Read Библи: Сыгъдӕг Езекиел 27 Bible Online

Езекиел 27 - Библи: Сыгъдӕг bible

Езекиел 27

¹Дунедарӕг мын загъта:

²Адӕймаджы фырт! Ды дӕр ныхъхъарӕг кӕн Тирыл!

³Зӕгъ Тирӕн, денджызмӕ рацӕуӕнтӕ чи бацахста ӕмӕ денджызы был цы бӕстӕтӕ ис, уыдонимӕ сӕудӕджер чи кӕны, уымӕн: афтӕ зӕгъы Дунедарӕг Хуыцау: «Тир! Ды дӕхи схуыдтай алӕмӕты рӕсугъд.

⁴Денджызы астӕу лӕууыс — науӕнгӕс — хорз дӕ сфӕлыстой дӕ аразджытӕ, алцӕмӕй дӕр — ӕххӕст.

⁵Сениры кипарисӕй дын сарӕзтой дӕ чъилтӕ, Ливанӕй ласт кедрӕй дын ӕрцамадтой дӕ наухъилтӕ,

⁶башайнаг тулдзӕй дын донфыййӕгтӕ скодтой, тӕрс бӕласӕй дын сарӕзтой дӕ бандӕттӕ, сфӕлыстой дӕ киттимаг пылыстӕгӕй.

⁷Мысыраг нывӕфтыд гӕн хъуымацӕй уыдысты дӕ наупӕлӕзтӕ ӕмӕ дӕ тырыса, елишайаг ӕрвхуыз ӕмӕ сӕнт сырх хъуымӕцтӕй — дӕ уӕлӕдарӕс.

⁸Сидон ӕмӕ Арвады цӕрджытӕ дӕ бӕлӕгътӕрджытӕ уыдысты, къухӕй дӕсныйӕ дӕм чи уыд, уыдон та — дӕ наутӕрджытӕ.

⁹Гевалы хистӕртӕ, алы куыстмӕ дӕсны чи уыди, уыдон, куыстой дӕуӕн, цӕмӕй ӕхгӕд ӕрцӕуой дӕ хуынчъытӕ. Ӕрбацыдысты-иу дӕм алы наутӕ ӕмӕ денджызонтӕ сӕудӕджер кӕнынмӕ.

¹⁰Персайнӕгтӕ, лудӕгтӕ ӕмӕ путӕгтӕ уыдысты де ’фсады хӕстонтӕ, дӕ систыл-иу дын уартытӕ ӕмӕ такатӕ ӕрцауыгътой — афтӕ-иу систой уӕлиау дӕ кад.

¹¹Арвадӕгтӕ ӕд ӕфсад дӕ алыварс лӕууыдысты дӕ бырутыл, гаммадӕгтӕ — дӕ мӕсгуытыл. Дӕ алыварс-иу дӕ систыл сӕ уартытӕ ӕрцауыгътой, ӕмӕ-иу афтӕмӕй ноджы рӕсугъддӕр сдӕ.

¹²Дӕ исбонӕн ныккӕнӕн дӕр нӕ уыд, ӕмӕ дын Таршишы сахар дӕ базайрӕгты сӕрмӕ лӕвӕрдта ӕвзист, ӕфсӕйнаг, къала ӕмӕ зды.

¹³Йаван, Тувал ӕмӕ Мешехы цӕрджытӕ базар кодтой демӕ, дӕ базайрӕгты сӕрмӕ дын лӕвӕрдтой сӕ цагъарты, стӕй се ’рхуы мигӕнӕнтӕ.

¹⁴Тогармайы сӕудӕджертӕ-иу дын уӕрдоныл ифтындзгӕ ӕмӕ саргъы бӕхтӕ ӕрбаластой.

¹⁵Демӕ базар кодтой Деданы сӕудӕджертӕ дӕр, стӕй денджызгӕрон сахартӕй бирӕтӕ. Ӕрбаластой-иу дын пылыстӕг ӕмӕ сау хъӕдӕрмӕг.

¹⁶Дӕ базайрӕгтӕн ныккӕнӕн кӕй нӕ уыд, уымӕ гӕсгӕ демӕ сӕудӕджер кодтой арамейӕгтӕ дӕр. Дӕ базайрӕгты ныхмӕ дын лӕвӕрдтой ӕрвхуыз зынаргъ дуртӕ, сӕнт сырх хъуымӕцтӕ, нывӕфтыд ӕмӕ лыстӕг гӕнӕй уафт хъуымӕцтӕ, кораллтӕ ӕмӕ лалтӕ.

