Read Библи: Сыгъдӕг Езекиел 24 Bible Online

Езекиел 24 - Библи: Сыгъдӕг bible

Езекиел 24

¹Фарӕстӕм азы дӕсӕм мӕйӕн йӕ дӕсӕм бон мын Дунедарӕг загъта:

²«Адӕймаджы фырт! Абоны бон дӕхимӕ ныффысс, уымӕн ӕмӕ тӕккӕ ацы бон Вавилоны паддзах ӕрхъула кӕндзӕн Йерусалимыл.

³Ацы хиваст адӕммӕ ӕмбисонды хуызы бартхъирӕн кӕн: „Афтӕ зӕгъы Дунедарӕг Хуыцау: аг ӕрӕвӕр ӕмӕ дзы дон ныккӕн,

⁴стӕй дзы ныккал дзидзайы хуыздӕр хӕйттӕ: сины стджытӕ ӕмӕ сгуытӕ, байдзаг ӕй кӕн ӕвзаргӕ стджытӕй —

⁵хӕрзхаст фысты дзидза ӕмӕ стджытӕй. Аджы бын-иу ӕндзаргӕ дӕр стджытӕй бакӕн ӕмӕ-иу аг рафыцын кӕн, йӕ мидӕг стджытӕ дзӕбӕх куыд стайой, афтӕ“».

⁶Афтӕ зӕгъы Дунедарӕг Хуыцау: «Додойаг у, тугныккалдӕй йемыдзаг чи у, уыцы сахар! Додойаг у, чи сызгӕ ӕмӕ йе згӕ кӕмӕн не ссыди, уыцы аг! Хай хайы фӕдыл исут йӕ хуылфӕй, хӕлттӕ сыл не ’ппаргӕйӕ.

⁷Уымӕн ӕмӕ туг ныккалдтой ацы сахары цӕрджытӕ, уыимӕ зӕххыл нӕ, фӕлӕ айнӕг къӕдзӕхыл, ӕндӕра рыджы бын фӕуыдаид зӕххыл.

⁸Ӕз уыцы туг айнӕг къӕдзӕхыл уымӕн ныууагътон, цӕмӕй ма басусӕг уа, ӕмӕ Мӕ маст ссудза маст исыны охыл».

⁹Уымӕ гӕсгӕ афтӕ зӕгъы Дунедарӕг Хуыцау: «Додойаг у, туг кӕм ныккалди, уыцы сахар! Ӕз скӕндзынӕн стыр арт;

¹⁰ды-иу ыл суг бафтау ӕмӕ йӕ тынгдӕр сцырын кӕн, дзидзатӕ куыд стайой, афтӕ. Стӕй, сӕ бас куы байсыса, уӕд стджытӕ дӕр стайдзысты.

¹¹Ды-иу афтид аг зынджытыл ныууадз, цӕмӕй ссырхзынг уа йе ’рхуы, атайа йӕ чъизи ӕмӕ ссӕуа йе згӕ.

¹²Ӕнӕпайда фыдӕбон! Не ссӕудзӕни йӕ чъизи, суанг арты бон дӕр ын ницы бауыдзӕн!

¹³Уый бӕрц ӕлгъаг у дӕ чъизи, ӕмӕ дӕ цасфӕнды куы сыгъдӕг кӕнон, уӕд дӕр чъизийӕ баззайдзынӕ ӕмӕ фидӕны дӕр не ссыгъдӕг уыдзынӕ, цалынмӕ дыл Мӕ азар нӕ ныххуырсон, уӕдмӕ.

¹⁴Афтӕ зӕгъын Ӕз, Дунедарӕг. Афон ӕрцӕудзӕн ӕмӕ Ӕз афтӕ бакӕндзынӕн. Мӕ фӕнд нӕ аивдзынӕн, нӕ фӕтӕригъӕд кӕндзынӕн ӕмӕ нӕ ныббардзынӕн. Стӕрхон дын кӕндзынӕн, цы фӕндагыл лӕууыс ӕмӕ цы хъуыддӕгтӕ аразыс, уыдонмӕ гӕсгӕ», — зӕгъы Дунедарӕг Хуыцау.

