Read Библи: Сыгъдӕг Езекиел 40 Bible Online

Езекиел 40 - Библи: Сыгъдӕг bible

Езекиел 40

¹Нӕ ахасты дыууын фӕндзӕм азы фыццаг мӕйӕн йӕ дӕсӕм бон, Йерусалимы ныппырхыл цыппӕрдӕс азы куы рацыд, тӕккӕ уыцы бон мыл Дунедарӕджы къух бандзӕвыд ӕмӕ мӕ ахаста уырдӕм.

²Хуыцау мӕ Йӕ рард цӕстылуайӕнты акодта Израилы зӕхмӕ ӕмӕ мӕ тынг бӕрзонд хохыл ӕрлӕууын кодта. Хохӕн цыма йӕ хуссайраг фахсыл уыдысты сахары бӕстыхӕйттӕ.

³Ӕмӕ мӕ бакодта уырдӕм. Уым кулдуары раз лӕууыди иу лӕг: йӕ уынд — ӕрттиваг ӕрхуыйау, йӕ къухты — гӕнӕй быд бӕндӕн ӕмӕ барӕн хъил.

⁴Уыцы лӕг мын загъта: «Адӕймаджы фырт! Кӕс дӕ цӕстытӕй, хъус дӕ хъустӕй ӕмӕ фиппай, цыдӕриддӕр дын равдисон, уыдӕттӕ. Ардӕм уый тыххӕй конд ӕрцыдтӕ, цӕмӕй дын сӕ равдисон. Ӕмӕ, цыдӕриддӕр фенай, уый-иу Израилы адӕмӕн радзур».

⁵Ӕз Кувӕндоны алыварс федтон быру. Уым цы лӕг лӕууыд, уый йӕ барӕн хъилӕй — йӕ дӕргъ ӕхсӕз ӕлмӕрины (хуымӕтӕг ӕлмӕринӕй армытъӕпӕны бӕрц стырдӕртӕ) — сбарста быруйӕн йӕ фӕтӕн ӕмӕ йӕ бӕрзӕнд, ӕмӕ дыууӕрдӕм дӕр уыди барӕн хъилы йас.

⁶Уый фӕстӕ рацыди кулдуармӕ, йе ’ргом скӕсӕнӕрдӕм арӕзт кӕмӕн уыд, уымӕ, схызт ын йӕ асинтыл ӕмӕ йын сбарста йӕ къӕсӕры бӕзн — уыди барӕн хъилы йас.

⁷Мидӕгӕй, скӕсӕнварс цы кулдуар уыди, уый фӕйнӕфӕрсты, йӕ бакомкоммӕ фаллаг кулдуары ’рдӕм дыууӕ рӕнхъӕй цыдысты фӕрссаг хатӕнтӕ, ӕртыгӕйттӕ. Уыцы лӕг сӕ сбарста, ӕмӕ алы хатӕнӕн дӕр йӕ дӕргъ дӕр ӕмӕ йӕ уӕрх уыдысты барӕн хъилы йӕстӕ. Хатӕнӕй хатӕны ’хсӕн уыди фондз ӕлмӕрины. Фаллаг кулдуарӕн дӕр, скӕсӕнварс цы кулдуӕрттӕ уыди, уыдонау йӕ къӕсӕры бӕзн уыди барӕн хъилы йас. Кулдуарӕн йе ’ргом — тыргъы ’рдӕм, тыргъӕн йӕ дӕргъ уыдис аст ӕлмӕрины, йӕ разӕй дыууӕ цӕджындзӕн та сӕ бӕзн уыди фӕйнӕ дыууӕ ӕлмӕрины. Тыргъ лӕууыди кулдуарӕй Кувӕндоны ’хсӕн.

⁸

⁹

¹⁰

¹¹Уыцы лӕг сбарста кулдуарӕн йӕ бацӕуӕны уӕрх, ӕмӕ уыди дӕс ӕлмӕрины, йӕ дӕргъ та — ӕртындӕс ӕлмӕрины.

¹²Алы хатӕнӕй дӕр размӕ дӕр ӕмӕ фӕстӕмӕ дӕр цыди ӕлмӕрины йас фӕйнӕ гӕрӕны.

¹³Уый фӕстӕ сбарста, кулдуары фӕйнӕфарс дыууӕ рӕнхъӕй цы хатӕнтӕ цыди, уыдоны ’хсӕн дӕрддзӕг, галиу хатӕнты чъылдымӕй рахиз хатӕнты чъылдымы онг, ӕмӕ дзы уыди дыууын фондз ӕлмӕрины. Сӕ дуӕрттӕ уыдысты кӕрӕдзийы ныхмӕ.

¹⁴Кӕрт ӕмӕ кулдуӕртты раз цӕджындзтӕ сбарста, сӕ бӕрзӕнд уыди фӕйнӕ ӕхсай ӕлмӕрины.

¹⁵Ӕддаг кулдуары тигъӕй мидӕггаг кулдуары тигъмӕ уыди фӕндзай ӕлмӕрины.