¹⁷Демӕ базар кодтой Иудей ӕмӕ Израил. Дӕ базайрӕгты ныхмӕ дын лӕвӕрдтой Миннитӕй ласт мӕнӕу, легъуитӕ, мыд, оливӕйы сой ӕмӕ ӕвдадз.

¹⁸Дӕ базайрӕгтӕн, дӕ исбонӕн ныккӕнӕн кӕй нӕ уыд, уымӕ гӕсгӕ демӕ сӕудӕджер кодта Дамаск. Уӕй дын кодта хелбойнаг сӕн ӕмӕ цахайраг къуымбил.

¹⁹Ведан ӕмӕ Йаваны байзӕддаг, Узалы цӕрджытӕ, дӕ базайрӕгты сӕрмӕ дӕуӕн лӕвӕрдтой куырдадзы цагъд ӕфсӕн, ноджы ма лавры сыф ӕмӕ ӕндӕр хъацӕнтӕ.

²⁰Деданы цӕрджытӕ дын уӕй кодтой зынаргъ базӕмбӕрзӕнтӕ саргъы бӕхты рӕвдзӕн.

²¹Демӕ сӕудӕджер кодтой Арави ӕмӕ Кедары ӕппӕт ӕлдӕрттӕ. Уӕй дын кодтой уӕрыччытӕ, фырытӕ ӕмӕ цӕутӕ.

²²Демӕ базар кодтой Сава ӕмӕ Раамайы сӕудӕджертӕ. Дӕ базайрӕгты сӕрмӕ дын лӕвӕрдтой сӕ хуыздӕр базайрӕгтӕ: алы ӕвдадз, налхъуыт-налмастӕ ӕмӕ сыгъзӕрин.

²³Демӕ базар кодтой Харан, Канне, Еден, Сава, Ассири ӕмӕ Килмады сӕудӕджертӕ.

²⁴Дӕ базартӕм дын уӕймӕ ластой зынаргъ дарӕстӕ, ӕрвхуыз пӕлӕзтӕ, нывӕфтыд хъуымӕцтӕ ӕмӕ гауызтӕ, стӕй фидар бӕндӕнтӕ.

²⁵Таршишаг наутӕ дын систы сӕудӕджергӕнӕг чырӕтӕ. Тынг сбонджын ӕмӕ скадджын дӕ ды денджызы астӕу.

²⁶Дӕ чематӕрджытӕ дӕ фурды астӕумӕ батардтой, скӕсӕйнаг уад дӕ фурды астӕу ныппырх кодта.

²⁷Де сӕфты бон дӕ исбон, дӕ денджызонтӕ, дӕ наутӕрджытӕ, дӕ науӕмпъузджытӕ, дӕ сӕудӕджертӕ ӕмӕ дӕ хӕстонтӕ — дӕ адӕм иууылдӕр денджызы бын фӕуыдзысты.

²⁸Дӕ наутӕрджыты цъӕхахстӕй дӕ сыхаг адӕмтӕ ныккӕрздзысты.

²⁹Наутӕрджытӕ се ’ппӕт дӕр рахиздзысты сӕ наутӕй — денджызонӕй, наутӕрӕгӕй зӕххыл ӕрлӕудзысты.

³⁰Дзагхъӕлӕсӕй дыл ныккӕудзысты ӕмӕ хъарӕг кӕндзысты; сӕ сӕртыл рыг байзӕрдзысты ӕмӕ сӕхи рыджы ӕвдулдзысты.

³¹Сау дыл дардзысты: адасдзысты сӕ сӕртӕ, сӕхъистӕ скӕндзысты сӕ уӕлӕ, хъыггӕнгӕ дыл зӕрдӕрхалӕн хъарӕг сисдзысты.

³²Сӕ сӕфты бон дыл сисдзысты хъарӕг: „Фурды астӕу Тиры хуызӕн чи бабын ис!“

³³Денджызты сӕудӕджер кӕнгӕйӕ, ды бирӕ адӕмты ӕфсӕстай. Ныккӕнӕн дын цы исбонӕн нӕ уыд, уымӕй-иу сыхаг паддзӕхты схъӕздыг кодтай.

³⁴Фӕлӕ дӕ ныр ныппырх кодтой денджызы уылӕнтӕ, де ’ппӕт исбон, де ’ппӕт адӕм фурды бын куы фесты.

³⁵Денджызгӕрон сахартыл ӕвирхъау тас куы бахӕцыд, куы ныккӕрзыдтой паддзӕхтӕ, сӕ цӕсгомы хуыз куы фӕцыд.

³⁶Иннӕ адӕмты сӕудӕджертӕ та дыл куы кӕнынц ӕхситт, ӕвирхъау тас куы ’фтауы алкӕуыл дӕ хъысмӕт — ды бабын дӕ мыггагмӕ».