¹⁵Дунедарӕг мын загъта:

¹⁶«Адӕймаджы фырт! Дӕ цӕстытӕ кӕй уындӕй райынц, уый дын Ӕз ӕнӕнхъӕлӕджы байсдзынӕн, фӕлӕ-иу ды ма ску ӕмӕ ма ныхъхъарӕг кӕн, дӕ цӕстӕй иу сыг дӕр ма ’рхауӕд.

¹⁷Ӕнӕдзургӕйӕ дзыназ, йӕ мардыл-иу ын богъ-богъ ма кӕн. Дӕ сарыхъ-иу стух дӕ сӕрыл, дӕ дзабыртӕ-иу дӕ къӕхтыл скӕн. Дӕ зачъе ма бамбӕрз, мардыкӕнды къӕбӕрӕй ма саход».

¹⁸Адӕмимӕ райсомӕй цы бон дзырдтон, уыцы бон изӕрӕй мӕ бинойнаг амард, ӕмӕ дыккаг бон ӕз бакодтон, куыд мын загъдӕуыд, афтӕ.

¹⁹Адӕм мӕ бафарстой: «Дӕ ацы митӕ цы амонынц, уый нын нӕ зӕгъдзынӕ?»

²⁰Дзуапп сын радтон: «Дунедарӕг мын фехъусын кодта Йӕ ныхас,

²¹цӕмӕй ӕз Израилы адӕмӕн зӕгъон: „Дунедарӕг Хуыцау афтӕ зӕгъы: Ӕз фӕчъизи кӕндзынӕн Мӕ Кувӕндон — уӕ хъомысы цӕджындз, уӕ цӕстырухс, уӕ удлӕууӕн. Уӕ фырттӕ ӕмӕ уӕ чызджытӕ та, сахары кӕй ныууагътат, уыдон, карды амӕттаг бауыдзысты“.

²²Ӕмӕ уӕд сымах дӕр, ӕз куыд кодтон, афтӕ кӕндзыстут: уӕ зачъетӕ нӕ бамбӕрздзыстут, мардыкӕнды къӕбӕрӕй нӕ саходдзыстут,

²³уӕ сарыхътӕ уыдзысты уӕ сӕртыл, уӕ дзабыртӕ — уӕ къӕхтыл; нӕдӕр кӕугӕ кӕндзыстут, нӕдӕр хъарӕг, фӕлӕ уӕ фыдракӕндты аххосӕй батайдзыстут уӕлхъӕдӕй ӕмӕ кӕрӕдзийы раз хъӕрздзыстут.

²⁴Езекиел уын уыдзӕни нысан. Сымах кӕндзыстут, уый куыдӕриддӕр бакодта, афтӕ. Ӕмӕ уыл уыдӕттӕ куы ’рцӕуой, уӕд базондзыстут, Ӕз Дунедарӕг Хуыцау кӕй дӕн, уый».

²⁵Ноджы ма мын Дунедарӕг загъта: «Адӕймаджы фырт! Сӕ хъару, сӕ цин ӕмӕ сӕ кад, сӕ цӕстырухс ӕмӕ сӕ удлӕууӕн, сӕ фырттӕ ӕмӕ сӕ чызджыты сын цы бон байсон,

²⁶уыцы бон дӕм фӕзындзӕни, чи аирвӕзти, уыцы лигъдон ӕмӕ дын уац фехъусын кӕндзӕн.

²⁷Ӕмӕ уыцы бон лигъдоны раз байгом уыдзӕн дӕ дзых ӕмӕ райдайдзынӕ дзурын — нал уыдзынӕ ӕгомыг. Ды сын суыдзынӕ нысан, ӕмӕ уӕд базондзысты, Ӕз Дунедарӕг кӕй дӕн, уый».