¹⁶Мидкулдуар фӕрссаг хатӕнтӕн сӕхиуыл дӕр ӕмӕ сӕ къуыпп цӕджындзгӕндтыл дӕр уыди рудзгуытӕ, се ’ппӕтыл дӕр; тыргъты дӕр алырдыгӕй — рудзгуытӕ, цӕджындзты цъуппытыл та — пальмӕтӕ.

¹⁷Уыцы лӕг мӕ бакодта ӕддаг кӕртмӕ, йӕ алыварс — ӕртын агъуысты. Кӕрт уыди дурӕй астӕрд.

¹⁸Кӕрты астӕрд баиу ис кулдуары дыууӕ фарсимӕ, астӕрд ӕмӕ кулдуарӕн сӕ уӕрх уыди иухуызон. Уыимӕ астӕрд мидӕггаг кӕртӕй ныллӕгдӕр ӕвӕрд уыд.

¹⁹Уыцы лӕг дӕллаг кулдуарӕй мидӕггаг кӕрты ӕддаг тигъы онг банымадта сӕдӕ ӕлмӕрины. Скӕсӕнварс куы сбарста, уӕд бацыдыстӕм цӕгатварсӕрдӕм.

²⁰Ӕмӕ уыцы лӕг сбарста ӕддаг кӕрты цӕгатварс кулдуары уӕрх.

²¹Уый дӕр уыди скӕсӕнварс кулдуары халдих: ӕд хатӕнтӕ, ӕд цӕджындзтӕ ӕмӕ ӕд гӕрӕнтӕ йӕ дӕргъ иумӕйагӕй уыди ӕртын ӕлмӕрины, йе ’ппӕт уӕрх та — дыууын фондз ӕлмӕрины.

²²Сӕ рудзгуыты, сӕ къуыпп цӕджындзгӕндты ӕмӕ сӕ пальмӕты ас уыди скӕсӕнварс кулдуары уӕтты халдих. Кулдуармӕ цыди авд къӕпхӕны.

²³Цӕгатварс кулдуарӕн дӕр, скӕсӕнварс цы кулдуар уыди, уыйау йе ’ргом арӕзт уыди мидӕггаг кӕрты кулдуары ’рдӕм. Кулдуӕртты ’хсӕн та уыди сӕдӕ ӕлмӕрины.

²⁴Стӕй мӕ уыцы лӕг бакодта хуссарварс кӕртмӕ, йӕ кулдуары ’рдӕм. Уым дӕр сбарста ӕппӕт дӕр, цӕджындзӕй, тыргъӕй, ӕмӕ уыдон дӕр уыдысты иннӕты халдих. Ам дӕр кулдуармӕ цыди авд къӕпхӕны. Кулдуарӕн йӕ дӕргъ уыди фӕндзай ӕлмӕрины, йӕ уӕрх та — дыууын фондз ӕлмӕрины. Бацӕуӕны фӕйнӕфарс алы цӕджындзы цъуппыл дӕр — пальмӕ.

²⁵

²⁶

²⁷Мидӕггаг кӕрты хуссарварс кулдуарӕн дӕр йе ’ргом уыди дӕллаг кулдуары ’рдӕм арӕзт, ӕмӕ уыцы лӕг дыууӕ кулдуары ’хсӕн банымадта сӕдӕ ӕлмӕрины.

²⁸Уыцы лӕг мӕ хуссарварс кулдуарыл бакодта мидӕггаг кӕртмӕ, ӕмӕ, уым цы сбарста, уыдоны ас дӕр уыд иннӕты халдих.

²⁹Уым дӕр уыд иннӕты хуызӕн фӕрссаг хатӕнтӕ, цӕджындзтӕ, тыргътӕ, алырдыгӕй — рудзгуытӕ. Уым дӕр фӕзахсты дӕргъ уыди фӕндзай ӕлмӕрины, йӕ уӕрх та — дыууын фондз ӕлмӕрины.

³⁰Тыргътӕн сӕ дӕргъ уыди дыууын фондз ӕлмӕрины, сӕ уӕрх та — фондз ӕлмӕрины.

³¹Ӕмӕ тыргътӕ кастысты ӕддаг кӕртмӕ, пальмӕтӕ дӕр уыдысты цӕджындзты цъуппытыл. Кулдуармӕ цыди аст къӕпхӕны.

³²Уыцы лӕг мӕ скӕсӕнварс кулдуарыл бакодта мидӕггаг кӕртмӕ, ӕмӕ, уым цы сбарста, уыдоны ас дӕр уыд иннӕты халдих.

³³Уым дӕр уыди иннӕты хуызӕн фӕрссаг хатӕнтӕ, цӕджындзтӕ, тыргътӕ, алырдыгӕй — рудзгуытӕ. Уым дӕр фӕзахсты дӕргъ уыди фӕндзай ӕлмӕрины, йӕ уӕрх та — дыууын фондз ӕлмӕрины.

