӕ зӕгъы Дунедарӕг: Ӕз сыстадтӕн дӕ ныхмӕ, Мӕ кард дӕм кӕрддзӕмӕй сласдзынӕн ӕмӕ дын дӕ адӕмы, растӕй, зылынджынӕй ныццӕгъддзынӕн.

⁴Мӕ кард йӕ кӕрддзӕмӕй ист ӕрцӕудзӕни, хуссарӕй цӕгатмӕ дӕм раст ӕмӕ зылынджынӕй чидӕриддӕр ис, уыдоны ныццӕгъдынмӕ.

⁵Ӕмӕ уӕд алы адӕймаг дӕр базондзӕн, Ӕз, Дунедарӕг, Мӕ кард йӕ кӕрддзӕмӕй кӕй сластон ӕмӕ фӕстӕмӕ йӕ бынатмӕ кӕй нал раздӕхдзӕн, уый.

⁶Адӕймаджы фырт! Дӕ цӕссыг кал, дӕ уӕрджытӕ хойгӕйӕ, додой кӕн ӕмӕ дзыназ сӕ разы.

⁷Цӕуыл дзыназыс, зӕгъгӕ дӕ куы фӕрсой, уӕд-иу сын дзуапп ратт: ‚Цы фыдуац ӕрбацӕуы, уый тыххӕй‘. Алкӕмӕн дӕр асӕтдзӕни йӕ ныфс, уе ’ппӕтӕн дӕр уӕ уӕнгтӕ ӕркӕлдзысты ӕмӕ уӕ зӕрдӕтӕ бамӕгуыр уыдзысты, фыр тӕссӕй бадонзоныг уыдзыстут. Ӕппӕт уыдӕттӕн ӕнӕрцӕугӕ нӕй, — зӕгъы Дунедарӕг Хуыцау“».

⁸Дунедарӕг мын загъта:

⁹«Адӕймаджы фырт! Зӕгъ пехуымпар ныхас: „Дунедарӕг афтӕ зӕгъы: кард уӕм ӕрбацӕуы, кард. У цыргъгонд ӕмӕ цӕхӕртӕ калы.

¹⁰Ахӕм цыргъ у бирӕты ныццӕгъдынӕн, цӕмӕй арвӕрттывдау цӕхӕртӕ кала! Ӕви Ӕз хъуамӕ цин бакӕнон, Мӕ адӕм иннӕ адӕмты мурмӕ дӕр кӕй нӕ дарынц, ууыл?

¹¹Ӕз кард сӕрттивын кӕнын кодтон, цӕмӕй уый искӕй къухы бафта. Цыргъгонд ӕрцыд ӕмӕ тӕмӕнтӕ калы, марӕджы къухмӕ йӕ раттыны размӕ.

¹²Адӕймаджы фырт! Хъӕр кӕн ӕмӕ дзыназ, уымӕн ӕмӕ уыцы кард райстӕуыдзӕни Мӕ адӕмы ныхмӕ, уыимӕ Израилы ӕппӕт фӕтӕгты ныхмӕ. Уыдон карды амӕттаг бауыдзысты Мӕ адӕмимӕ. Дӕ уӕрджытӕ ныххой уӕдӕ!

¹³Рӕхджы Ӕз бафӕлвардзынӕн Мӕ адӕмы, ӕмӕ суанг Иудейы паддзах дӕр Мӕ азарӕй нӕ фервӕздзӕн“, — зӕгъы Дунедарӕг Хуыцау.

¹⁴Ды та, адӕймаджы фырт, пехуымпариуӕг кӕн, дӕ армытъӕпӕнтӕ кӕрӕдзиуыл ӕрцӕвгӕйӕ. Фӕдывӕр ӕмӕ, зӕгъ, фертывӕр уыдзӕни карды тых, йӕ амӕттаг кӕй кӕна, уыдоны ныхмӕ, уыимӕ стыр паддзахы ныхмӕ, ӕмӕ сӕ арф ныррӕхойдзӕн.

¹⁵Цӕмӕй адӕм схъомпал уой ӕмӕ сӕ бирӕ фӕцагъды уа, уый тыххӕй сын алы сахары кулдуармӕ дӕр сӕ ныхмӕ ӕрӕвӕрдзынӕн ӕвзидгӕ кард. Уый цӕхӕртӕ калдзӕнис арвӕрттывдау, цыргъгонд ӕрцӕудзӕн адӕмы цӕгъдынмӕ.

¹⁶Бавдӕл, кард, ӕмӕ цӕв рахизӕрдӕм кӕнӕ галиуӕрдӕм — дӕ ком кӕцырдӕм здӕха, уыцырдӕм.

¹⁷Ӕз дӕр Мӕ армытъӕпӕнтӕ кӕрӕдзиуыл ӕрцӕвдзынӕн, ӕмӕ уӕд ссӕудзӕни Мӕ маст. Афтӕ зӕгъын Ӕз, Дунедарӕг!»

