Read Библи: Сыгъдӕг Нымӕцтӕ 18 Bible Online

Нымӕцтӕ 18 - Библи: Сыгъдӕг bible

Нымӕцтӕ 18

¹Дунедарӕг Ааронӕн загъта: «Ды ӕмӕ дӕ байзӕддаг, стӕй дӕ хӕдзарвӕндаг иууылдӕр, дзуапп дӕтдзыстут, Уаз Цӕрӕн куы фӕчъизи уа, уӕд. Ды ӕмӕ дӕ байзӕддаг дзуапп дӕтдзыстут, уӕ сауджынлӕггад куы фӕчъизи уа, уӕд.

²Дӕхи мыггагмӕ, Левийы мыггагмӕ, фӕсид, цӕмӕй дӕ уӕлхъус уой ӕмӕ дын ӕххуыс кӕной, ды дӕ фырттимӕ Фембӕлды Цатыры раз лӕггад куы кӕнай, уӕд.

³Ӕххуыс дын кӕнӕнт ӕмӕ Фембӕлды Цатыры кусӕнт, фӕлӕ уаз мигӕнӕнтӕ ӕмӕ нывондхӕссӕнмӕ хӕстӕг ма цӕуӕнт, науӕд уыдон дӕр амӕлдзысты ӕмӕ сымах дӕр.

⁴Демӕ дзуапп дӕттӕнт Фембӕлды Цатыры тыххӕй, алы куыст дӕр сӕ бӕрны уӕд. Фӕлӕ уӕм ӕндӕр исчи хъуамӕ хӕстӕг ма цӕуа:

⁵Уаз Цӕрӕн ӕмӕ нывондхӕссӕны куыст уӕхимӕ хауы, науӕд та Дунедарӕджы азар ногӕй баййафдзӕн израилӕгты.

⁶Ӕз равзӕрстон уе ’фсымӕрты, левитты, израилӕгты ’хсӕнӕй ӕмӕ уын сӕ дӕттын, уый Мӕ лӕвар сымахӕн. Дунедарӕгӕн лӕвӕрд сты уыдон, цӕмӕй кусой Фембӕлды Цатыры.

⁷Ды ӕмӕ дӕ фырттӕ та хъуамӕ сауджынлӕггад кӕнат нывондхӕссӕны уӕлхъус ӕмӕ мидӕмбӕрзӕны фале. Ӕз уын аккаг кӕнын сауджынлӕггад. Сымах йеддӕмӕ ӕндӕр исчи хӕстӕг куы ӕрбацӕуа, уӕд ӕй амарын хъӕуы».

⁸Дунедарӕг загъта Ааронӕн: «Ӕз дын дӕ бар кӕнын, израилӕгтӕй Мӕм цыдӕриддӕр лӕвӕрттӕ ӕмӕ уаз хуынтӕ цӕуа, уыдон. Дӕу ӕмӕ сӕ дӕ байзӕддӕгты хай кӕнын мыггагмӕйы уагӕвӕрдӕй.

⁹Дӕу у иууылсыгъдӕг дӕр — Мӕнӕн цы нывӕндтӕ хӕссынц, уыдоны иу хай. Дӕу ӕмӕ дӕ байзӕддӕгты у, израилӕгтӕ Мын хойраджы хуынӕй, тӕригъӕды нывондӕй, фиддоны нывондӕй кӕй хӕссынц, уыдоны иу хай — иууылуаз.

¹⁰Иууылсыгъдӕгау ӕй хӕр; ӕрмӕстдӕр дзы нӕлгоймагӕн ис хӕрыны бар; уазыл дӕм уӕд нымад.

¹¹Дӕу уыдзысты, израилӕгтӕй цыдӕриддӕр хуынтӕ ӕмӕ лӕвӕрттӕ цӕуы, уыдон. Мыггагмӕйы уагӕвӕрдӕй сӕ Ӕз хай кӕнын дӕуӕн, дӕ фырттӕ ӕмӕ дӕ чызджытӕн: дӕ бинонтӕй дзы алы сыгъдӕгӕн дӕр хӕрыны бар ис.

¹²Дунедарӕгӕн хаст сой, сӕн ӕмӕ хоры хуыздӕртӕ — ног тыллӕджы сӕртӕ — Ӕз дӕттын дӕуӕн.

¹³Дунедарӕгӕн хаст тыллӕджы сӕртӕ иууылдӕр дӕу сты. Дӕ бинонтӕй сыгъдӕг чи у, уыдонӕй дзы алкӕмӕн дӕр хӕрыны бар ис.

¹⁴Израилы цыдӕриддӕр ӕлгъыстагӕй ис, уыдон иууылдӕр дӕу сты.

¹⁵Дӕу у, адӕймагӕй дӕр ӕмӕ фосӕй дӕр, Дунедарӕгӕн нывонд кӕй кӕнынц, уыцы фыццаг цӕуӕт. Адӕймаджы фыццаг зӕнӕджы балхӕнын ӕмбӕлы, ӕнӕсыгъдӕг фосы фыццаг цӕуӕты дӕр афтӕ.

