Read Библи: Сыгъдӕг Нымӕцтӕ 13 Bible Online

Нымӕцтӕ 13 - Библи: Сыгъдӕг bible

Нымӕцтӕ 13

¹Уый фӕстӕ адардтой сӕ фӕндаг Хацеротӕй ӕмӕ уал Параны ӕдзӕрӕг быдыры ӕрлӕууыдысты.

²Дунедарӕг Моисейӕн загъта:

³«Арвит лӕгтӕ, цӕмӕй ӕркӕсой Ханаанмӕ, израилӕгтӕн дӕттинаг кӕй дӕн, уыцы бӕстӕм. Алы мыггагӕй дӕр арвитут фӕйнӕ лӕджы, сӕ фӕтӕгты».

⁴Ӕмӕ йын Дунедарӕг куыд загъта, афтӕ Параны ӕдзӕрӕг быдырӕй Моисей разӕй лӕгтӕ арвыста, се ’ппӕт дӕр — израилӕгты фӕтӕгтӕ.

⁵Номхуындӕй сты: Рувимы мыггагӕй — Шаммуа, Заккуры фырт;

⁶Симеоны мыггагӕй — Шафат, Хорийы фырт;

⁷Иудӕйы мыггагӕй — Калев, Иефоннейы фырт;

⁸Иссахары мыггагӕй — Игал, Йосефы фырт;

⁹Ефремы мыггагӕй — Хошеа, Нуны фырт;

¹⁰Бениамины мыггагӕй — Палти, Рафуйы фырт;

¹¹Зевулоны мыггагӕй — Гаддиел, Содийы фырт.

¹²Йосефы мыггагӕй (Менассиайы мыггагӕй), — Гадди, Сусийы фырт;

¹³Даны мыггагӕй — Аммиел, Гемалийы фырт;

¹⁴Асиры мыггагӕй — Сетур, Михаелы фырт;

¹⁵Неффалимы мыггагӕй — Нахби, Вафсийы фырт;

¹⁶Гады мыггагӕй — Геуел, Махийы фырт.

¹⁷Уыдон сты, Моисей бӕстӕуынӕг кӕй арвыста, уыцы лӕгтӕ номхуындӕй. (Хошеайӕн та, Нуны фыртӕн, Моисей радта ном Йешуа.)[3]

¹⁸Моисей сӕ Ханаанмӕ бӕстӕуынӕг куы ӕрвыста, уӕд сын загъта: «Негевыл ацӕут ӕмӕ хӕхбӕстӕм ссӕут.

¹⁹Ӕркӕсут уыцы зӕхмӕ, кӕддӕра цыхуызӕн у. Чи дзы цӕры, уыцы адӕм хъаруйӕ ӕххӕст сты ӕви нӕ, нымӕцӕй чысыл сты ӕви бирӕ?

²⁰Сӕ бӕстӕ куыд у — хорз у ӕви ӕвзӕр? Сӕ сахартӕ быгъдӕг сты ӕви бырутӕй ӕхгӕд?

²¹Сӕ зӕххыхъӕд куыд у — сойджын у ӕви мӕгуыр, бӕлӕстӕ дзы зайы ӕви нӕ? Ӕнӕмӕнг ын йӕ дыргътӕй ӕрбахӕссут». Сӕнӕфсирафон уыди.

²²Ӕрвыст лӕгтӕ ссыдысты ӕмӕ ӕркастысты бӕстӕм — Цины ӕдзӕрӕг быдырӕй Лево-Хаматмӕ хӕстӕг Реховы онг.

²³Негевыл ахызтысты ӕмӕ Хевронмӕ, Анакы байзӕддӕгтӕ Ахиман, Шешай ӕмӕ Талмай кӕм цардысты, уырдӕм бахӕццӕ сты. (Хеврон та Мысыры сахар Цоанӕй авд азы раздӕр сырӕзт.)

²⁴Ешколы дӕлвӕзмӕ бафтыдысты ӕмӕ дзы сӕнӕфсиры къабуз ӕд цупал ракодтой ӕмӕ йӕ хъилыл дыууӕйӕ рахастой, ноджы ма — гранаттӕ ӕмӕ легъуитӕ.

²⁵(Уыцы бынат схуыдтой Ешколы дӕлвӕз, израилӕгтӕ дзы сӕнӕфсиры цупал кӕй ракодтой, уый тыххӕй.)

²⁶Дыууиссӕдз боны рацыд, афтӕ ӕрвыст лӕгтӕ, бӕстӕ ӕнӕхъӕнӕй куы басгӕрстой, уӕд фӕстӕмӕ ӕрбаздӕхтысты.

²⁷Моисей, Аарон ӕмӕ ӕппӕт израилаг дзыллӕйы раз куы ӕрбалӕууыдысты Параны ӕдзӕрӕг быдыры, Кадешы, уӕд Моисей, Аарон ӕмӕ ӕппӕт дзыллӕйӕн, цы федтой, уый радзырдтой, уырдыгон дыргътӕ сын равдыстой.

²⁸Рахабар кодтой: «Уыдыстӕм, цы бӕстӕм нӕ арвыстай, уым. Ӕцӕг хъары йӕ зӕххӕй ӕхсыр ӕмӕ мыд. Мӕнӕ йӕ дыргътӕ.

²⁹Фӕлӕ уыцы бӕстӕйы цӕрӕг адӕм тыхджын сты, сӕ сахартӕ та стыр ӕмӕ бырухгӕд. Суанг ма дзы Анакы фӕдонтыл дӕр амбӕлдыстӕм.

³⁰Амалекӕгтӕ цӕрынц Негевы, хеттӕгтӕ, йевусӕгтӕ ӕмӕ аморӕгтӕ — хӕхты, ханаанӕгтӕ — денджызы был ӕмӕ Иорданы былгӕрӕтты».

³¹Моисейы алыварс цы адӕм уыд, уыдоны Калев разӕнгард кодта: «Цом ӕмӕ нӕхи бакӕнӕм уыцы бӕстӕ! Фӕтых сыл уыдзыстӕм!»

³²Фӕлӕ, уырдӕм йемӕ цы лӕгтӕ ацыд, уыдон дзырдтой: «Уыцы адӕмы ныхмӕ мах ницы бакӕндзыстӕм, уыдон махӕй тыхджындӕр сты!»

³³Ӕмӕ тауыстӕ кодтой израилӕгты ’хсӕн, уынӕг цы бӕсты уыдысты, уый тыххӕй: «Цы бӕстӕм фӕцыдыстӕм, уый, чи дзы ӕрцӕра, уыдоны бахӕрдзӕн. Кӕйдӕриддӕр дзы федтам — иууылдӕр ӕнахуыр бӕрзонд адӕм сты.

³⁴Уӕйыгӕнгӕс адӕмы дӕр дзы федтам (Анакы байзӕддӕгтӕ уӕйгуыты мыггагӕй сты). Сӕ разы нӕхимӕ цъырцъырӕгты хуызӕн кастыстӕм ӕмӕ цъырцъырӕгтӕй уӕлдай нӕ уыдыстӕм уыдоны цӕсты дӕр».