¹⁸Дунедарӕг мын загъта:

¹⁹«Адӕймаджы фырт! Сныв кӕн, Вавилоны паддзахы кард кӕуылты цӕудзӕн, ахӕм дыууӕ фӕндаджы. Сӕ дыууӕ дӕр уыцы иу зӕххӕй хъуамӕ рацӕуой. Сӕ райдианы сын сныв кӕн амонӕн, алкӕцы дӕр сӕ цы сахармӕ цӕуы, уый амонынӕн.

²⁰Фӕндӕгтӕй иуыл кард цӕудзӕн аммонӕгты сахар Раввамӕ, иннӕуыл та — Иудеймӕ, Йерусалимы фидармӕ.

²¹Уымӕн ӕмӕ Вавилоны паддзах ӕрлӕудзӕни дыууӕ фӕндаджы райдиан ӕмӕ дӕсны фӕрсын райдайдзӕн: хӕлттау цӕгъддзӕни йӕ фаттӕ, фӕрсдзӕни йӕ хӕдзарон хуыцаугӕндты, игӕрмӕ кӕсдзӕни.

²²Йӕ рахиз къухӕй Йерусалимы хал сисдзӕн. Йерусалимы раз ӕрӕвӕрдзӕн йӕ сисфӕлдахӕн гӕрзтӕ. Тохы хъӕр ныккӕндзӕн ӕмӕ сисфӕлдахӕн гӕрзтӕ байсдзӕн кулдуары цурмӕ, йӕ батонынмӕ. Сахары ныхмӕ самайдзӕн сыджытбыру ӕмӕ хӕцӕн мӕсыг сараздзӕн.

²³Иузӕрдион ыл кӕй уыдзысты, уый тыххӕй йын ард чи бахордта, уыцы адӕм ацы дӕсныфӕрсӕн схондзысты мӕнг. Фӕлӕ сын Вавилоны паддзах ӕрымысдзӕн сӕ ард ӕмӕ сын сӕ сахар байсыныл ныллӕудзӕн.

²⁴Уымӕ гӕсгӕ афтӕ зӕгъы Дунедарӕг Хуыцау: уӕ азым уӕхӕдӕг кӕй ӕрымысыдыстут, уӕ фыдракӕндтӕ ӕмӕ уӕ тӕригъӕдтӕ кӕй раргом сты, уый тыххӕй сымах бахаудзыстут уӕ фыдгулы къухтӕм.

²⁵Дӕуӕн дӕр, Израилы ӕнаккаг фӕтӕг, фыдгӕнӕг, абон ралӕууыд дӕ тӕригъӕдты фӕстаг бон!

²⁶Дунедарӕг Хуыцау афтӕ зӕгъы: Сис дӕ сарыхъ ӕмӕ дӕ кады худ — нал дӕ бахъӕудзысты. Ныллӕг сбӕрзонд уыдзӕн, бӕрзонд та ӕрныллӕг уыдзӕн.

²⁷Сӕфт, сӕфт, сӕфт! Ацы сахарӕн йе сӕфт ӕрцӕудзӕн, ӕмӕ афтӕ уыдзӕн, цалынмӕ уыцы сахар кӕй у, уый ӕрцӕуа, уӕдмӕ, ӕмӕ йӕ уӕд ратдзынӕн уымӕн.

²⁸Адӕймаджы фырт, пехуымпариуӕг кӕн ӕмӕ фехъусын кӕн: Дунедарӕг афтӕ зӕгъы аммонӕгты ӕмӕ сӕ фидисты тыххӕй: кард йӕ кӕрддзӕмӕй ласт ӕрцыди марынӕн, арвӕрттывдау цӕхӕртӕ калынӕн.

²⁹Дӕ пехуымпартӕ дын мӕнг цӕстылуайӕнтӕ кӕй ӕвдисынц ӕмӕ дын фӕлывд дӕсныфӕрсӕнтӕ кӕй кӕнынц, уый тыххӕй ды дӕр бахаудзынӕ, сӕ сӕртӕ кӕмӕн акъуырдӕуыд, уыцы ӕнаккӕгты хыгъдмӕ. Сӕ тӕригъӕдты фӕстаг бон ралӕууыд.

³⁰Дӕ кард нытътъысс йӕ кӕрддзӕмы. Тӕрхон дын кӕндзынӕн, кӕм дӕ рафӕлдыстӕуыди, цы зӕххыл сӕнтыстӕ, уым.

³¹Ныххуырсдзынӕн дыл Мӕ маст, Мӕ масты пиллӕйттӕ дыл ныккалдзынӕн ӕмӕ дӕ ратдзынӕн, марын ахуыр чи у, уыцы агъуыд адӕмы къухтӕм.

³²Ды арты амӕттаг бауыдзынӕ, дӕ туджы бын фӕуыдзӕни зӕхх. Хъуыды дӕр дӕ ничиуал ӕркӕндзӕн, уымӕн ӕмӕ уый загътон Ӕз, Дунедарӕг».