³⁴Тыргътӕ кастысты ӕддаг кӕртмӕ, пальмӕтӕ дӕр уыдысты цӕджындзты цъуппытыл. Кулдуармӕ цыди аст къӕпхӕны.

³⁵Уыцы лӕг мӕ бакодта цӕгатварс кулдуарыл, ӕмӕ, уым цы сбарста, уыдоны ас дӕр уыд иннӕты халдих.

³⁶Уым дӕр уыди иннӕты хуызӕн фӕрссаг хатӕнтӕ, цӕджындзтӕ, тыргътӕ, алырдыгӕй — рудзгуытӕ. Уым дӕр фӕзахсты дӕргъ уыди фӕндзай ӕлмӕрины, йӕ уӕрх та — дыууын фондз ӕлмӕрины.

³⁷Тыргътӕ кастысты ӕддаг кӕртмӕ, пальмӕтӕ дӕр уыдысты цӕджындзты цъуппытыл. Кулдуармӕ цыди аст къӕпхӕны.

³⁸Цӕгатварс кулдуары раз уыд иу агъуыст, тыргъӕй йӕм уыди дуар. Уым донӕй ныхсынц иууылсудзинаджы уӕнгтӕ.

³⁹Кулдуары раз тыргъы иуӕрдыгӕй дӕр ӕмӕ иннӕрдыгӕй дӕр лӕууыди дыгай фынгтӕ, иууылсудзинӕгтӕ, тӕригъӕды нывондӕгтӕ ӕмӕ фиддоны нывондӕгтӕ ӕргӕвдынӕн.

⁴⁰Цӕгатварс кулдуары ӕдде, кулдуарӕн йӕ галиуфарс ӕмӕ йӕ рахизфарс, уыди дыгай фынгтӕ.

⁴¹Афтӕмӕй кулдуары фӕйнӕфӕрсты уыди цыппӕргай фынгтӕ, нывондӕгтӕ ӕргӕвдынӕн.

⁴²Иууылсудзинӕгтӕ цӕттӕ кӕнынӕн уыди цыппар фынджы, карст дуртӕй амад, алкӕцыйӕн дӕр дзы йӕ дӕргъ уыди ӕлмӕрин ӕмӕ ӕрдӕг, йӕ уӕрх дӕр — ӕлмӕрин ӕмӕ ӕрдӕг, йӕ бӕрзӕнд та — ӕлмӕрин. Уыдоныл ӕрӕвӕрынц иууылсудзинӕгтӕ ӕмӕ иннӕ нывондӕгты дзидзатӕ ӕмӕ ӕргӕвдӕн кӕрдтӕ. Къултыл алырдыгӕй — къӕпсыртӕ фидаргонд, армытъӕпӕны йӕстӕ.

⁴³

⁴⁴Цӕгатварс кулдуары ӕмӕ хуссарварс кулдуары цур уыди фӕйнӕ агъуысты. Фыццаг агъуыстӕн йе ’ргом уыд хуссарӕрдӕм, дыккагӕн та — цӕгатӕрдӕм.

⁴⁵Уыцы лӕг мын загъта: «Йе ’ргом хуссарӕрдӕм кӕмӕн у, уыцы агъуыст лӕвӕрд у Кувӕндоны кусӕг сауджынтӕн,

⁴⁶йе ’ргом цӕгатӕрдӕм кӕмӕн у, уыцы агъуыст та лӕвӕрд у нывондхӕссӕны цур кусӕг сауджынтӕн. Адон Цадокы байзӕддаг сты. Левийы байзӕддагӕй ӕрмӕст адонӕн ис Дунедарӕджы раз сауджынтӕй кусыны бар».

⁴⁷Уыцы лӕг сбарста кӕрт дӕргъмӕ дӕр ӕмӕ уӕрхмӕ дӕр, ӕмӕ дыууӕрдӕм дӕр уыд фӕйнӕ сӕдӕ ӕлмӕрины — ӕмхуызон цыппӕрдигъон. Кувӕндоны раз лӕууыди нывондхӕссӕн.

⁴⁸Уыцы лӕг мӕ бакодта Кувӕндоны тыргъмӕ ӕмӕ йӕ сбарста. Бацӕуӕн кулдуары уӕрх уыди цыппӕрдӕс ӕлмӕрины, кулдуары фӕйнӕфарс къултӕн сӕ дӕргъ уыди фӕйнӕ ӕртӕ ӕлмӕрины, йӕ мидӕг цӕджындзтӕн сӕ алкӕцыйы бӕзн та — фондз ӕлмӕрины.

⁴⁹Тыргъӕн йӕ уӕрх — ссӕдз ӕлмӕрины, йӕ дӕргъ та — дыууадӕс ӕлмӕрины. Цыди йӕм дӕс къӕпхӕны. Кулдуары фӕйнӕфарс къултӕн сӕ разы лӕууыди фӕйнӕ цӕджындзы.