Read Библи: Сыгъдӕг Езекиел 23 Bible Online

Езекиел 23 - Библи: Сыгъдӕг bible

Езекиел 23

²«Адӕймаджы фырт! Уыди дыууӕ сылгоймаджы, иу мады чызджытӕ.

³Се ’взонгӕй фӕстӕмӕ хӕтыны къахыл ныллӕууыдысты Мысыры бӕсты. Уым ӕууӕрст цыдысты сӕ риутӕ, сӕ чызгон дзидзитӕ.

⁴Хистӕр хойӕн йӕ ном уыди Охола, кӕстӕрӕн та — Охолива. Уыдон Мӕ къухы уыдысты, ныййардтой Мын фырттӕ ӕмӕ чызджытӕ. Охола у Самари, Охолива та — Йерусалим.

⁵Охола Мыл йӕ зӕрдӕ сивта, ӕнӕуаг митӕ кодта йӕ хӕзгултимӕ, ассириаг хӕстонтимӕ.

⁶Йӕ мондаджы цӕст-иу ӕрӕвӕрдта ӕрвхуыз дарӕстӕй фӕлыст ӕфсӕддон хицӕуттӕ ӕмӕ балхонтыл, алы рӕсугъд лӕппутыл — бӕхджынтыл.

⁷Хъахбай митӕ кодта семӕ — Ассирийы уӕздӕттимӕ, йӕхи-иу фӕчъизи кодта, мондаджы уарзтӕй кӕй уарзта, уыдоны гуымирытӕм кувынӕй.

⁸Мысырӕгтимӕ хъахбай митӕ кӕнынӕй дӕр не ’нцад. Уыдон йемӕ ӕмуат цыдысты йе ’взонджы бонтӕй фӕстӕмӕ, ӕууӕрстой йын йӕ чызгон дзидзитӕ, фӕчъизи-иу ӕй кодтой, сӕ хъахбай мондӕгтӕ дзы исгӕйӕ.

⁹Уый тыххӕй йӕ Ӕз радтон, мондаджы уарзтӕй кӕй уарзта, уыдоны, йӕ ассириаг хӕзгулты, къухтӕм.

¹⁰Уыдон ӕмуат ӕрцыдысты йемӕ, стӕй йын байстой йӕ фырттӕ ӕмӕ йӕ чызджыты, йӕхи та йын амардтой кардӕй. Йӕ хъысмӕт сси рагфӕдзӕхстау ӕппӕт сылгоймӕгтӕн.

¹¹Йӕ хо Охолива йын уый куы федта, уӕд уымӕй фыддӕр фӕци хӕтынмӕ ӕмӕ ӕнӕуаг митӕ кӕнынмӕ.

¹²Уый дӕр фӕцалх ассириӕгтимӕ хъахбай митӕ кӕныныл. Йӕ мондаджы цӕст-иу ӕрӕвӕрдта хъӕздыг дарӕстӕй фӕлыст ӕфсӕддон хицӕуттӕ ӕмӕ балхонтыл, ӕппӕт ӕвзаргӕ лӕппутыл — бӕхджынтыл.

¹³Ӕз федтон, уый дӕр йӕхи кӕй фӕчъизи кодта ӕмӕ дыууӕ хойы дӕр уыцы иу фӕндагыл кӕй цӕуынц, уый.

¹⁴Ацы хо иннӕмӕй ноджыдӕр хъахбайдӕр разынд. Уый федта къулыл къахт нывтӕ — сырх-сырхид ахорӕнтӕй ахуырст халдейаг нӕлгоймӕгты нывтӕ,

¹⁵сӕ астӕутыл уыди рӕттӕ баст, сӕ сӕртыл — пӕлӕхсар сарыхътӕ конд. Уыдысты вавилойнаг — Халдейы бӕстаг — — балхонты ӕнгӕс.

¹⁶Куыддӕр сӕ ауыдта, афтӕ сӕ бауарзта мондаджы уарзтӕй ӕмӕ сӕм минӕвӕрттӕ арвыста Халдейы зӕхмӕ.

¹⁷Уӕд ӕм вавилойнӕгтӕ ӕрбацыдысты, йӕ мондӕгты хуыссӕны ӕрӕмуат сты йемӕ ӕмӕ йӕ фӕчъизи кодтой, се ’нӕуаг мондӕгтӕ дзы исгӕйӕ. Фӕлӕ сӕ йӕхӕдӕг куы фӕчъизи ис, уӕд сыл йӕхи атигъ кодта.

¹⁸Семӕ ӕмуат ӕрцӕугӕйӕ, ӕргомӕй йӕ мондӕгтӕ ӕфсадыныл куы схӕцыд, уӕд дзы Ӕз та, ӕлгъгӕнгӕ, Ме ’ргом аздӕхтон, уымӕй размӕ йын йӕ хойыл Мӕхи куыд атигъ кодтон, афтӕ.

