Read Библи: Сыгъдӕг Езекиел 9 Bible Online

Езекиел 9 - Библи: Сыгъдӕг bible

Езекиел 9

¹Дунедарӕг мын нӕргӕ хъӕлӕсӕй фехъусын кодта: «Ацы сахар бафхӕрын кӕмӕн бабар чындӕуыд, уыдон ӕрбацӕуӕнт, алкӕй къухы дӕр дзы хъуамӕ уа мӕлӕтхӕссӕг хӕцӕнгарз!»

²Ӕмӕ ӕз федтон: йе ’ргом цӕгатӕрдӕм арӕзт кӕмӕн уыд, уыцы уӕллаг кулдуары ’рдыгӕй ӕрбацӕуынц ӕхсӕз лӕджы, алкӕй къухы дӕр дзы — марӕн гарз. Се ’хсӕн ма уыдис иу лӕг, гӕн хъуымацӕй дарӕсы, йӕ астӕуыл — нымӕрдары фыссӕнгарз. Ӕрбацыдысты ӕмӕ ӕрхуы нывондхӕссӕны раз ӕрлӕууыдысты.

³Израилы Хуыцауы кад хӕрдмӕ ссыди, цы херувимтыл ӕнцад, уыдонӕй ӕмӕ Кувӕндоны къӕсӕрыл ӕрлӕууыд. Дунедарӕг фӕсидти, гӕн хъуымацӕй дарӕс кӕуыл уыд, йӕ астӕуыл та нымӕрдары фыссӕнгарз, уыцы лӕгмӕ

⁴ӕмӕ йын загъта: «Ӕрзил сахарыл, Йерусалимыл, ӕмӕ, цы ’лгъаг митӕ дзы цӕуы, уыдоны тыххӕй чи дзыназы, уыцы хъынцъымгӕнӕг адӕмы ныхтыл сӕвӕр нысан».

⁵Ӕз фехъуыстон, иннӕтӕн цы загъта, уый дӕр: «Сымах та цӕут йӕ фӕдыл ӕмӕ адӕмы цӕгъдут. Уӕ цӕст сын ма фӕтӕригъӕд кӕнӕд ӕмӕ сын ма ныббарут.

⁶Зӕронд лӕгӕй, лӕппуйӕ, чызгӕй, сабийӕ, сылгоймагӕй — се ’ппӕты дӕр ныццӕгъдут, ӕрмӕст, нысан кӕуыл ис, уыдонӕй макӕмӕ бавналут. Райдайут мӕ Кувӕндонӕй». Ӕмӕ райдыдтой адӕмы хистӕртӕй, Кувӕндоны раз чи лӕууыди, уыдонӕй.

⁷Дунедарӕг загъта: «Фӕчъизи кӕнут Кувӕндон. Мӕрдтӕй йын байдзаг кӕнут йӕ кӕртытӕ, уый фӕстӕ-иу рацӕут». Уыдон рацыдысты ӕмӕ марын райдыдтой сахары.

⁸Куы сӕ мардтой, уӕд ӕз иунӕгӕй аззадтӕн, ныддӕлгом дӕн зӕххыл ӕмӕ сдзынӕзтон: «О Дунедарӕг Хуыцау! Ау, Дӕ маст Йерусалимыл ӕххуырсгӕйӕ, Израилы фӕдонтӕй ма чи баззади, ӕппӕт уыдоны бабын кӕндзынӕ?»

⁹Уый мын дзуапп радта: «Израил ӕмӕ Иудейы азым тынг стыр у. Ацы зӕхх тугӕй йедзаг у. Сахары мидӕг рӕстдзинадӕн йӕ кой дӕр нӕй. Афтӕ зӕгъынц, Дунедарӕг, дам, Йӕхи атигъ кодта а зӕххыл ӕмӕ ницы уыны.

¹⁰Уымӕ гӕсгӕ сын Мӕ цӕст нӕ фӕтӕригъӕд кӕндзӕни ӕмӕ сын нӕ ныббардзынӕн. Сӕ хъуыддӕгтӕ сын сӕхи ныхмӕ фӕкӕндзынӕн».

¹¹Ӕмӕ мӕнӕ, гӕн хъуымацӕй дарӕс кӕуыл уыд, йӕ астӕуыл та нымӕрдары фыссӕнгарз, уыцы лӕг дзуапп радта: «Куыд мын бафӕдзӕхстай, афтӕ бакодтон».