¹⁶Мӕйдзыд сабийы ныхмӕ райсын ӕмбӕлы ӕвзисты фондз шекелы, кувӕндоны шекелтӕй (иу шекелы — ссӕдз герайы).

¹⁷Фӕлӕ стурвос ӕмӕ фысвосы фыццаг цӕуӕты ныхмӕ мацы ис — уаз сты уыдон. Сӕ туг-иу сын бапырх кӕн нывондхӕссӕныл, сӕ фиу-иу сын ӕрхӕсс арты нывондӕн, Дунедарӕгӕн ӕхцон хӕрздӕфӕн.

¹⁸Фыдызгъӕл та — дӕхи, Дунедарӕгӕн кӕй снывонд кӕнынц, уыцы кӕразимаг у дӕхи, стӕй кусарты рахиз сгуы дӕр афтӕ.

¹⁹Израилӕгтӕ цы уаз хуынтӕ хӕссынц Дунедарӕгӕн, уыдон иууылдӕр Ӕз дӕттын дӕуӕн, дӕ фырттӕ ӕмӕ дӕ чызджытӕн, ӕмӕ мыггагмӕйы уагӕвӕрдӕй уӕ хай сты. Уый у Дунедарӕджы раз демӕ ӕмӕ дӕ байзӕддӕгтимӕ арӕзт мыггагмӕйы фидыд, цӕххы фидыдау — ӕнусон».

²⁰Дунедарӕг загъта Ааронӕн: «Зӕххы хай дын нӕ уыдзӕнис Израилы, ницы хай райсдзынӕ се ’хсӕн: дӕ исбон ӕмӕ дӕ зӕххы хай Ӕз дӕн!

²¹Фембӕлды Цатырӕн цы куыст кӕнынц, уый ныхмӕ Левийы байзӕддӕгтӕн зӕххы хайы бӕсты Ӕз дӕттын, Израилы цыдӕриддӕр ис, уымӕй алцӕмӕн дӕр йӕ дӕсӕймаг хай.

²²Израилӕгтӕ та Фембӕлды Цатырмӕ хъуамӕ хӕстӕг ма цӕуой, науӕд фӕтӕригъӕдджын уыдзысты ӕмӕ амӕлдзысты.

²³Ӕрмӕстдӕр левиттӕ хъуамӕ кусой Фембӕлды Цатыры, ӕмӕ уыдон дзупп дӕтдзысты, тӕригъӕд ӕй куы фӕчъизи кӕна, уӕд. Уыцы уагӕвӕрд уын мыггагмӕ лӕвӕрд у, ӕмӕ йӕ ӕххӕст кӕнут фӕлтӕрӕй-фӕлтӕрмӕ. Левиттӕн зӕххы хай нӕ уыдзӕн израилӕгты ’хсӕн.

²⁴Зӕххы хайы бӕсты сын Ӕз, израилӕгтӕ Дунедарӕгӕн кӕй дӕттынц, уыцы дӕсӕймаг хай радтон. Уымӕн зӕгъын, израилӕгты ’хсӕн сын зӕххы хай кӕй нӕ уыдзӕн».

²⁵Дунедарӕг Моисейӕн загъта:

²⁶«Фехъусын кӕн левиттӕн: Ӕз уын зӕххы хайы бӕсты кӕй радтон, израилӕгтӕй уыцы дӕсӕймаг хай куы райсат, уӕд-иу ын йӕ дӕсӕймаг хай Дунедарӕгӕн рахицӕн кӕнут.

²⁷Уый уын хуыныл нымад ӕрцӕудзӕн: куыд хор — мусӕй, куыд ног сӕн — сӕндуцӕнӕй.

²⁸Израилӕгтӕй кӕй ӕмбырд кӕнат, алы уыцы дӕсӕймаг хайӕ дӕр хай кӕнут Дунедарӕгӕн; уыцы хуын сауджын Ааронмӕ дӕтгӕ у.

²⁹Цыдӕриддӕр уын хӕссынц — алцӕмӕй дӕр Дунедарӕгӕн рахицӕн кӕнут ӕппӕты хуыздӕр хай, уаз хай.

³⁰Зӕгъ левиттӕн: дӕсӕймаг хайӕн йӕ хуыздӕр хай куы рахицӕн кӕнат, уӕд уын сахаддзӕн куыд мусы бӕркад, куыд сӕндуцӕны бӕркад.

³¹Уый уын — уӕ куысты ныхмӕ Фембӕлды Цатыры. Уӕхӕдӕг дӕр, уӕ бинонтӕ дӕр, кӕм уӕ фӕнды, уым ӕй хӕрут,

³²азымджын нӕ уыдзыстут: дӕсӕймаг хайӕн йӕ хуыздӕр хай кӕй рахицӕн кодтат, уымӕ гӕсгӕ израилӕгты уаз хуынтӕ нӕ фӕчъизи кӕндзыстут ӕмӕ мӕлӕты амӕттаг нӕ бауыдзыстут».