¹⁹Йе ’взонджы бонты Мысыры зӕххыл куыд хатти, уый мысгӕйӕ, райдыдта ноджы фылдӕр хӕтын.

²⁰Фӕцалх йӕ хӕзгултимӕ хӕтыныл; уыдонӕн сӕ худинаг — хӕрӕджы худинагау, сӕ мондӕгтӕ та — уырсы мондӕгтау.

²¹Афтӕмӕй ногӕй байдыдтай де ’взонджы бонты ӕнӕуаг митӕ кӕнын. Уӕд дын мысырӕгтӕ ӕууӕрстой дӕ риутӕ, дӕ чызгон риутӕ».

²²Уымӕ гӕсгӕ, Охолива, афтӕ зӕгъы Дунедарӕг Хуыцау: «Ӕз дыл сардаудзынӕн дӕ хӕзгулты, дӕхи кӕуыл атигъ кодтай, уыдоны. Алырдыгӕй сӕ ӕрбакӕндзынӕн дӕ ныхмӕ хӕцынмӕ:

²³вавилойнӕгты ӕмӕ ӕппӕт халдейӕгты, Пекод, Шоа ӕмӕ Коайы сахартӕй, уыдонимӕ ӕппӕт ассириӕгты — рӕсугъд лӕппуты, ӕфсӕддон хицӕутты ӕмӕ балхонты, фӕлтӕрд хӕстонты ӕмӕ стыр хицӕутты, ӕппӕт бӕхджынты.

²⁴Гӕрзифтонгӕй дӕм ӕрбацӕудзысты бӕхтӕ ӕмӕ уӕрдӕттимӕ, сӕ бирӕ ӕфсадимӕ, алырдыгӕй дыл ӕртыхсдзысты згъӕрхӕдӕттӕ, такатӕ ӕмӕ уартытимӕ. Ӕз дӕ сӕ тӕрхоны амӕттаг бакӕндзынӕн, ӕмӕ дын сӕхи ӕгъдаумӕ гӕсгӕ стӕрхон кӕндзысты.

²⁵Мӕ маст дыл ныххуырсдзынӕн; уыдоны хъӕхъхъаг зӕрдӕйы амӕттаг дӕ бакӕндзынӕн: уыдон дын алыг кӕндзысты дӕ фындз ӕмӕ дӕ хъустӕ, дӕ адӕмы та дын ныццӕгъддзысты кардӕй. Дӕ фырттӕ ӕмӕ дын дӕ чызджыты сахарӕй уацары ракӕндзысты, цы ма дӕм баззайа, сахарыл та арт бандзардзысты.

²⁶Дӕ уӕлӕйӕ дын раппардзысты дӕ дарӕстӕ ӕмӕ дӕ фӕлындӕнтӕ.

²⁷Афтӕмӕй Ӕз кӕрон скӕндзынӕн, Мысыры зӕххӕй демӕ цы ӕнӕфсарм ӕмӕ хъахбай митӕ схастай, уыдонӕн, ӕмӕ уӕд Мысыры бӕстӕ нал мысдзынӕ, нал ӕрлӕудзӕн дӕ зӕрдыл».

²⁸Уымӕн ӕмӕ афтӕ зӕгъы Дунедарӕг Хуыцау: «Ӕнӕуынон дын чи у ӕмӕ ӕлгъгӕнгӕ дӕхи кӕуыл атигъ кодтай, уыдоны къухтӕм дӕ дӕттын.

²⁹Ӕгъатырӕй дӕ бафхӕрдзысты, байсдзысты дын де ’ппӕт фӕллӕйттӕ ӕмӕ дӕ ныууадздзысты мадард бӕгънӕгӕй. Уӕд раргом уыдзысты дӕ худинаг, де ’нӕфсармдзинад ӕмӕ дӕ хъахбай митӕ.

³⁰Афтӕ дын бачындӕуыдзӕн, алы адӕмтимӕ ӕнӕуаг митӕ кӕнгӕйӕ, сӕ гуымирытӕй дӕхи кӕй фӕчъизи кодтай, уый тыххӕй.

³¹Дӕ хойы бафӕзмыдтай, ӕмӕ Ӕз дӕуӕн дӕр бадардзынӕн, уый кӕй бануӕзта, уыцы фыдӕхы кӕхц».

³²Дунедарӕг Хуыцау афтӕ зӕгъы: «Ды бануаздзынӕ, дӕ хо кӕй бануӕзта, уыцы фыдӕхы арф ӕмӕ стыр кӕхц. Уый куыд стыр у, афтӕ тынг фӕхудинаг ӕмӕ фӕаллайаг уыдзынӕ.

³³Дӕ бирӕ хъыгты уӕзӕй расыгау фӕуыдзынӕ, уымӕн ӕмӕ дӕ хо Самарийы кӕхц у фыд азар ӕмӕ гӕныстоны кӕхц!

³⁴Йӕ тӕккӕ бынтӕм ӕй бануаздзынӕ, стӕй йӕ базгъӕлӕнтӕ кӕндзынӕ ӕмӕ дӕ риутӕ ныттондзынӕ, уымӕн ӕмӕ афтӕ загътон Ӕз», — зӕгъы Дунедарӕг Хуыцау.

³⁵Уымӕ гӕсгӕ афтӕ зӕгъы Дунедарӕг Хуыцау: «Кӕй Мӕ ферох кодтай ӕмӕ Мӕ де ’ргом кӕй аздӕхтай, уый тыххӕй де ’нӕфсармдзинад ӕмӕ дӕ хъахбай миты амӕттаг фӕу».

³⁶Дунедарӕг мын загъта: «Адӕймаджы фырт! Охола ӕмӕ Охоливайӕн тӕрхонгӕнинаг дӕ ӕви нӕ? Радзур сын се ’лгъаг митӕ.

³⁷Уыдон хъахбай митӕ кодтой, сӕ къухтӕ самӕстой туджы, сӕ гуымирытимӕ хӕтыдысты ӕмӕ Мын цы цот ныййардтой, уыдоны сын арты нывондӕн хастой.

³⁸Ноджы ма Мӕ разы аххосджын мӕнӕ цӕй тыххӕй сты: сӕ цоты-иу сӕ гуымирыйы номыл цы бон аргӕвстой, тӕккӕ уыцы бон-иу бацыдысты Мӕ Кувӕндонмӕ ӕмӕ-иу ӕй фӕчъизи кодтой, Мӕ сабаты уагӕвӕрдтӕ дӕр Мын не ’ххӕст кодтой.

³⁹

⁴⁰Ноджы ма-иу минӕвӕрттӕ арвыстой ӕцӕгӕлон нӕлгоймӕгтӕм, цӕмӕй сӕм ӕрбацӕуой дардӕй; се ’рбацыдмӕ-иу ды цӕхсадтай дӕхи, сахуырстай-иу дӕ цӕстытӕ ӕмӕ-иу дӕхи сфӕлыстай фӕлындӕнтӕй.

⁴¹Семӕ-иу рӕсугъд фынгыл ӕрбадтӕ ӕмӕ-иу сын уыцы фынгыл ӕрӕвӕрдтай Мӕ буд ӕмӕ Мӕ сой.

⁴²Фынгӕй-иу райхъуыст адӕмы ӕнӕмӕт уынӕр, ӕдзӕрӕг быдырӕй-иу сӕм, бирӕ адӕмты ’хсӕнӕй, ӕрбахуындӕуыд нозтӕмхицты, ӕмӕ-иу сын уыдон сӕ къухтыл бакодтой цонгдарӕнтӕ, сӕ сӕртыл та-иу сын ӕркодтой рӕсугъд кады худтӕ».

⁴³Ӕз загътон, йӕ фыр хъахбайӕ чи ӕрхӕррӕгъ, уыцы Охолива ныр йе ’нӕуаг митӕ ныууадздзӕни, зӕгъгӕ.

⁴⁴Фӕлӕ йӕм уӕддӕр цыдысты хӕтаг сылмӕ цӕуӕгау; афтӕмӕй сӕхи ирхӕфстой хъахбай устытимӕ — Охола ӕмӕ Охоливаимӕ.

⁴⁵О, фӕлӕ сын рӕстгӕнджытӕ уыдзысты тӕрхонгӕнӕг. Бакӕндзысты сын, хӕтаг устытӕ ӕмӕ туг ныккалджытӕн цы бачындӕуы, уый, уымӕн ӕмӕ уыдон хӕтаг устытӕ сты, уыимӕ сӕ къухтӕ самӕстой туджы.

⁴⁶Уымӕ гӕсгӕ афтӕ зӕгъы Дунедарӕг Хуыцау: «Адӕмы ’хсӕнмӕ сӕ ракӕнут, ӕмӕ сӕ амӕттаг фӕуӕнт, бастигъӕнт сӕ.

⁴⁷Адӕм сӕ дурты бын фӕкӕнӕнт ӕмӕ сӕ кӕрдтӕй скъуыхтӕ кӕнӕнт, сӕ фырттӕ ӕмӕ сын сӕ чызджыты амарӕнт, сӕ хӕдзӕрттӕ та сын басудзӕнт.

⁴⁸Афтӕмӕй а зӕххыл кӕрон скӕндзынӕн хъахбайдзинадӕн. Уый ӕппӕт сылгоймӕгтӕн дӕр суыдзӕни зондамонӕн, ӕмӕ сымахау хъахбай митӕ нӕ кӕндзысты.

⁴⁹Сымахыл та ныххуырстӕуыдзӕн уӕ хъахбайы азым; уӕ гуымирытимӕ цы тӕригъӕдтӕ ракодтат, уыдоны тыххӕй баййафдзыстут ӕфхӕрд. Ӕмӕ уӕд базондзыстут, Ӕз Дунедарӕг Хуыцау кӕй дӕн, уый».